Black Friday Haul: Kiehls, Stella McCartney, ColourPop #purpleita

السلام عليكم ، كيفكم اليوم ؟

اليوم راح احكي لكم عن مشترياتي من البلاك فرايدي، ادري شي مره قديم لكن توها توصل اخر شحنه كنت انتظرها. و بصراحة هالسنة ما شريت اشياء كثيره لكن حبيت اللي شريت واللي وصلت لي بشكل عام. 

اول شي وصلني هو شنطة من ستيلا مكارتني. واللي متابعني على التويتر يعرف سالفتي معها وكيف انها بغت تروح علي وقت البلاك فرايدي. 

الموقع:  Farfetch

الماركه: Stella McCartney

السعر: 392Euro

الشنطة: خلصت مالقيتها في الموقع لكن هنا مثلها بحجم كبير. 

كان عليها خصم ٣٠٪ و شحن مجاني، وصورت لمتابعيني على السناب اول ما وصلت. موقع فارفيتش من المواقع اللي احبها واحب اطلب منها لانه خدمة العملاء عندهم جدا ممتازة وتغليفهم للقطع تعيشك تجربة التسوق العادي. حبيت في الشنطة لونها الفاتن الازرق واللي ما عندي مثله. حجمها فتنه وانا بشكل عام ما احب الشناط الكبيره مره فيه منها تايني وتجي صغيره مره. لكن انا اخذت ميني وحسيت حجمها مناسب للاستخدام اليومي و المناسبات. لونها يعكس في الاضائة ويجي على بنفسجي و ازرق و كان منثور عليها قلتر. حبيت فيها السلسلة الطويلة للايام الكاجوال و السلسلة القصير للايام الرسمية نوعا ما. واللي اعرفه بشكل عام شنط ستيلا مكارتني حقت كرف وهذا اللي انا ابيه.

ثاني شي اخذته من البلاك فرادي هو من كيلز واللي يعرفني يعرف وش كثر انا احب هالبراند من قبل حتى لا تكون مشهورة عندنا في الخليج. واللي مفرحني اكثر انها راح تفتح عندنا قريب في الرياض في غرناطة مول لان كثير تجيني اساله عنها وعن كيفية شراء منتجاتهم. 

اخذت منهم السيروم الليلي :

اسمه: Midnight Recovery Concentrate

سعره: 46$

الموقع: هنا

احبه ولا اقدر اعيش بدونه بكل صراحة خطوه اساسية في روتيني المسائي وكتبت عنه كثير في المدونة ما يحتاج اتكلم عنه اكثر ادري مليتوا من كثر ما احكي لكم عنه خخخخخخخخ. 

واخذت بعد كريم العين 

الاسم: Creamy Eye Treatment with Avocado

السعر: 46$

الموقع: هنا

وتكلمت عنه بعد في المدونة وللحين ما احس اني اقدر احكم عليه اذا كويس او لا. لكن شي واحد لاحظته انه يعطي ترطيب عالي للمنطقة تحت العين ويعكس الاضائة بشكل جدا لطيف وهالشي احسه يخليه كريم عين كويت تحت الكونسيلر. لكن من المفترض انه يرطب العين ومع الاستخدام يخفي ويعالج الخطوط الرفيعه اللي في المنطقة. 

واخر شي وصلني وطلبته هو من ColourPop وهي اول مره اطلب منهم بكل صراحة. لكن شفت انهم مسوين خصم ٢٠٪ على كل الموقع ف قررت اني اطلبب من عندهم لي ولصديقتي بعد. انا ما اخذت منهم الا الارواج لانها اكثر شي كنتت حابة اجربه منهم خصوصا ان المدح اللي عليها مجنون. واللي حبيته انهم يشحنون دايركت على السعودية. 

مشترياتي من عندهم:

ارواج مات بحجم كبير:

اسمها: Blue Baby

سعرها: 20$ - والحين مسوين خصم عليها لا يفوتكم العرض.

الموقع: هنا

ارواج مات بحجم صغير:

اسمها: the Good Times

سعرها: 18$

الموقع: هنا

والروج الاحمر:

الاسم: Peacocky 

تاخروا كثير في الطلب لكن خدمة العملاء عندهم تخليك تنسين التاخير من قوة ماهم لطيفين في التعامل معك. لانهم راسلوني اكثر من مره يعتذرون انهم راح يتاخرون في شحن اغراضي، ولما وصلت ارسلوا لي الروج الاحمر كنوع من الاعتذار على التاخير وهالشي ينسيك ويخليك تطلبين منهم مره ثانية. غير ان الالوان تسطل لما جربتها على يدي و قوامها اول ما تحطينه كريمي لكن تجف معك ووقتها تصير مااااات. راح انزل تدوينة كاملة باذن الله فيها كل التفاصيل عنهم وعن كيف هي على شفايفي. 

اتمنى استمتعوا في قراية البوست، واذا عندكم اي سؤال او استفسار تقدرون تتواصلون معي تحت او ف اي حساب لي في السوشال ميديا يسعدني ارد على كل استفسارتكم لا تستحون خخخخخخخخ. 

فمان الله ♥♥♥

WHEN YOU KNOW ME YOU WILL LOVE ME

Winter LookBook Purpleita : طلاتي الشتوية بربليتا

السلام عليكم بنات، كيفكم اليوم ؟

حبيت اليوم انزل لكم طلاتي وتنسيقاتي لها الشتوية، وراح تلاحظون وجود المخمل و القطع وسيعه شوي وهذي الترندز اللي قرت اني اتبعها هالموسم. وحبيتها كثير خصوصا المخمل الالوان عليه تقتل وكل ما غمقت كل ما كانت اجمل. 

بس عندي لكم سؤآل وش تفضلون القطع اعرضها لكم على الارض او على المانيكان تكون اوضح ؟

التنسيق الاول:

البلوزة: زارا (موجودة حاليا)

الشال: اسوس

اللقنقز: سبلاش

الشوز: بيرشيكا (موجود)

من القطع و الاكسسوارات الاساسية في فصل الشتاء هو الشال بالنسبة لي. عندي هوس شالات واحبها كثير تضفي للطله بشكل كامل. ولان البلوزة oversized يعني كبيره موديلها حبيت اني البس شي ماسك تحتها و اللوك يكون كاجوال بالسنيكرز. 

التنسيق الثاني:

الفستان: زارا

الهيلز: شارلز اند كيث

الشنطة: ساينت لوران (لندن)

المخمل مع الالوان الغامقة يجي جدا فخم خصوصا العنابي و الكحلي و الاسود. حبيت انه مخملها مو تقليدي وجاي محفط شوي. ولان الفستان قصير شوي حبيت البس عليه كيلون ثقيل اسود منها نتفدى ويكون التركيز على الفستان. وكيف انه oversized من فوق ولكن ماسك من تحت وطالع شوي كانه قصير نتفه من قدام وطويل من ورا. 

التنسيق الثالث:

الشيرت: زارا (متوفر)

البنطلون: زارا (متوفر)

الهيلز: ستيف مادن

الشنطة: مايكل كورس

طلة مخملية بشكل كامل، وهذي احد الترندز لها الموسم انوا تلبسون كامل لون موحد او مخمل كامل. وهذي في منها كذا لون لكن حبيت هاللون اللي لاهو فيراني او بنفسجي مع رمادي حبيتها كثير. وحبيت انها تكون شيك كاجوال مع هيلز و شنطة نود. 

التنسيق الرابع:

السوتر: موقع romwe

البنطلون: زارا 

السنيكرز: اسوس - نايكي

الشنطة: مايكل كورس

حبيت اغير شوي واخلي الطله كاجوال على تراينينق شوي. ركبت عليها سويتر كبيره عندي من سنين لكن كل مره ارجع لها واحبها كثير ومع السنيكرز صار اللوك كاجوال اكثر. 

التنسيق الخامس:

البلوزة: زارا 

البنطلون: سبلاش

الهيلز: شالرز اند كيث

الشنطة: ساينت لوران

هالبنطلون هاي ويستد و قماشه كان جدا دارج في الصيفيه و الشتوية الان، متوفر في كثير محلات وفيه منه الخفيف وفيه منه اللي ثقيل شوي مثل اللي في الصورة. حبيته كثير وما ترددت اني اخذه اول ما شفته يمشي عليه اشياء كثيره والهاي ويستد على وسيع شوي يعطي طول للجسم وفخامه اكثر. 

وبس اتمنى تنوع التنسيقات و الطلات لها الشتاء اعجبتكم. و اذا فيه اي استفسار تقدرون تتواصلون معي تحت ولا تنسون تتابعوني على السناب انزل فيه يومياتي واشياء سريعه اعجبتني. 

فمان الله 

روتيني المسائي || My Nighttime Routine #purpleita

اهلا بنات ، كيفكم اليوم ♥ ؟

مع انو مقصره شوي في المدونة لكن اوعدكم كنت شعلة في السناب وانزل فيه تغطيات واشياء يومية لحياتي و مشترياتي وجولاتي التسوقية ف اذا غبت هنا اعرفوا اني فعاله هناك، اضيفوني عشان ما يروح عليكم شي على #ipurpleita.

اليوم حابة اتكلم عن روتيني الليلي خصوصا في الايام اللي اكون حاطة فيها ميك اب، لان احس هي اللي احرص اكثر في اتباع الخطوات اللي راح احكي لكم عنها. 

١ـ اول شي ازالة المكياج وهنا انا احاول قد ما اقدر اشيله بشكل كامل و معه الاوساخ اللي تجمعت طول اليوم. 

احب ابدا اول شي بإزالة مكياج العيون باستخدام قطن مع مزيل الميكاج من بايوديرما الوحيد اللي كل ما خلص ارجع اشتريه واحرص عليه رغم غلاء سعره، صحيح نيتروجينا عندهم واحد يشبه له واستخدمته وحبيته لكن هذا استخدمه لي سنين ومن سنين ما عمر عيني تحسست منه او جففها ف عندي منه هالعلبه الكبيره وبكم مسحة اشيل مكياج العيون بشكل كامل. 

بعدها ابلل وجهي بموية دافيه بعدين استخدم الكلنزر اللي بـ ألوفيرا والمعروفة بتهدأة البشره من اي تهيج او حساسيه.البراند هي اتود هاوس الكورية، اخذته من محلهم في اندونسيا لكن متاكدة الحين تقدرون تطلبونه من النت او من البائعات. لي فتره استخدمه وبصراحة احبه كثير لانه يسهل عملية ازالة المكياج ولا يجفف لي بشرتي المختلطة. وفعلا يتخلص من المكياج. بعد ما ابلل وجهي بموية دافيه اخذ كمية بسيطة منه وافرك فيه وجهي واشوف الميكاج يتم ازالته بشكل سريع ومريح. 

بعدها ارجع اعيد على وجهي بقطنه مبللة بالبايوديرما عشان اتاكد ان وجهي خالي من اي شوائب الميك اب بشكل كامل. 

الحين فقرة الترطيب وعلاج بشرتي من الميك اب اللي كان عليها طول اليوم ، وهالخطوات مهمه عشان ما اقوم بكره ووجهي تعبان او فيه حبه طالعه لي. لانه وقت النوم بالنسبة لي هو الوقت اللي اخلي بشرتي ترتاح وتعالج نفسها. 

اول شي اخذ قطره من سيروم كيلز وقد تكلمت عنه هنا في المدونة، وهذي ثالث علبه اشتريها وبتخلص وعندي منه جديدة، والخبر الجميل ان كيلز راح يفتح عندنا في الرياض $ـــ$!! المهم اخذ قطره واوزعها على وجهي ورقبتي بشكل كامل يرطب ويساعد الكريم اللي بتحطينه بعده في انه يتغلل في البشره وفي ان البشره تستفيد منه بشكل اكبر. ويعالج بشرتك ويعيد بنائها مع الوقت

. 

بعدها احط كريم من فيشي، هالكريم خلصت العلبه تقريبا خفيف ويرطب البشره ولانه خفيف ف البشره تمتصه بسرعه وما ياخذ وقت في وضعه وتوزيعه على البشره وهالشي جدا مريح. واحس لانه خفيف كقوام ينفع للبشرات الدهنيه. لكن انا بالنسبة لي فرحت انه خلص قبل فصل الشتاء لان احس اني احتاج كريم فيه نسبة ترطيب اعلى منه. ولا هو طول فترة استخدامي له وانا حابته خفيف و يعطي ترطيب ويعطي ملمس ناعم للبشره. ويكفي انه طبي وخالي من المواد اللي ممكن تضر بشرتك على المدى البعيد. 

اخر خطوة هي كريم العين من كيلز و اللي هي خطوة جديدة بالنسبة لي. لان جربت كريمات عين كثيره وكلها ما احسها تسوي شي لكن هذا الكريم سمعت كثير ناس تمدحه وتشوفه رقم واحد في كريمات العيون. لذلك بديت استخدمه ولي الحين كم يوم استخدمه بشكل يومي نهاري وليلي. وان شاءلله اكتب لكم هنا تفاصيل كاملة. لكن حاليا ما اقدر اقول لكم اذا حابته او لا لين ما استخدمه فترة كافيه اني اتكلم عنه. لكن كخطوة لروتيني الليلي استخدمه على اعلى عظمة خدي واوزعه بالطبطبة لان الشد يرهل الجفن. 

واخر شي مرطب الشفايف استخدم اللي تم ذكره هنا. ولي فتره استخدمه واعتبره من المفضلات عندي واللي كل ما خلص ارجع اشتريه لان انا شفايفي جافه وتتشقق بسرعه وهو الوحيد اللي اقوم من النوم القى شفايفي موردة و ممتلئة بدون شقوق. 

وبكذا ينتهي الروتين الليلي لبشرتي خصوصا وجهي ورقبتي. احب لما احط ميك اب بعد ما اشيله اني اعتني ببشرتي من ناحية الترطيب و كاني اريحها بشكل اكبر من بعد الميك اب. واتمنى ان الموضوع فادكم كخطوات للعناية ببشرتك بعد الميك اب. 

فمان الله ♥♥♥

WHEN YOU KNOW ME YOU WILL LOVE ME

KENZO x H&M Haul Purpleita || KENZO x H&M مشترياتي وتغطيتي لـ

السلام عليكم بنات ، كيفكم ؟

اليوم ولو انها متاخرة لكن حبيت انزل لكم مشترياتي من تعاون

 KENZO x H&M ، وراح احكي عن تجربة التسوق بشكل عام هالسنة. لان كل سنة اتش اند ام تتعاون مع براندز كبيرة ويكون فيه ضجة اعلامية و حوسة. لكن هالسنة الحمدلله تجربة التسوق بالنسبة لي كانت جدا ممتازة ومرتبة. 

طلعت من المحل بثلاث مشتريات. التصاميم بعضها كان مره اوفر لدرجة احس صعب احنا نلبسها مكانها في الفاشن شو وبس. لكن بعضها جدا فنكي و غريبة وفيها لمسات كنزو المعروفة من التايقر و الطبعات اللي خارجة عن المألوف. وهذا اللي حبيته فيها ماهي تقليدية جدا بالعكس فيها غرابة و تقدرين تزيدين غرابتها وتكون اوفر وتقدرين تهدينها بقطع كلاسيك عندك. واذا حابين راح انزل تنسيقاتي لها القطع اللي شريت. 

السعر:١٢٩٩ريال

اول قطعه هي اكثر قطعه كنت متحمسة لها واتمنى اني احصل عليها. هي الكيمونو الشتوية حبيتها لانها ثقيلة و راح استفيد منها في موسم الشتاء و البرنت اللي فيها ملفت للعين و يخليك توقفين طبعا ممكن تكرهونها او تحبونها لكن انا حبيتها كثير. واللي حبيته اكثر هو اللوقو حق كنزو في مسكة السحاب. و الاحلى من هذا كله هو انك تقدرين تلبسينها بطريقتين مختلفات. و الطريقة الثانية اهدى و انعم من البرنت الاورنج الصارخ. 

السعر:١٧٩ريال

القطعة الثانية اخذتها من قسم الرجال خخخخخخخخ ، بالنسبة لي حبيت الشيرت حقت الرجال اكثر من القسم النسائي كانت فيها من طابع اديداس الجديد و الوسع اللي الحين دارج في السوق. و الطبعات اللي فيها مع تطريز التايقر يصرخ كنزو و تقدرين تخلينه كاجوال او رسمي بتنورة تحته. بس تداخل الالوان فيه حبيتها كثير. 

السعر:٩٩٩ريال

اخر قطعه واللي كنت جدا محتارة فيها لكن قررت في الاخير اني اخذها هو الفستان. هو زحمة البرنت و الالوان اللي فيه تخلي الواحد يتردد. لكن على اللبس و المانيكان طالع جدا جميل وفخم. وهالشي لاحظته في الملابس انها تعطي فخامه واعلى بشوي من ناحية الخامات باللي متعودين عليه من اتش اند ام. وكون بعضها شتوي يعطي ثقل اكثر. لكن الفستان جدا حبيته الكسرة اللي فيه وال flow حقه يعطي راحة. احسه ما يحتاج معه شي ثاني غير شنطة سودا وخلي الفستان يحكي عن نفسه “^^. 

الحدث نفسه:

 رحت لفرع اتش اند ام العليا الساعه ٨:٣٠ صباحا، وكان جدا مرتب و يدخلون البنات على دفعات ويلبسونك اساور بلون معين تدخلين على حسب لونك ووقتك. البنات اللي يشتغلون في المحل خدومات و يساعدونك بروح حلوة وابتسامة بشوشة. حتى التنظيم كان عند البوابة شديد فيه رجال و سكيورتي لكن الحمدلله ماكان فيه تدافع او تزاحم. القطع المميزة بسرعه تخلص. الجاكيت الكيمونو انا اخذت اخر قطعه كانت متوفرة بالرغم اني اعتبر جاية بدري. حتى القطع الحلوة من قسم الرجال خلصوها البنات خخخخخخخ. بشكل عام كانت تجربة حلوة. 

وبس اتمنى تكون التغطية و التدوينة امتعتكم، انا سويت تغطيه كاملة على سنابي وقتها

واذا حابين اشياء معينه او تنسيقات للملابس اكتبوا لي تحت 

فمان الله ♥♥♥

WHEN YOU KNOW ME YOU WILL LOVE ME

My Top 5 Makeup & Skin Care FAVES | IPURPLEITA

مرحبا بنات، اليوم حابه اتكلم عن افضل ٥ اشياء حابتها في الميك اب و عناية بالبشره ♥. 

Origins Active Charcoal Mask to Clear Pores

من فتره وانا استخدمه و بصراحة من الماسكات اللي تلاحظين الفرق في بشرتك لما تستخدمينه. الماسك مخصص للبشرات الدهنيه المعرضة للحبوب. يحتوي على الفحم واللي يقوم بجذب كل الدهون المتراكمه و يقضي عليها. احب احطه فقط في منطقة التي زون عندي لان هي اللي فعلا تتجمع فيها الدهون و المسام. لاحظت بعد استخدامه المسام تصغر و الدهون تختفي. فيه شوي شد على البشره لما تستخدمينه لكن من الماسكات اللي تشوفين فايدتها على بشرتك. بعد ما تحطينه بشرتك تكون صافيه اكثر. احب استخدمه المناسبات الكبيره عندي. 

Collection Lasting Perfection Concealer

كونسيلر كثير بولقرز بريطانيات يتكلمون عنه ويفضلونه على كثير كونسيلر غاليه او هاي اند. وهالشي خلا عندي فضول استخدمه. خصوصا ان سعره جدا رخيص و الوانه بعد محدودة. مع استخدماي له حبيت فيه تغطيته الكامله للهالات السوداء تحت عيني. احب قوامه لانه مو خفيف مره و ف نفس الوقت يجلس على الجفن السهره كلها او وقت الاستخدام كامل. ما يجلس على الخطوط الرفيعه. ولما اقول يخفي العيوب فهو فعلا يخفيها !! والاحلى من سعره هو انه مقاوم للموية و ماراح يطبع على ملابسك. عندي ينافس كونسلر نارس واللي ما استغني عنه. 

Too Faced Born This Way

كريم اساس لي شهور استخدمه وجدا حابته لتغطيته المتوسطة الى الكاملة و ثباته على البشره. مخصص للبشرات الدهنيه و المختلطة. اعتبره ثقيل شوي لذلك الاحظ افضل شي ادمجه بالبيوتي بلندر عشان يعطي تغطيه كامله وما تكون cakay. الدرجات اللي فيه طبي وتخيري وهذا شي جدا مريح. خالي من الزيوت ويعطي منظر مخملي للبشره وتقدرين بضغطه وحدة يعطيك تغطيه ناعمه وخفيفه. متوفر في سيفورا. 

Beeline Lip Care Flavour Free

تحديدا هذا المرطب اللي كل ما يخلص ارجع اشتريه. لدرجة اني نسيت هذي اي علبه عندي. انا شفايفي تتقشر و مهما شربت موية فهي جدا جافه وتتحسس بسرعه. بدون اي مدح قررت اجربه لانه خالي من العطور ويهدي البشره الجافه. من لما استخدمته لاحظت الفرق في شفايفي. احطه وقت النوم اصحى القى شفايفي موردة مليانه و مافيه اي قشور زي باقي مرطبات الشفايف. اللي تعاني مثلي انصحها تستخدمه. اخذته من السوبرماركت. 

Nars Pure Matte Lipstick - Tokin

مقدر اتكلم عن عشقي لها الروج عندي منه حبتين زيادة جست ان كيس خلص !… هالدرجة تحديدا مره ناسبت درجة بشرتي و استخدمه مع او بدون ميك اب. هو مطفي و اللون لحمي غامق شوي ورجعت له مع رجعت الشتاء و حبي له كل ماله يزيد. مع انه مات لكن ما احسه يجفف الشفايف و اتمنى اجرب درجات اكثر من نفس الروج لانه يجلس فتره طويلة و لانه يحتوي على الفيتامين اي يعطي ترطيب في نفس الوقت. 

وانتوا ايش حابين هالفتره من مكياج وعناية بالبشره، شاركوني اياها عشان اجرب معكم ♥♥

واذا عندكم اي سؤال تقدرون تتواصلون معي تحت او ف اي مكان، ولا تنسون تتابعوني على سناب المدونة انزل فيه نزلاتي للسوق و المطاعم و اي شي من يومياتي 

فمان الله ♥♥♥

WHEN YOU KNOW ME YOU WILL LOVE ME