منتج غير من بشرتي ( kiehl's midnight recovery concentrate ) #purpleita

السلام عليكم ،

كيف الحال ؟ 

ادري غايبه ومقصره لكن فيه تغييرات حبيت اسويها عشان احس بالراحه :$

مقدمه بسيطة :

تركت التدوين فتره لأني انشغلت كثير والالهام صار صفر 

وحسيت اني ابي اكون محددة اكثر ف من هالتدوينه ورايح راح يكون فيه جدول للتدوينات ومنها التزم واتشجع 

ماراح اتحمس واخليها ثلاث ايام لكن كبدايه وكتجربه بخليها يومين ف الاسبوع. 

كل احد و خميس راح يكون في تدوينه. 

وعشان التزم ف الجدول لو في البدايه كتبت ١٠ تدوينات وجهزتها عندي كتشجيع لنفسي. 

الشي الثاني راح الغي الاسك ، اولا لاني ابي اتواصل معكم اكثر عن طريق المدونه وابيها تكون هو المكان اللي نتواصل فيه سوا ، وغير كذا انا سمحت بالردود المجهوله عشان يكون تشجيع لكم ف انكم تتوواصلون معي ومنها اتشجع اذا كنت حاسه لو قليل ان فيه ناس تنتظر مني شي :$

وبس الاشياء الباقيه راح تكون في وقتها ^^

**************

بالنسبه لتدوينة اليوم حبيتها تكون بدايه خفيفه وشي فعلا شفت اثره و استخدمه لي فتره 

اليوم تقرير عن kiehl's midnight recovery concentrate

معلومات عامه 

الاسم : kiehl's midnight recovery concentrate

مكان الشراء:  مطار قطر 

مده الاستخدام : ٧ شهور 

فوائدة : 

١- يحمي و ينعش و يحي البشره ، للحصول على بشره اصفى و انعم 

٢- يعمل مع المواد الموجودة في البشره بشكل طبيعي 

٣- ٩٩٪ مواد طبيعيه وخالي من البيربان 

الموقع : هنا 

تجربتي مع المنتج :

اللي خلاني افكر اشتريه من الاساس هو اليوتوبرز جتهم فتره ما يتكلمون الا عنه. فلما حصلت لي الفرصه اني اشتريه قلت why not ? ، ف شريت الحجم الصغير واستمريت على استخدامه ٥ شهور ، بعدين يوم وانا واقفه قدام المرايه لاحظت شي ان بشتري لها فترة طويله خاليه من الحبوب ، حتى ماعاد طلع لي حبوب اللي تجي قبل او مع البيريود #ـ# !

هنا انا وقفت واستوعبت اني من صرت استخدمه كل ليله قبل النوم بشرتي تهدى

طريقتي ف استخدامه :

كل ليله قبل النوم وبعد ما ازيل المكياج واغسل بشتري بالغسول اليومي احط ف يدي قطرتين "تكفيك " وبعدين افركه ف يدي حتى يدفى شوي واحطه على الوجه كامل ، بتقولين طيب بشرتي دهنيه هل يناسبني ؟ بقول لك ايه هو مخصص لجميع انواع البشره و بعد خفيف جدا دقايق وينشف وبعدها احط كريمي اليومي فوقه . وبسس

عموما لاحظت فيه اشياء ممتازه 

اول شي انا بشرتي حساسه ف احيانا اذا ازلت المكياج تتهيج وتصير فيه شوي حبوب باديه تطلع لما احطه وانوم بعد ما اصحى القى بشرتي صافيه وهدت بشكل ما تتخيلون !

حتى هذا اكثر شي احبه فيه انه يهدي البشره وما يخليها تتهيج ودايم بعد استخدامه الاحظ في بشرتي اصفى وانعممم بكثييير! 

وهالاشياء خلتني ما استغني عنه ولا افكر ابدله بالعكس حمسني اشوف منتجات اكثر من كيلز وابحث عنهم بشكل اكبر ! بشكل عام هالمنتج عندي من التوبز و من السيورمز اللي ما استغني عنها <3 

لما يحصل لك اشتريه ولو الحجم الصغير لانه مبارك خصوصا انك ما تحتاجين الا نقطتين اكثر من كذا ممكن يعكس بشكل سلبي على بشرتك 

غير كذا انصح فيه وفعلا شفت ولاحظت الفرق في بشرتي وهذا الشي نادر انه يصير بالنسبه لي . 

اذا فيه اي تساؤلات عن السيروم تقدرون تسألوني تحت 

وكل اقتراحاتكم اكتبها عندي ف المذكره فإذا فيه اي اقتراح انا كل اذان صاغيه 

فمان الله

WHEN YOU KNOW ME YOU WILL LOVE ME