مراجعتي لكريم العين لتقليل الخطوط الرفيعة من Avene #بربليتا || Review on Avene Ystheal + Eye Contour #purplita

السلام عليكم , 

كيفكم مع الاجواء الجميلة <3 ؟

ونحب فصل الشتاء للأبد .. 

بوست اليوم راح تكون خفيفة هي عبارة عن 

مراجعة لكريم العين من Avene 

هالكريم شاريته لي 4 شهور تقريبا 

.. 

تفاصيل :

الاسم : Avene Ystheal+Eye contour 

         

المكان : صيدلية وايتس 

السعر : 155 ريال 

لقرائة المزيد عن الكريم هنا

...

كانت ادور كريم للعين ولقيت هذا قدامي ولأول مرة اشتري شي بدون ما ابحث أو اقرا عنه لكن لفتني انتباهي .. 

مكتوب على الورقة اللي داخل العلبه :

كريم للعين ضد التجاعيد ,مصمم خصيصا للمنطقة تحت العين 

الحساسة ليقوم بتقليل كمية الخطوط الرفيعه تحت العين بشكل واضح و يقلل من ظهورها بدون حساسية . 

من المفترض استخدامه ليلا قبل النوم فقط .

ويجب ان تكون المنطقة تحت العين نظيفة وناشفه مافيها مكياج او كريم من اي نوع . 

.... 

تجربتي :

أستخدمته قبل رمضان بكم يوم , لأن للأسف انا كنت مهملة منطقة العين وطلعت لي بعض الخطوط الرفيعه :( ! 

المهم من رمضان الى يومك هذا استخدمه وللأسف ماشفت اي تحسن او اي شي من ناحية الخطوط ارفيعه.. 

أستخدمه يوميا قبل النوم بعد ما اغسل وجهي وتكون بشرتي نظيفة .. 

.. .. 

الايجابيات : 

- يرطب المنطقة ولولا انه المفروض انه يستخدم لليل فقط كان استخدمته في النهار لأن البشرة تمتصه بشكل سريع 

- اول ما تحطينه يكون شوي ملمسه يلزق وهالشي ما ادري احسه يبرد المنطقة لأن اذا لمستها تكون باردة 

وهالشي راح يخفف الانتفاخ لما تقومين من النوم.

- مثل ما قلت ماراح يكون فيه انتفاخ للعين .

- ما يسبب حساسية او يحرق المنطقة , وهالشي كويس لأن كثير كريمات جفن العين تحرق :( لأن هالمنطقة عندي حساسة وجافة .

السلبيات : 

- راح يحرق بشكل ما تقدرين تتحملينه اذا حطيتيه على المنطقة وهي ماهي نظيفة . مرة تعيجزت اغسل وجهي وانظف بشرتي من المكياج بشكل كامل يعني كان فيه شوي كحل على المنطقة وحطيته من العجز وحرق بشكل ماقدرت اتحمل لين ما غسلته.

- ما سوا اي شي من اللي هو مفترض يسويه , يعني الخطوط لازالت موجودة وما تغير فيها شي ابدا . وهالشي مخيب صراحة 

لأن عادة كريمات العين ما تكون رخيصة وهالشي يخليني اقرا كثير كثير عن اي كريم اشتريه ! 

ف كيف عن شركة مثل avene من المفترض انها متخصصة 

بهالمجال . 

بالنسبة لي اعتبره فشل واستخدمه حاليا بس للترطيب لين ما القى الكريم اللي صدق راح يعطيني اللي ابحث عنه. 

يعني اكثر من 3 شهور استخدمه ولاشفت اي تغيير , واعتبر هالمدة كفيلة اني اشوف تغيير لو كان بسيط . 

معلومة على السريع : 

- التجاعيد او الخطوط الرفيعه تطلع لعوامل كثيرة ولازم ننتبه لها - العوامل ممكن تكون وراثية او بيئية . 

- بالنسبة لي انا اهملت هالمنطقة لفترة طويلة ونسيت ان بشرتي جافة و العوامل الوراثية بعد ساعدت انها تطلع .

يعني صحيح ماهي واضحة مرة لكن من الافضل انك ما تنتظرين انها تطلع .

- انصح وبقوة انك تستخدمين واقي شمس بشكل يومي حتى لو كنتي راح تطلعين مشوار بسيط , لأن هالمنطقة حساسة جدا وهي ارق منطقة في الوجه. 

وفي النهايه أحب اقول اني راح استمر في استعماله 

لأن حتى لو ما عالج الخطوط الرفيعه هو يرطب البشره 

وهالشي راح يساعد على عدم ظهور خطوط رفيعه ثانية :)

ولازال البحث مستمر على كريم للعين يقلل من الخطوط الرفيعه

ان شاءلله استفدتوا من تدوينة اليوم و اعجبتكم 

ومثل العادة لا تنسوني من دعمكم بالرتويت و الفولو <3 

واي سؤال او منتج حابيني اتكلم عنه لا تترددون انكم تعلموني على جميع وسائل التواصل تحت .. 

فمان الله 

WHEN YOU KNOW ME YOU WILL LOVE ME