تقرير و رأيي في جل التخلص من حب الشباب Grease Lightning من LUSH #بربليتا

السلام عليكم ورحمة الله وبركاته

الشهر عليكم مبارك , وكل عام وانتوا بخير 

قبل اسبوعين تقريبا مريت لش وكنت كل مرة اروح لهم ابي اشتري هالجل القاه مخلص :( , و ذاك اليوم رحت ولقيته عند فرعهم اللي ف المملكة .. 

قررت اخذه .. اللي لازم تعرفونه انه بشرتي تغيرت وصارت مختلطة جافة في جميع المناطق ماعدا التي زون .. وبعد تجارب كثير قربت أني احل بعض المشاكل اللي بدت تظهر لي .. منها الحبوب .. الحمدلله ما عندي حبوب كثير بس احيانا لازم تطلع لك حبة حبتين ف الشهر :( .. و النوع اللي يطلع لي القوي اللي اذا لمستيه يوجع :"( .. ف شرينا هالجل وفي نفس اليوم كنت حاسة ان فيه حبة بادية تطلع وكذا من شكلها حسيته بتجي كبيرة ><

اول شي بعطيكم تفاصيل عن الجل بعدين بتكلم عن النتايج ..

الاسم :Grease Lightning

الموقع : هنا

الماركة : LUSH - المملكة

السعر : 68 ريال

تفاصيل عن الجل :

الجل هذا مخصص للبشرات الدهنيه و الحساسة , لأنه يحتوي على مواد طبيعيه ولا تقوم بتحسيس البشرة , الجل اهم مكون فيه هو زيت الزعتر - زيت شجرة الشاي - اكليل الجبل 

يقوم بالتخلص من الاوساخ و الدهون و في نفس الوقت فهو يرطب البشرة ويهديها ..

ويقوم ايضا بالتخلص من الدهون الزائدة ف يمكن استعماله على منطقة التي زون " الانف و الجبهه"

طريقة الاستخدام :

العلبه تجيك على شكل ضغاط من فوق , تضغطينه وفعليا ما تحتاجين الا قليل تحطينه "بعد" ما تقومين بتقشير بشرتك وبيد نظيفة على الحبة اللي طالعة و تتركينها لين ما تحسين الجل نشف و تحسينه مشدود , بعدها تقومين بغسله بموية دافية 

تقدرين تستخدمينه اي وقت ومتى ما بغيتي بس اهم شي تكون البشرة + اليد نظيفات 

تجربتي :

مثل ما قلت فوق اول ما شريته كان فيه حبة بادية تطلع لي ف اول ما رجعت غسلت وجهي بالمقشر اليومي و حطيته عليه وتركته لما جف تماما وبعدين غسلته بموية دافية , وسويت هالشي ثلاث مرات لمدة يومين او ثلاثة ناسية بس عموما بعد فترة مو اكثر من اسبوع لاحظت ان الحبة اختفت تماااما <3333 !! 

وحتى الاثر مختفي لأني استخدمته قبل لا تطلع بشكل كامل$__$ بس حتى بعد فترة طلعت لي حبة صغيرة ولما استخدمته مرتين في اليوم راحت <3 , بعدين قريت انه افضل وقت لأستخدامه هو عند بداية ظهور الحبوب.. 

 احب استخدمه على الحبوب ف الصباح اول ما اقوم و المساء , مابعد جربته على منطقة التي زون صراحة لكن مذكور انه تقدرين تستخدمينه فيها اذا حابة 

والحلو انه ما سبب لي حساسية او هيجان للبشرة , ريحته قوية نوعا ما لكن ماهي مزعجة , قوامه جل شفاف .. 

للمعلومية فترة استعمالي له ما طولت فقط حبتين من شريته , لكن لأنه مخصص للحبوب ولأني شفت فعاليته على الحبتين حبيته وقلت لازم اكتب عنه في المدونة $_$ !

ف اذا انتي بشرتك ما هي دهنيه مرة ولكن يطلع لك حبوب بين فترة والثانية انصحك تجربينه , وحتى اللي بشراتهم دهنيه يجربونه <3 

وبس 

ان شاءلله التدوينة افادتكم و احس شي حلو اني اكتب عن تجاربي مع الكريمات و هالاشياء , لاني من شريت هالجل وانا مزعجة اهلي فيه خخخخخخخ :$ , ف دوركم ازعجكم فيه خخخخخ 

ما ودي ابالغ بس اول ما شفت نتيجة قلت سحر خخخخخخخخ لان نادرا ما تسوي منتجات العناية بالبشرة اللي هي تدعي انها تسويه *لها عدة تجارب فاشلة* 

وحلو انه سوى فعليا اللي هو مطلوب منه $_$.. 

واذا عندكم اي سؤال او استفسار تقدرون تتواصلون معي تحت 

ولا تنسون تتابعوني على التويتر\انستقرام انا هناك موجودة كثير ;) 

فمان الله 

WHEN YOU KNOW ME YOU WILL LOVE ME

رأيي في منتجات Botanics من بوتس #بربليتا || My Opinion on Botanics skincare products #purpleita

السلام عليكم ورحمة الله وبركاته 

كيفكم ؟ 

بوست جديد عن منتجين من #Botanics 

قبل فترة كنت في بوتس وشفت المنتجين اللي راح اتكلم عنها وقررت اشتريها , ولأن التغليف جذبني و بعد بحثت عنها ف امازون و بوتس *اونلاين* وكلهم قريت تعليقات جيدة عنها ف قررت اشتريها , وبعد وقتها بوتس كانوا مسوين عرض اشتري واحد و الثاني مجانا <3 .. وهذا عامل جذب خخخخ ;)

بصراحة ما عمري جربت اي شي من عندهم عشان كذا جلست ساعة ابحث واقرا وانا ف بوتس خخخخخخ :$ .. كعادتي يعني ما اشتري شي الا لما اكون قارية عنها ف الانترنت .. وعملية البحث سهله جدا اذا عندك تطبيق امازون ف الجوال لان بس تثبتين الكاميرا على الباركود وعلى طول يطلع لك المنتج وبعدها عاد انتي اقري ;)..لأن انا بصراحة ما اثق ف البائعين ف محلاتنا :$

المهم ما شريت الا اثنين 

مدة التجربة : حدود الشهرين 

اسم الكريم : Hydrating Night Cream All Bright

فوائده : كريم ترطيب وتفتيح ليلي 

قواه الغني راح يقوم بترطيب البشرة في الليل و يتركها ناعمه 

ومشرقة في الصباح

- يوجد به نباتات تساعد على ترطيب البشرة 

- هذا الخط تحديدا من المفترض انه يكون طبيعي ومستخلص من نبات الـhibiscus "الخطمي" والذي يقوم بتفتيح البشرة.

نوع البشره : العادية إلى الجافة

سعره: 49ريال *تقريبا*

مكان الشراء : صيدلية بوتس 

مدة الاستعمال : شهرين -متقطعه-

سبب شرائي له :

انا مثل ما انتوا عارفين بشرتي جافة لكن ما يمنع انه بين فترة وفترة تطلع لي حبوب , اثار الحبوب تطول على ما تروح وشفت ان هذا فيه عوامل تفتيح +ترطيب + مستخلص من النباتات 

قررت اشتريه واجربه .. 

رأيي ف الكريم :

اول ما استخدمته لاحظت شيين , اول شي انه ريحته منعشة جدا جدا ريحته تحسين نظافة على شي جميل صراحة 

وثاني شي قوامه فعلا غني لكن ف نفس الوقت ماهو ثقيل على البشرة او يكتمها على طول تمتصه البشرة .. 

ما استخدمه على وجهي كامل الصراحة بس على حواف الوجه -هنا المناطق اللي فيها اثار الحبوب- 

أول ما استخدمته طلعت لي حبوب :( .. وتركته فترة اسبوع تقريبا بس قلت لازم ارجع استخدمه , وصرت اقشر بشرتي بالمقشر اليومي حقي بعدين استخدمه وبعدها ماعاد يطلع لي حبوب , يعني لازم تكون البشرة نظيفه + اتوقع اذا بشرتك مرة حساسة ماراح ينفع لها . 

الصراحة لأني وقفت استعماله ما شفت اثر كبير والعلبه لسى مليانه لكن اقدر اقول ان اثار الحبوب بدت تخف وهذا اهم شي , وان شاءلله مع الاستعمال المستمر راح اشوف الفرق 

بالنسبة لتفتيح البشره بشكل عام ف صحيح شفت هالشي حتى اللي حولي لاحظوا ان بشرتي صارت افتح وصحيه اكثر + مع شرب الكثير من الموية طبعا <3 

هالاسبوعين صايرة احبه كثير وما استغني عنه ف ان شاءلله مع الاستعمال المستمر راح اشوف فرق واضح اكثر بالنسبة لاثار الحبوب .. 

اتوقع الحبوب طلعت لأني ما اغير كريمي كثير ولأني كنت احطه على البشرة بدون غسول او تنظيف ولو كان بسيط لأن من بعد ما صرت انظف بشرتي قبل النوم ماعاد تطلع لي حبوب <3 

حاولي قبل ما تشترين تشمين ريحته لأن اول ما تحطينه تكون واضحة بس بعد ما تمتصه البشرة تختفي 

وحبيت اكثر شي انه قوامه ثقيل لكنه بسرعه البشرة تمتصه <3

ثاني شي اخذته منهم هو الماسك 

أسم الماسك : Iconic Clay Mask Shine Away

فوائده : يزيل الشوائب و ينظف البشره بعمق , يقوم بالتخلص من الشوائب و الزيوت من دون تجفيف البشرة بشكل قوي , يترك البشرة انعم و اصفى وانعم

سعره: حدود الخمسين ما اذكر بصراحة لأني اخذته مجانا :$ 

مكان الشراء : صيدلية بوتس

مدة الاستعمال : شهرين بشكل كامل 

طريقة الاستعمال : استعمال مرة كل اسبوع - توزيع على الوجه وتركه لمدة 10 دقايق لا اكثر , ويتم غسله بموية دافية

سبب شرائي للماسك :

مع فصل الصيف و الحر لاحظت عن منطقة الانف بدت تطلع لي مسامات وهالشي ماعمره صار لي لكن قريت ان البشره ونوعها شي مو ثابت تتغير بتغير الهرومونات الجو الاكل .. الخ 

ومع المسام زادت نسبة الدهون على البشرة :( .. ف لما شفت هالماسك وانه "كلاي" وهو معروف وش كثر هو ينفع للبشرات الدهنيه .. ف قررت اخذه 

رأيي فيه :

حبيته حبيته من اول استعمال وانا واقعه في غرامه , احسه ينظف بشرتي بشكل <3 , ومن فترة استعمالي وانا بشرتي بشكل عام متحسنه <3 , اول ما استعملته لاحظت انه مسامي بدت تصغر + بشرتي انعم بكثييير , ما استخدمه انا على كامل وجهي بس المناطق اللي احس فيها دهون واحيانا اذا حسيت انه القشور متجمعه وهذا غالبا جلد ميت احسه ف اذا استهخدمته وتركته 10 دقايق فعلا احس بشرتي انعم واصفى وحتى افتح .. مرة استخدمته وطلعت لأهلي كلهم قالوا ان بشرتي منورة :$<33 .. واصلا انا نفسي حسيت بالفرق , وف التعليقات ف النت قريت انه مع فترة من الاستعمال راح تلاحظين ان بشرتك صارت اصفى , وفعلا هذا اللي لاحظته 

طريقتي في استخدامه :

اول شي هو خفيف مرة ف افضل انك ترجين العلبه قبل الاستعمال ولأنه عصار ف هذا يسمح لك تتحكمين ف الكمية اللي تطلع لك , ف التوزيع استخدم فرشة عندي ما احتاجها واوزع فيها و احط اكثر شي على الانف وحوله , وبعد ما ينشف تلاحظين انه ف بعض المناطق اغمق من بعضها , المناطق اللي تكون شوي غامقه حتى بعد ما ينشف هذي هي اللي متراكم فيها الدهون 

لأن بعد ما تغسلينه تلاحظين انها انعم و ناشفه لكن ماهي متقشرة مثل ما بعض الغسول\ماسك تسوي .. 

انصح فيه خصوصا اللي حابة تجرب ماسك جديد وماهو سعره غالي <3 

العلبه ماهي كبيره لكن كمية بسيطة بتكفي كامل وجهك واذا بشرتك مختلطة فما يحتاج تحطينه على وجهك كله فقط ف المناطق الدهنيه منها .. 

وبس أن شاءلله اعجبكم البوست وفادكم من ناحية الترطيب + التخلص من اثار الحبوب + التخلص من الدهون 

كل المنتجين كانوا ممتازين مع اني ما توقعت كثير منهم لكن رخص الشي ما يعني انه سيء P:

حتى اهلي اعجبهم وكلهم شروا مثلي خخخخخخ <3 

واذا اي وحدة فيكم جربتها ياليت تخبرني لأن اكيد يفرحني اني اقرا تجاربكم باشياء انا مدحتها ;)

وتقدرون تتواصلون معي عن طريق كل وسائل التواصل تحت او عن طريق التعليقات هنا <3 

WHEN YOU KNOW ME YOU WILL LOVE ME

فمان الله 

قائمة القراءة لإجازة الصيف #بربليتا || My Reading List ForSummer #Purpleita

مرحبا يا جميلين ^^ 

كيفكم ؟ واخبار الاختبارت ؟ عساكم خلصتوا وجبتوا درجات كويسة .. 

تدوينة اليوم جديدة من نوعها , ما عمري نزلت مثل كذا 

بس لأني حابة ازيد نسبة القرائة عندي ف الصيفية قررت احط لي لست للقرائة بسيطة وان خلصتها قبل ما تنتهي الاجازة راح ازيد عليها غير كذا مقررة ما اشتري كتب جديدة مهما كانت المغريات لين اخلص هاللست خخخخخخخ :$ 

أحب القرائة جدا بس انا بطيئة :$ .. يعني حتى لو كان الكتاب عاجبني ومتحمسة معه لازم ياخذ مني وقت على ما اخلصه "^^

ف اللست ماهي كثيرة هي فقط 4 كتب .. 

اشتريتها من فترة وعلى اساس ماراح ابدا فيها الا مع بداية الاجازة بس فيه كتاب بديت فيه قبل الباقين خخخخ :# 

وراح اتكلم عنه لين وصلت له .. 

التدوينة جديدة من نوعها ولأني ما استمتع ف قرائة الكتب العربية كثر الانجليزي ولأني اشوف القرائه شي شخصي جدا فكرت كثير قبل لا انزلها لأن مو كلكم تقرون انجلش بس انطلب مني كذا مرة اتكلم عن كتبي و قلت ابدا ف هالبوست واذا اعجبكم راح اتكلم عن كتب اكثر ف المستقبل <3 

يلا نبدا ^_^ *المقدمة الطويلة جدا خخخخ*

This is how it ends - Kathleen MacMahon

السعر : 35 ريال - جرير

كنت وقتها ابحث عن رواية خفيفة لأن كنت مخلصة وحدة جدا عميقة وحقت تفكير , ف كنت ابي شي خفيف , وانا ادور ف جرير لقيت هالكوفر واخذته قريت اللي مكتوب ورا الكتاب 

وقررت اخذها 

التلخيص :

تتكلم عن شخص اسمه برونو , برونو ذهب لإيرلندا للبحث عن أصوله. 

أدي عاطلة عن العمل , سابقا كانت مهندسة معمارية , وحاليا تتعافى من قلبها المكسور , وفي الوقت ذاته تعتني في ابيها.

في الوقت ذاته عالم برونو وايدي يلتقيان , ويختبرنا مشاعر لما يشعرا بها من قبل .. لكن حبهم سيتم اختباره بمصاعب لم يتخيلها

............................

الرواية مررة رومانس شكلها , لكن بالنسبة لي احب انوع ف القرائه , والكفر اعجبني شكله , قررت اخذها لأني مثل ما قلت شي خفيف وعن حب <3 

اول شي احكم عليه هو الكفر خخخخخخخ :$ , ولان وقتها اخر رواية قريتها كان كفرها اسود شفت هالملون قلت اخذها واقراها وان شاءلله ما تكون too cheesy;[=

The Husband's Secret - Liane Moriarty

تفاصيل الرواية :

ام لثلاثة وزوجة لجون بول . سيسليا تكتشف رسالة مخبأة في علية المنزل مكتوبه بخط زوجها , ومكتوب على غلافها :

" تفتح فقط عند وفاتي "

فضولها يدفعها لفتحها - وبها الوقت يتوقف -.

في رسالة جون بول يعترف فيها بخطأ اقترفه وإن ظهر سوف يقوم بتدمير عائلتهم واناس اخرين.

الرواية الجميلة جدا جدا جدا :""" .. هالرواية تحديدا كنت اكثر وحدة متحمسة لها وابي اقراها , لكن كان صعب اني القاها لأن كانت تنباع بشكل سريع ف فروع جرير :( .. هي تبع الأكثر كتب مبيعا في نيويورك تايمز *جريدة امريكية*

والكفر حقها كان شكله مغري :$ .. مو هذا الشكل الشكل الثاني على شكل وردة مهشمه <3 .. وبعدين المدح عليها كان كثييير 

ف كنت حاطة ف بالي ان هذي الرواية هي اول وحدة ببدا فيها وفعلا بديت قبل بشهر ووصلت صفحة 100 , لكن انشغل مرة الشهر اللي فات ف وقفت قراية وحاليا بديت ارجع اقرها $_$

أول ماقريتها ماكنت فاهمه شي جلست لين وصلت لكذا شابتر على ما فهمت , لكن اللغة جدا جميلة والاحداث تتطور بشكل سريع وان شاءلله ما تكون مملة وانتي تقرين تبين تعرفين ايش مكتوب ف الرسالة .. انصح فيها بقوة حتى لو اني ما بعد خلصتها <3 

The Paris Wife - Paula Mclain

السعر : 39 ريال - جرير

تفاصيل الرواية :

أحداث الرواية في 1920 شيكاغو 

هادلي هي فتاة خجولة في 28 من عمرها . وحين قد استسلمت في ايجاد الحب و السعادة تلتقي بي ارنست هيمينق واي . وفتنت بطاقته و طموحه الكبير . بعد الزواج منه الاثنان يذهبان الى فرنسا . لكن فرنسا ليست بلدا لبناء منزل وعائلة . إنه مكان للرقص و الشرب و الفنانين . زواج الاثنين يبدأ بالذبول وولادة ابنهم يجعلهم اكثر تباعدا . 

هذي بكل صراحة شريتها عشان الكفر <3 ! 

لأنه جذبني مرة خصوصا اني احب هالحقبه <333 .. 

و الرواية اغلب احداثها تكون في فرنسا , ومن المكتوب ورا الكتاب فهي عن ernest hemingway وهو كاتب امريكي معروف . وهي مكتوبة بطريقة روائية جميلة <3 

جدا متحمسة اقراها لأن قريت كثير مدح عليها ف goodreads

اخر رواية 

The Unlikely Pilgrimage Of Harold Fry

Rachel Joyce

السعر :34 ريال - جرير

تفاصيل الرواية :

عند خروج هارولد فري من منزله لإرسال رسالة بريدية ومع صوت زوجته في الدور العلوي . هو لم يكن يعلم انه على وشك الخروج من دولة إلى دولة اخرى.

هارولد لا يرتدي حذاء للتسلق ولا يحمل معه خريطة ولا حتى بوصلة. ولا يحمل معه ايضا هاتفه النقال, كل ما يعرفه انه يجب عليه ان يكمل المشي حتى ينقذ حياة شخص ما.

هالرواية تفاصيلها مررة تحمس , انه شخص بيطلع من البيت ليقضي شي بسيط بس يلقى نفسه في مكان اخر تماما ! 

ما ادري ليه وانا اقرا تخيلت هارولد شايب خخخخخخ :$ 

بس حسيت هالرواية غير عن كل اللي شريته وانا احب انوع عشان ما امل <3 , وكثير يقولون انها مضحكة وممتعه جدا لدرجة وانتي تقرينها تخليك ودك تسافرين $_$ ! 

وزيادة على كذا الرواية هذي من اكثر الكتب مبيعا للكاتبة ف ان شاءلله تكون ممتعه <3 .. 

وبكذا اكون خلصت $_$ !

لا تخافون ما كتبت شي يحرق كل اللي كتبته من ورا الكتاب 

بالنسبة لي ما افكر اشوف من الكتاب خخخخخ :# ونادرا ما اشتري كتاب بنائا على كاتبة , اروح المكتبة واختار كتب  عشوائي بناءا على الكفر , وبعد كذا اخذ لي كرسي واجلس واقرا كل كتاب وش مكتوب من ورا خخخخخخ واذا كان حمسني وخلاني ابي اقرا الكتاب , أسوي سكان للبار كود من ورا وابحث عنه ف القودريدز واقرا الرفيوز , عادة اخذ الكتب اللي عليها مدح وعادة احس لا بيعجبني الكتاب حتى لو ماعليه مدح 

يعني يفضل انك تسوين مثلي او على الاقل تحطين قائمة بالكتب اللي حابة تشترينها , بس حلو من فترة لثاني نشتري كتب بهالشكل يعني التجربة نفسها ممتعه , ونصيحة روحي لحالك خخخخخخخخخ عشان ما تكونين مستعجلة وتاخذين راحتك ف البحث <3 

وقرائة ممتعه جميعا لا نضيع الاجازة باللعب وبس خخخ :# 

<- توجه الكلام لنفسها قبل لا تقول لكم :$

وبس ان شاءلله يكون اعجبكم البوست ولو حابين اتكلم بشكل اكثر عن واحد من هالكتب اذا خلصت قرايته ياليت تعلموني 

وبعد تغيير عن سوالف الميك اب ;)

وتابعوني ف تويتر لأني عادة اتكلم عن الكتب اللي اقراها 

WHEN YOU KNOW ME YOU WILL LOVE ME

رائيي في منتجات و ادوات التجميل من اتش اند ام #بربليتا || H&M review makeup and bushes #purpleita

السلام عليكم ورحمة الله وبركاته

كيفكم ؟

أشتقت للمدونة و التدوين واشتقت اني اسولف هنا 

مهما كتبت تقارير بسيطة ف التويتر او الانستقرام بس ف المدونة لها نكهه خاصة , اني اكتب بشكل مسهب خخخخخ 

ولأني مقصره كثير مجهزه تدوينات حقت شهر قدام خخخخخ

وكلها منوعه ومفكرة فيها زمان بس اشوا اخيرا فضيت اني اسويها , الشغل ما يخلص ف قررت اني اصور مجموعه من التدونيات واصير انزلها بشكل اسبوعي اسهل لي 

لأن اكثر شي يتعبني شوي هو التصوير .. 

ما علينا اهم شي رجعنا $_$ .. واكثر شي يفرحني انه للحين فيه ناس تدخل المدونة وللحين فيه ناس تسأل عني وبعد هالشي اكيد يشجع <3 

... 

تدوينة اليوم عن منتجات\ادوات التجميل من ماركة اتش اند ام

من زماان شريت منهم فرشة وهالفرشة جلست عندي حول ال 6 شهور او اكثر ومع الغسيل و الاستعمال انبهرت فيها , ومنها بديت شوي شوي اشتري منهم واجرب <3 ! 

أول شي مناكيرهم , لأن عندي حب للمناكير و اللمعه تحديدا شريت منهم مناكير اللمعه ولازلت اذا رحت لهم اشوف وش اشكال اللمعه الحديدة عندهم .. 

بالنسبة للمناكير اللمعه جميل جددددا $_$!! اتعب وانا اقول جميل يجلس طول فترة ما انتي حاطة المناكير , ويطلع جميل فوق الالوان اللحمية \ الفوشية \ اي لون حابة تحطينه فوقه 

احب احط على ظفر واحد اللمعه وفعلا هالشي يعطي لمسة فخامه خصوصا فوق الالوان الغامقة <3 , اسعار مناكيرهم موحدة 29ريال , ومرة حلو السعر خصوصا انها ما تتفكك مثل المناكير العادية 

بالنسبة لمناكيرهم العادية *الالوان* I'm not a big fan

ما احبها وشريت 2 واحد نشف وخرب بشكل سريع لدرجة اني تحسفت اني شريته والثاني هذا , ومثل ما انتوا شايفين ف الصورة بدا يتفكك ويجف , وما احب هالشي , بالنسبة لي هذا اكبر منفر وفعلا من يومها ماعاد شريت منهم , لان حرام ادفع لو 20 ريال على مناكير ف اقل من شهر او شهرين يتفكك , وفيه ماركات كثير "رخيصة" ويجلس المناكير سنة كاملة ما تغير <3 

ف ما انصح فيها جودتها ماهي كويسة . بس بالنسبة للمعه جدا جميلة وشايفة انهم عشان فصل الصيف منزلين لمعه ملونة فوشي \ ازرق \ احمر <3 ! وافكر اخذ منها <3 .. 

صورة للمناكير , الاول قطع اللمعه كبير وواضحة , اما الثاني فهو ملتي كولر يعني فيه كذا قطع صغييرة لمعه ملونة وواضحة ف الصورة <3 

ثاني شي ارواجهم , وهالنوع تحديدا , وقعت في غرامه من اول ما شريت اول لون , عندهم 4 الوان حاليا 

( احمر -  اورنج - نود"لحمي" - فوشي )

الاورنج و النود ما اعجبوني خفيفات مررة بعكس اللوانين الاحمر و الفوشي , الفوشي من اول ما تحطينه يطلع اللون <3 والريحة لذييذة خخخخ , ريحة حلاو $_$ ! 

وبعدين العلبة جميلة انه تشوفين اللون من قبل لا تجربينه وفعلا الدرجة هي نفسها مثل العلبه , وما يحتاج تبرينه , بس تحركينه من تحت ويطلع الروج . . 

الفوشي : قوامه مخملي \ يجلس فترة اطول \ يرطب \ فيه لمعة خفيفة 

الاحمر : اخف قوامه \ مائل للقلوس \ ترطيب \ ولمعة اكثر 

مع انه المفروض يكونون نفس القوام بس حتى وانتي تجربينهم على يديك تلاحظين الفرق بين اللونين .. 

حابتهم مرة وبالنسبة لي افضل من حقات ريفلون .. ولما احط الفوشي لاحظت ان اللي حولي يسألوني عن اللون <3:$

الارواج السعر : 29ريال 

أنصحكم تجربونها خصوصا مع فصل الصيف حلو انك تجربين الوان فيها لون مثل الاحمر الفوشي و الاورنج <3 .. 

اخر شي الفرش , وهي مثل ما قلت فوق السبب اللي خلاني اجرب اكثر منتجات التجميل من اتش اند ام <3 .. 

خصوصا الفرشة الكبيرة , اخذتها لأني كنت احتاج فرشة لكسرة(عفطة) العين غير عن اللي عندي .. وشفتها وقررت اجربها خصوصا انها كانت حول 29 ريال مثل باقي اشيائهم

واخذتها وجربتها اول شي حابة اقول انها ناااااعمه !!! 

وهالشي صدمني , وفوق كذا شعرها ما يطيح , مليانه شعر 

وهالاشياء كلها يساعد انها تلقط الشدو بشكل اسرع + توزعه بشكل افضل , صرت استخدمها ف حواف الشدو عشان يتوزع بشكل افضل وما يكون واضحة اطرافه .. 

صرت ما استغني عنها حتى افكر اخذ وحدة ثانية لأن احيانا احتاج فرشة توزيع نظيفة عشان ترتب\تخفف الحواف بشكل ارتب وكل ما ماكنت الفرشة نظيفة كل ماكان التوزيع اسهل لك

اكثر شي استخدمها لعكفة العين لان شكلها يسمح انها تدخل وسط العكفة و توزع الشدو بشكل اسهل <333 !

ومع الغسيل و الاستعمال للحين ناعمه وشعرها ما طاح <3 

بالنسبة للثانية الصغيرة احبها لو كنت حابة احط سموكي واحدد اكثر تحت العين عند الخط وقريب من الرموش <3 شعرها صغير وشكلها شبه مربع يسمع لي اني اقرب من خط الرموش واوزع الشدو تحت العين بشكل ارتب .. 

عموما فرشهم هذي ممتازة وحابة بعد استمر ف اني اجرب منتجات اكثر .. ولو جربت اكيد راح اكتب 

لأن بالنسبة لي ما كنت افكر عند اتش اند ام ارواج حلوة او فرش جودتها مرة كويسة , وحاليا افكر اشتري بونزر وعندهم بعد بي بي كريم ف لو حابين جربتهم <3 .. 

في النهايه احب اشكر اللي ساعدتني بخصوص جودة الصور 

لأن كانت مضايقتني جودة صوري وان شاءلله يكون الفرق باين خخخخ , لأن احس نص جمال التدوين هو حلاوة الصور $$ 

وان شاءلله ما انقطع مرة ثانية لأن اشتقت لكم اكثر شي :< 

وبعد احيانا اكتب تقارير بسيطة عن بعض الاشياء اللي جربتها بس ما احس انها تسوى اكتبها ف المدونة ف اذا حابة تقرينها تابعيني على التويتر و الانستقرام .. 

و اشوفكم الاسبوع الجاي ان شاءلله , واي سوال او استفسار او اي طلب تقدرون تتواصلون معي تحت .. 

فمان الله 

WHEN YOU KNOW ME YOU WILL LOVE ME

مفضلاتي :اشياء انا حابتها هالفترة , واشياء ما اعيش بدونها #بربليتا | #Purpleita favorites at the moment

السلام عليكم ورحمة الله وبركاته 

كيفك ؟ 

ما عمري فكرت انزل مفضلات , لأني بصراحة امل من الاشياء

بسرعه يعني غير الاساسيات كثير اغير واوقف استخدم اشياء عندي وانساها "^^ .. بس هالمرة قلت ما اتكلم عن "مفضلات"

بس اشياء حابتها هالفترة و اشياء احس اني مستحيل اغيرها طالما الشركات تصنعها خخخخخخخ .. وهذا هو تدوينة اليوم <3 

الترتيب عشوائي , وكلها اشياء تكلمت عنها قبل يا بشكل مفصل يا بشكل بسيط 

وكلها راح اتكلم عن ليه حابتها | استخدمها | ما استغني عنها <3 

أول شي هو كريم الاساس المفضل عندي دائما وابدا وهو :

الأسم : Chanel Vitalumiere Aqua

السعر : حدود الـ 200

تفاصيل اكثر :

* واقي شمس 15SPF

* اساسه مائي يعني انه ماراح يسد المسامات 

* يعطي ترطيب عالي 

*تغطيه خفيفة إلى متوسطة 

* يعطي البشرة نظرة صحية ولمعة خفيفة "يعني بشكل صحي اكثر من انها لمعه"

* يجب تحريك العلبه بشكل جيد قبل وضعه 

هالكريم الاساس احبه اكثر شي استخدمه , واعتبره ينفع لجميع انواع البشرة 

هالفترة بشرتي صايرة مايلة اكثر على المختلطة في التي زون ,ومع اني كنت استخدمه لما كانت بشرتي صحراء قاحلة و الحين مختلطة في كل الفترتين حابته <3

واحسه يعطيك احساس اللي ماكنك حاطة ميك اب بس ف نفس الوقت مع الدمج يعطي تغطية متوسطة , خفيف جدا على البشرة وراح تحسين بعد ما تشيلينه بالغسول ان بشرتك ماهي ناشفه بالعكس احس في كل مرة استخدمه ان بشرتي فعلا رطبة !

هو من المنتجات اللي مستحيل ما ارجع اشتريه *لأنه شوي ويخلص* :(

أحبه وفعلا كريم اساس يسوى سعره , لانه يجلس معك فترة طويلة ويعطيك الترطيب و المنظر الصحي الديوي <3 .. انصحكم فيه وان شاءلله راح تحبونه 

لاني قريت كذا مدونات بشراتهم تختلف عني وكلهم يمدحونه , وبالرغم من ان فيه واقي شمس , لكن ما يعطيك هذي الطبقة البيضا .. 

ملاحظة :

اذا بشرتك فيها اثار حبوب كثير او حب شباب ما اعتقد راح يناسبك . 

الأسم :Sigma Round Top Kabuki F82

المكان : موقع سيجما

هالفرشة شريتها مع مجموعة الفرش للوجه الثلاث من موقع سيجما .

اخذتها قبل سنتين تقريبا , ومن سنتين وانا لاحظت اني اذا بغيت نتيجة مثالي للفاونيشن اللي استخدمه راح استخدمها هي تحديدا من بين الثلاث فرش<3 !

هي الفرشة اللي استخدمها مع كريم الاساس , مو بس حق شنيل بس مع كل كريماتي 

لو تحطين شوي بس من كريم الاساس راح توزعه لك بشكل جدا جميل 

ولأن الفرش صغار و ملمومه فهي ما تمتص الكريم وبالعكس توزعه لك بشكل انتي نفسك تلاحظينه <3 , انصحكم فيها بصراحة .

أعتني فيها ونظفيها وراح تجلس معك العمر كله , لان شعرها ما يطيح ابدا <3

الأسم : Garnier Tinted Eye Roll-On

المكان : الدانوب

كونسيلر من قارنيه , هو الكونسيلر اليومي اللي استخدمه بدون تفكير .

طول هالاسبوعين كل ما حسيت ان عندي هالات و جفني منتفح استخدمه 

- لأن الكورة الباردة تخفف من الانتفاخ 

- كونه سائل نوعا ما هذا يعطي ترطيب + يسهل علي دمجه 

الحين طلعوا درجات منه <3 , وفعلا احبه لأنه يعطي تغطية ويجلس معك اليوم كله

ما يجلس على الخطوط الرفيعه تحت العين , واعتبره ينفع للي ماعندهم هالات شديدة 

وينفع بعد للأستخدام اليومي مثل ما قلت , وبرجع اشتريه <3 

حتى الشركات الكبيرة الحين صارت تسوي كونسيلر بنفس طريقة قارنيه 

منتج جميل بسعر اجمل <3 

الأسم :benefit big beautiful eye an eye contour kit

المكان : وجوه

الحلو في شادوهات بينفت هي انه مع كل علبه يجيك صور تعلمك طرق لوضع الشادو 

ومع فرشة لتحديد و تزيع الشادوز <3 

اخترت هذي تحديدا لأنها اولا من زمان عندي والقاني بين كل فترة وفترة ارجع استخدمها , خصوصا البنك الفاتح مرة <3 , هو لوني المفضل في الكيت 

احبها لأنها شوي منها يكفي على الجفن كامل , وبإمكانك تسوين لوك كامل من هالعلبه البسيطة , والالوان جدا حلوة وتعطيك نتيجة اروع , البنك احب احطه احيانا على الجفن كامل ومع كحل وشوي ماسكرا وبسس <3 طلة خفيفة وبسيطة لكن بتكون جدا جميلة على العين خصوصا البنك يعكس ويعطي منظر صحي <3 

ولاني استخدمتها كثير هالفترة حسيت اني صدق حابتها <3 

الأسم : 

* Rimmel - Barely There 362

*H&M - Jo is in the House 3E1I

السعر:كل الاثنين في العشرينات 

المكان : ريمل : الصيدلية - و الثاني من اتش اند ام

مناكير ريمل احبها بشكل عام , عندي كذا لون من نفس هالمجموعه 

احبها لأن اللون قوي وثقيل المناكير ما تحسينه موية الاشوي مثل بعض المناكير

والشي اللي اكثر شي احبه فيها هي قصة الفرشة حقتهم <3 !

مريحة جدا القصة وتحط لك المناكير من اول مرة .. وهاللون حابته مرررة مع حق اتش اند ام , هو صراحة احب مناكيرهم اللميعه حقت اتش اند ام <3 

جودتها حلوة و احسها تعطيني بيس كوت للمناكير و اللمعه تخلي كل شي احلى <3<3

ولانه نود\لحمي لين حطيت عليه هاللمعه الملونة *لو لاحظتوا في الصورة فيها كذا لون* احسها تعطي منظر جميل <3

الأسم : Mentha lip shine

السعر: ريال - كان اساس 35ريال

المكان: باث اند بودي ووركز

بالنسبة لهالمرطب , هو بصراحة انا اخذته لأني شفت السعر وانهبلت خخخخخخخ

انا وبنت خالي اخذنا لكل العائلة خخخخخ , وما توقعت انه بيعجبني , بس الريحة حلوة كأنك توك ماخذه حلاو فقس <33 , ويحر شوي لكن بعد فترة ماعاد يحر أحسه يعالج الشفايف فعلا <333 .. حتى على العلبة نفسها مكتوب لرائحة نفس منعشة .

لكن انا استخدمه كل الوقت لأن شفايفي انا تتشقق بسهوله , وتتعبني كثير ف هالشي 

لكن اذا حطيته احسها تترطب وتهدى بعد فترة <3 , اول ما احطه احسه حار ولكن مع الوقت يروح الاحساس واحساس الحرارة اللي يجي من الشفايف نفسها من الجفاف يختفي <3 وهذا الشي اللي مخليني حتى وانا اكتب البوست هذا اكون حاطته خخخخ <3

واكيد برجع اشتريه وما احس اني بستغني عنه <3

الأسم : Apocalips lip lacquer

السعر: 42ريال

المكان : صيدلية بوتس

هالروج\قلوس تكلمت عنه في مشترياتي الأخيرة هنا , وانا اتكلم عنه وقبل لا استخدمه قلت اني راح احبه , وفعلا حبيته , حبيته لدرجة اني ناوية اشتري كل الالوان الموجودة من هالمجموعه , اللون بحد ذاته شي جدا جدا جميل , وفي البوست اللي قبل حاطة صورة له .

اللي حبيته فيه انه روج تحسينه بس هو ماهو روج , ما ادري كيف اشرح لكم حتى احسه جامع بين الاثنين , يعطيك ترطيب + لون قوي وثابت ماراح يتحرك من مكانه طول اليوم , لأني حطيته كثير هالفترة ولقيتني نادرا ما ارجع اعيد عليه $_$ !

يعطي لمعه ولا اروع , وهذا غير انه ما يبقع على الاشياء او الاكواب <3 

يستاهل انكم تجربونه وهالدرجة تحديدا تنفع للإستخدام اليومي <3

واهم شي عندي انه ما يلزق او تحسين انه فيه شي ثقيل على شفايفك لأن بعض القلوسات تعطيك هالاحساس وهالشي انا ما احبه .. 

الأسم : Pure Seduction

السعر : 100ريال تقريبا *اخذتها تبع مجموعه*

المكان : فكتوريا سيكرت

مجموعة بيور سيدكشن من فكتوريا سيكرت هي ادماني هالفترة <3 !

حتى لما افتح العلبة ابي احط كريم و اشم ريحته تجيني سعادة خخخخخخخخخ 

عطر الجسم ريحته فاكهه , واحب ابخه بعد الشاور واحيانا اذا كنت احس اني مكتومة او ابي شي يرفه عني خخخخخ , لين بخيته حولي احس بشعور جميل مدري كيف اشرح لكم بس انا من الناس اللي اذا جلست فترة طويلة ف كلاس احس بكتمه ف فجاة اطلع عطر وابخه حولي to left me up <3

بالنسبة للكريم احسه مركز اكثر من العطر , يعني العطر فواكه بس احس الكريم معه ريحة حلويات وشي حالي <3333 ! وثقيل ماهو خفيف يعطيك ترطيب حلو 

ولأنه صغير بإمكاني اخذه معي ف الشنطة <3 

الأسم : INECTO - pure coconut 

السعر : 22ريال

النوع : بلسم ليف ان 

هالبلسم اول ما استخدمته رحت لصديقتي ركض واقول لها حبيته حبيته !

ومع كل شاور القاني احبه اكثر , الريحة تفتح النفس تحسينك كومة نظافة وشي منعش 

الشي اللي ما حبيته هو البخاخ , يعني قوي مرة ف صرت ابخ كم بخة ف يدي بعدين اوزعه على الاطراف وطالع , يعطي شعرك ترطيب بشكل <333 !

تحسين ملمس شعرك صار رطب جدا , والتشابك قل , وان شاءلله يكون فعلا فيه حماية من الحرارة , بالنسبة لي كون ان شعري كيرلي \متاطير نوعا ما , فهو خفف هالشي 

ماصار متطير واطرافي ماعادها تتشابك بشكل كبير مثل اول , بالعكس صار حتى لما اهويه تكون كل كيرل لحالها <3 , واذا كنتي تحبين ريحة جوز الهند ف بتعشقينه 

انصحكم فيه بقوة $__$ ! تركت باقي الاشياء اللي صرت استخدمها وصرت استخدمه لحاله <33 

وما احس اني بقدر استغني عنه حاليا <3 

وبس بكذا نكون خلصنا اول تدوينة من المفضلات 

واحس اني تكلمت بشكل مسهب عن الاشياء اللي حابتها بس حبيت اشرح لكم اكثر عنها 

وليه انا حابتها <33 ! 

وان شاءلله يكون اعجبكم واستفدتم منه لاتنسوني من الدعم و الرتويت <3

احبكم اكثر شي ^^ خصوصا اللي يجوني في التويتر لأن هالاشياء تشجعني 

واذا فيه اي سؤال او اسفسار تقدرون تتواصلون معي تحت 

فمان الله 

WHEN YOU KNOW ME YOU WILL LOVE ME