My Top 5 Makeup & Skin Care FAVES | IPURPLEITA

مرحبا بنات، اليوم حابه اتكلم عن افضل ٥ اشياء حابتها في الميك اب و عناية بالبشره ♥. 

Origins Active Charcoal Mask to Clear Pores

من فتره وانا استخدمه و بصراحة من الماسكات اللي تلاحظين الفرق في بشرتك لما تستخدمينه. الماسك مخصص للبشرات الدهنيه المعرضة للحبوب. يحتوي على الفحم واللي يقوم بجذب كل الدهون المتراكمه و يقضي عليها. احب احطه فقط في منطقة التي زون عندي لان هي اللي فعلا تتجمع فيها الدهون و المسام. لاحظت بعد استخدامه المسام تصغر و الدهون تختفي. فيه شوي شد على البشره لما تستخدمينه لكن من الماسكات اللي تشوفين فايدتها على بشرتك. بعد ما تحطينه بشرتك تكون صافيه اكثر. احب استخدمه المناسبات الكبيره عندي. 

Collection Lasting Perfection Concealer

كونسيلر كثير بولقرز بريطانيات يتكلمون عنه ويفضلونه على كثير كونسيلر غاليه او هاي اند. وهالشي خلا عندي فضول استخدمه. خصوصا ان سعره جدا رخيص و الوانه بعد محدودة. مع استخدماي له حبيت فيه تغطيته الكامله للهالات السوداء تحت عيني. احب قوامه لانه مو خفيف مره و ف نفس الوقت يجلس على الجفن السهره كلها او وقت الاستخدام كامل. ما يجلس على الخطوط الرفيعه. ولما اقول يخفي العيوب فهو فعلا يخفيها !! والاحلى من سعره هو انه مقاوم للموية و ماراح يطبع على ملابسك. عندي ينافس كونسلر نارس واللي ما استغني عنه. 

Too Faced Born This Way

كريم اساس لي شهور استخدمه وجدا حابته لتغطيته المتوسطة الى الكاملة و ثباته على البشره. مخصص للبشرات الدهنيه و المختلطة. اعتبره ثقيل شوي لذلك الاحظ افضل شي ادمجه بالبيوتي بلندر عشان يعطي تغطيه كامله وما تكون cakay. الدرجات اللي فيه طبي وتخيري وهذا شي جدا مريح. خالي من الزيوت ويعطي منظر مخملي للبشره وتقدرين بضغطه وحدة يعطيك تغطيه ناعمه وخفيفه. متوفر في سيفورا. 

Beeline Lip Care Flavour Free

تحديدا هذا المرطب اللي كل ما يخلص ارجع اشتريه. لدرجة اني نسيت هذي اي علبه عندي. انا شفايفي تتقشر و مهما شربت موية فهي جدا جافه وتتحسس بسرعه. بدون اي مدح قررت اجربه لانه خالي من العطور ويهدي البشره الجافه. من لما استخدمته لاحظت الفرق في شفايفي. احطه وقت النوم اصحى القى شفايفي موردة مليانه و مافيه اي قشور زي باقي مرطبات الشفايف. اللي تعاني مثلي انصحها تستخدمه. اخذته من السوبرماركت. 

Nars Pure Matte Lipstick - Tokin

مقدر اتكلم عن عشقي لها الروج عندي منه حبتين زيادة جست ان كيس خلص !… هالدرجة تحديدا مره ناسبت درجة بشرتي و استخدمه مع او بدون ميك اب. هو مطفي و اللون لحمي غامق شوي ورجعت له مع رجعت الشتاء و حبي له كل ماله يزيد. مع انه مات لكن ما احسه يجفف الشفايف و اتمنى اجرب درجات اكثر من نفس الروج لانه يجلس فتره طويلة و لانه يحتوي على الفيتامين اي يعطي ترطيب في نفس الوقت. 

وانتوا ايش حابين هالفتره من مكياج وعناية بالبشره، شاركوني اياها عشان اجرب معكم ♥♥

واذا عندكم اي سؤال تقدرون تتواصلون معي تحت او ف اي مكان، ولا تنسون تتابعوني على سناب المدونة انزل فيه نزلاتي للسوق و المطاعم و اي شي من يومياتي 

فمان الله ♥♥♥

WHEN YOU KNOW ME YOU WILL LOVE ME

SmashBox Brow Tech Stick Review || 2016 Purpleita

السلام عليكم ، كيفكم ؟

سبق ونزلت كيف اسوي حواجبي و تكلمت عن الادوات اللي كنت استخدمها. لكن هالمرة حابه اتكمل بتفصيل اكثر بخصوص الادوات و كيف انا اسوي حواجبي. 

حواجبي اول شي ما هي مصبوغه او كثيفه، خفيفه نوعا ما ويسهل علي رسمها. 

لكن احب انظفها وارسمها بطريقة مرتبه بالليزر، اسويه كل شهرين عند عيادة عبدالعظيم البسام. احب اسوي تشقير بالليزر لانه يجلس فترة اطول و حتى لما يروح التشقير يكون مرتب مو مثل لما اشقره بالطريقة الاعتيادية، وهذا رأيي الشخصي واتمنى احترامه. 

انا التنظيم الوحيد هو في نهاية الحاجب من تحت فقط الحمدلله يعني ماهي متعبه في الرسم او التشقير. 

الحين نروح للادوات اللي استخدمها. لي فتره طويله ما استخدم غير قلم الحواجب من سماش بوكس وهو يعتبر دايما الخطوة الاولى او الوحيدة. 

تفاصيله:

الاسم: Brow Tech Gloss Stick

السعر: 21$

الموقع: هنا

الدرجة: Brunette

اللي في الصورة هو قلوس يعني فيه لمعه خفيف يعطي منظر قلوسي للحواجب وعندهم مات نفس القلم. انا لي فتره استخدمه وفعليا من بديت استخدمه والكل لاحظ الاختلاف في حواجبي كيف هي طالعه نظيفه اكثر ومرسومه بطريقة مرتبه وطبيعيه اكثر !

ومن يومها وانا كل ما خلص اشتريه لاني استخدمه بشكل يومي ولا لاحظت عليه تساقط لشعر حواجبي. 

الخطوة الثانية هي اذا حسيت لازال فيه فراغات او حابه اطفي القلوس اللي في حواجبي استخدم بودرة من باليت naked basic من اربن دكاي. لي سنين استخدم هالدرجة وشوفو كيف من حبي لها وصلت للاخير خخخخخخخخخخ. احب فيها ارتب و اثبت القلم بشكل اكبر. وانا الحمدلله حواجبي ما تتحرك من مكانها او تنحاس ف مريحتني في هالموضوع. 

ثالث واخر خطوة هي ماسكارا الحواجب. وللامانه ما استخدمها كثير اذا صرت رايقة و مشتهيه ادلع حواجبي استخدمها لكن لي فتره من شريت قلم الحواجب من سماش بوكس وانا شبه متوقفه عن استخدامها. بس احب استخدمها في بداية حواجبي عشان ارفع واثبت شعيرات الحواجب اللي في البداية يعطي منظر حواجب طبيعيه وكانها محيوسة شوي و كثيفه شوي “وهذا الاتجاه للحواجب هالفتره”. 

وبس 

انتوا ايش الادوات اللي تستخدومها في رسم حواجبكم؟ وفيه قلم معين حابيني اتكلم عنه؟

ياليت تكتبون لي ردودكم تحت يسعدني اني اعرف ايش تحبون وكذا ^^

فمان الله ♥♥♥

WHEN YOU KNOW ME YOU WILL LOVE ME

Review: Charlotte Tilbury's Filmstar Bronze & Glow

مساء/صباح الخير بنات 

كيفكم اليوم ؟

تدوينة اليوم راح تكون تقرير كامل عن باليت البرونز+اضاءة من ماركة شارلوت تولبري. واذا كانت اعجبتني او لا. 

معلومات :

الاسم: FILMSTAR BRONZE & GLOW

السعر: ٤٩ باوند

الموقع: هنا

تجربتي:

اول شي انا اخذتها لاني سمعت مدح كثير على تقريب جميع منتجات وادوات التجميل من خبيرة المكياج شارلوت. وحتى الباكجنق او التعليب حق اشياءها تفتح النفس و طريقة تغليفها و اكيسها اخر دلع. تحسين كل منتج مفكرين فيه ومتعوب عليه. 

هالباليت تحتوي على برونزر و هايلايتر و معها مراية كبيره. العلبه نفسها جدا انيقه وجميله وتنفع للتصوير وكذا واللون النحاسي هو الغالب على علب منتجات ومكياج شارلوت. 

بالنسبه للمكياج نفسه، حابتها كثير اول شي راح اتكلم عن البرونزر:

خفيف وناعم ومو معناه انه ما يبان معك بالعكس لما تحطينه يطلع على البشره بطريقة جدا جميله، وفعلا برونزر يعطي منظر صحي و مشع للبشره كان الشمس ضربتها على خفيف، لمسه حياة. مهما حطيتي ما تحسين انك حطيتي كثير او كثرتي او تخافين لما تحطين الفرشه عليه بالعكس مريح جدا و ينفع للدوام و الاستعمال اليومي وحتى لو اني حابه تحطين شي خفيف على خدودك يبرز التان او يعطيك منظر صحي لخدودك.

الاضاءة جدا ناعمه ما تقارن طبعا بماري لو او شامباين من بيكا، هذي تنفع لاستخدام يومي و تجمل عظمة الخد بذريقة جدا انيقه ونظيفه احسها تنفع بعد للي بشراتهم دهنيه وحابين يحطون لمعه بس متخوفين من الموضوع، هي راح تعطيك الاضاءة الناعمه اللي تبحثين عنها للدوام او لما تطلعين في الشمس. 

احس كل الاثنين يناسبون جميع درجات البشره و حتى انواعها. ويكفي انها خالية من البربان و الكمية اللي فيها جدا كثيره وتجلس معك عمر. 

بالنسبة لي حابتها كثير وكثير اخذها معي في شنطتي او سفراتي لانها تعطي منظر نظيف ومنعش وما تحسين انك تتعبين في الدمج او الوضع نفسه. 

قد جربتوا مكياج من شارلوت تلبوري ؟ وايش الاشياء اللي حبيتوها منها؟

اذا عندكم اي سؤال او اسفسار او حتى اقتراح تقدرون تتواصلون معي تحت او في السناب و التويتر 

فمان الله ♥♥♥

WHEN YOU KNOW ME YOU WILL LOVE ME

LOreal Paris Infallible Matte Foundation Review | 2016 Purpleita

السلام عليكم، كيفكم؟

اليوم راح اتكلم عن اكثر فاونديشن بسعر مناسب حسيته ينفع للبشرات الدهنيه و المختلطة. 

واستخدمته كثير في الصيف. 

مثل ما انتوا عارفين انا بشرتي مختلطة وعندي مسام في منطقة الانف يعني التي زون عندي دهنيه. ولكن باقي وجهي جاف. شفت افضل طريقة لي او تناسبني اني استخدم كريم اساس للبشرات الدهنيه على التي زون وباقي وجهي كريم اساس خفيف. عشان ما اكتم وجهي بشكل كامل. 

بالنسبة لها الفاونديشن :

الاسم: Infallible 24H Matte Foundation 

مكان الشراء: صيدلية بوتس
الدرجة: هوني - ٠٣

اول شي سعره يعتبر رخيص ، والدرجات اللي فيه قليلة ماهي كثيره. واكثر شي حبيته انه فعلا يغطي المسام ويتحكم في الدهون في البشره ويدوم على الوجه فترة ممتازة. انا احطه باستخدام البيوتي بلندر ولا احط فوقه الا بودرة سائبة وعلى الانف بس عشان يدوم ثباته واخفائة لمسام الوجه. لانه ثقيل ينفع تحطين منه كمية بسيطة وراح يكفي ويغطي المناطق اللي انتي حابه تخفينها بشكل كامل. لي فتره استخدمه وجدا مرتاحة معه وحابته. ومن المفترض انه ضد الموية و التعرق وانه يدوم معك ٢٤ ساعه. بصراحة ما احس فيه اي بنت حابه الفاونديشن يكون على وجهها ٢٤ ساعه. ولكن هو فعلا مثل ما ذكرت يجلس فتره طويلة على البشره. 

وهذا اللي في فتره الصيف استخدمه للتحكم في الدهون و لثباته على الوجه فتره طويلة.

فمان الله ♥♥♥

WHEN YOU KNOW ME YOU WILL LOVE ME

كريم اساس نارس شير قلو للبشره الجافه #بربليتا || Nars Sheer Glow Foundation for dry skin #purpleita

السلام عليكم ، كيفكم اليوم♥؟

تدوينة اليوم راح تكون تقرير كامل عن كريم اساس من نارس♥♥. 

تفاصيل عنه:

الاسم: Sheer Glow foundation 

الماركة: نارس

مواصفاته: يعطيك منظر صحي مع نهايه مخملية للبشره. صالح للبشره العادية الى جافه (غير صالح للبشره الدهنيه),يعطي منظر ناعم للبشره و خفته تقوم بترطيب البشره. 

مكان الشراء: سيفورا(دبي)

تجربتي:

اول شي اذا انتي بشرتك مايلة على صفار راح يناسبك 

اذا انتي بشرتك شاحبه ، مجهده، فيها جفاف راح يناسبك

اذا تحبين منظر الديوي و الصحي راح يناسبك 

كل هالاشياء لقيتها في كريم اساس نارس شير قلو♥. حبيته كثير♥♥ واستمتع كثير لما احطه،

 يعطي تغطيه متوسطة الى عاليه♥، قوامه كريمي على سايل.

احبه لانه يعي منظر جدا صحي و اضائة للوجه لدرجة انك تشوفين انعكاس النور على عظمة الخد♥♥♥♥♥♥ !، وباقي الاماكن عادي.

هالشي انا جدا احبه فيه، وتقدرين تبنين التغطيه حقته. والشي الحلو فيه اني احسه يرطب البشره وما يخليها جافه♥. وهالشي مره يشفع له عندي. واذا بشرتك مافيها حبوب او اثار كثير حرام تكتمينها بكريم اساس ثقيل. عشان كذا افضله على غيره من باقي الماركات.

بالنسبه لي هو اثقل من كريم اساس شنيل (فايتا لوميير) واللي هو جلس سنين على عرش المفضلات عندي♥. صرت ما استخدمه بكثره من بعد ما شريت هالكريم الاساس من نارس. وراح اكتب مقارنه بينهم قريب لانهم كلهم هدفهم واحد. اللي هو تغطيه متوسطة مع نضاره و اضائة للوجه♥. 

احب استخدمه اكثر شي بالبيوتي بلندر احسها اكثر شي يناسب استخدم لهالكريم اساس بالذات♥، جربت مع الفرشة ما ضبط لكن مع سفنجة رطبه و الطبطبة يطلع flowless♥♥♥ ! 

الشي الوحيد اللي ما احبه فيه هو انه مافيه عصار او ضغاط لازم اصب شوي منه علي يدي واحيانا ينزل اكثر من اللازم و يبهذني بها الموضوع. لكن غير كذا حبيته كثير وفهمت الضجة اللي كانت واتواقع مازالت عليه. اتمنى ترجع ماركة نارس عندنا لان كثير اشياء عندهم احبها :(. 

من فيكم قد استخدمت فاونديشن نارس ♥؟ وهل حبيتيه ؟

اتمنى تعطوني رايكم باختلاف البشرات ^^♥

واذا عندكم اي استفسار يسعدني تتواصلون معي ♥

وبعد اذا عندكم اي موضوع حابين اتكلم عنه ياليت تخبروني 

فمان الله ♥

WHEN YOU KNOW ME YOU WILL LOVE ME

what's in my makeup bag #purpleita

السلام عليكم ورحمة الله وبركاته، كيفكم اليوم مع البرد♥؟

احس هالايام امر بمرحلة خمول مع مخي و الافكار ف اللي عندها افكار او مواضيع حابه اني اتكلم عنها ياليت تكتبوا لي في التعليقات تحت ♥^^.. 

تدوينة اليوم عن ايش اشيل معي في شنطة الميك اب حقتي.. ومن الحين اقول لكم كلها او اغلبها ارواج “^^. 

الشنطة هذي جتني هدية من سيفورا مع ميني سامبل لاشياء من كلارنس. حبيت حجمها وشكلها وقلت اصير احط فيها الميك اب اليومي ارتب. 

ولانهم اكثر شي حبيت اتكلم عن الارواج اللي عندي في الشنطة اول شي. كلها الوان ترابيه ونود♥♥. لان في الميك اب اليومي افضل هالدرجات، تحسون كاني اعطيكم خيارات من نفس الدرجة او ما يقاربها. 

من اليمين :

• روج من ماركة سيفورا♥، من الارواج اللي احبها كثير ترطب ومات وتعطيك البجمنت من اول طبقه. الوانها غالبا حلوة ومايله على بني او ترابي او الدرجة البنفجسي الفاااتح. 
• روج من ماركة افنان الباتل، جدا جدا جميل ♥ حبيته من ناحية القوام و البجمنت، واللون رائع. لكن الشي الوحيد اللي مضايقني شوي هو اول ما تحطينه تحسين فيه ريحة بلاستيك لكن ما تطول معك. اللون جدا رايع وعلى الموضع ٠٩ رقمه. 
• ثالث روج من اتش اند ام♥، من الالون اللي تتغير حسب لبسي ومزاجي، هنا على مشمشي وقد تكلمت عن مدى اعجابي بارواج اتش اند من ناحية القوام و الثبات هنا. 
• اخر واحد من نيكس من الارواج اللي احبها فوق الروج الاساسي♥، يعطيه مات فنش و الريحة حقت المات من نيكس لذيييذة جدا!
• واللي نسيت اصوره مع المجموعة هو قلم محدد الشفايف من ماك. من اكثر المحددات استخداما عندي♥♥♥. فعلا احسه من اساسيات كل بنت تحب الميك اب لازم يكون عندها هالمحدد. 

بعد كذا البودرة من مايبلين♥، احبها لان تغطيتها عاليه ومع شوي موية تكون اقرب للفاونديشن، احيانا اذا مستعجلة احطها هي لحالها، احب اخذها معي في الشنطة لان فيها سفنجة ومراية تحت البودرة. 

كونسيلر غارنييه♥♥♥، الكونسيلر اللي ف الشنطة لانه خفيف وكريمي و ينفع للاستخدام اليومي، ما يعطي تغطيه عاليه ابدا، لكن يؤدي الغرض خصوصا في الجامعة او الدوام وكإستعمال يومي. 

واللي نسيت اصورها لحالها هي ماسكارا بنفت اللي هي اشهر من نار على علم♥. هالماسكارا مهما شريت ارجع بعد فتره اشتريها مره ثانيه. احبها كثير لانها تعطي رموشي طول وتفرقها لي بشكل رائع. 

وشي ما استغني عنه في مكياجي هو الكحل السايل وهالقلم من برجوا سهل لي حياتي بشكل كبير♥. عندي منه ف الشنطة و في درج الميك اب لانه شي اساسي في حياتي. مع اني افكر اجرب كحل غيره ف اذا عندكم اي قتراحات ياليت تكتبوا لي تحت. 

واخر شي انا ماني راعية بلشر ابدا. لذلك من الاساسيات في شنطة الميك اب هو البرونزر وهذا من نارس اسمه كازينو جدا جميل وخفيف كذا تشوفونه ف العلبه تحسونه افر، لكنه خفيف ف الحط وفيه لمعه بسيطة تعطي البشره منظر صحي وجميل. 

وبس تدوينة سريعه وسط الاسبوع. اتمنى اعجبتكم. 

وانتوا ايش تحطون في شنط الميك اب حقتكم ؟ ش الشي اللي مستحيل تطلعين من البيت من الميك اب بدونه ؟

فمان الله ♥

WHEN YOU KNOW ME YOU WILL LOVE ME

Review on Dior show Extase Mascara #Purpleita || تجربتي لماسكارا ديور #بربليتا

السلام عليكم ، كيفكم اليوم ؟ وكيف خميسكم♥ ؟

من اكثر الاشياء اللي احب اكتب عنها في المدونة و احب اجربها هي الماسكارا♥♥.

وقبل فتره شريت ماسكارا جديدة وحبيت تكون هاي اند يعني مو من الدرق ستور او الماركات اللي موجودة في الصيدلية ، كنوع من التغيير لاني كل ماسكارا عندي لها مزاج (شلون ما ادري) لكن فعلا افرق بينها وبين استخدامتها ومزاجها. 

ما اطول عليكم ، تدوينة اليوم هي عن تجربتي لماسكارا ديور. بصراحة يوم شريتها ما سالت عنها ابدا ولا بحثت عنها دخلت سيفورا و سالت ومدحوا لي هذي تحديدا. خلونا نبدا بالتفاصيل و رايي فيها:

الاسم: Dior show Extase Mascara

الماركة: Dior

مكان الشراء: sephora 

السعر: حدود الميتين ..

الموقع: هنا

تجربتي: 

التغليف جدا جدا انيق♥ وثقيل تحسون انها تصلح معروضة على التسريحة لحالها كذا جدا انيق واحلى و اشيك من الفضية او السوداء. 

الفرشة : كبيره وكثيفه لحالها تشيل كمية من جل الماسكارا وشكلها الملتوي “لولبي” يعطيك توزيع متساوي مهما عدتي عليها وحطيتي منها على الرموش♥♥.

بصراحة اول ما استخدمتها ما اعجبتني، لكن ثاني مره حبيتها كثير. تعطيك رموش انيقه ♥ ! .. شلون رموش انيقه ؟

 يعني تحسونها تعطيك الحجم المناسب لرموشك ماهي متكتله او متفرقه مثل رجول العنكبوت. بالعكس مثل ما تشفون الرموش في دعايات الماسكارا في التلفزيون كذا رموشك راح تصير. متفرقه ومرسومه تحسينها واكثر شي اقدره فيها انه مهما عدت على الرموش وحطيت عليها ما تتكتل معي او يكون فيه كتل في اطراف الرموش♥♥.

 وترفع لك اياها من اصغر وحدة لاطول وحدة. وماهي ثقيله او تجف وتيبس معك. جدا حبيتها واحس اني اذا استخدمتها ادلع رموشي. قريت انه فيها مواد مفيدة للرموش لكن ما ادري. على العموم جدا جميلة واضافة حلوة للي يحبون يجربون في الماسكارات اكثر شي. و العصى حقت الفرشة نفسه طويله ف ما تحسين ان يدك ثقيله وتحطين اكثر من المطلوب. ضد الموية وتجلس معك ساعات طويلة. احسها ما تناسب مناسبات كبيره مره اذا رموشك جدا قصيره. يعني تنفع للاستخدام اليومي. لكن بصراحة ما استخدمها كل يوم، عندي غيرها افضل اني استخدمهم لكل يوم. احس التركيز لما احطها هو انه تكثف وتطول الرموش اللي في نص العين من الاطراف. وحابتها تعطيك منظر طبيعي وكان رموشك كذا طويله. عشان كذا حسيت اني اوصفها “انيقه”♥♥♥. 

وبس اتمنى التدوينة السريعه فادتكم واذا فيه اي سؤال او استفسار تقدرون تتواصلون معي تحت ♥

قد جربتوا ماسكارا من ديور غير هذي ؟ او اذا جربتوها وش رايكم فيها ؟ هل تحسون تسوى سعرها او في الصيدليات فيه خيارات افضل ؟ اكتبوا لي رايكم وتجاربكم تحت لان يسعدني اني اقرا تجاربكم ♥

فمان الله ♥

WHEN YOU KNOW ME YOU WILL LOVE ME