تنسيقات لفصل الربيع مع #بربليتا || spring outfits by #purpleita

السلام عليكم 

كيفكم ؟

توني فرحانه بنفسي اني صار لي اسبوعين انزل كل اسبوع بوست بس ما قدرت الا اني اتاخر لان الفوتوشوب ومشاكله :(

اهم شي اني قدرت انزل اليوم تدوينه ممكن مبكره فيها لكن وانا اصورها احسها تجيب لي السعاده من الالوان اللي اخترتها 

هي كانت ف البدايه كيف تنسقين بنطلون واحد بثلاث طرق 

لكن حسيت بعد ممكن تساعدك وتعطيك افكار انك تتشجعي بالالوان الفاقعه و النقشات المختلفة 

وللتنبيه ذوقي ممكن يختلف عن ذوقك وما يعجبك و ف النهايه هي ايحاء لك او طريقه تساعدك انك تتشجعين ف التنسيق وما تكونين مقيده نفسك بشي واحد معين ^^

اول تنسيق مره صيفي لكن تقدرين تلبسين فوقه بلوفر اسود او بوي فرند جاكيت ابيض $ـ$

البنطلون هو الاساس ف التنسيقات .. حبيت احط فوقه بلوزه خفيفه من اللونين الابيض و الاسود , حبيت اللرسمه اللي فيها مخليتها فرايحيه و ماهي رسميه مره . وبعد ان فيها رسمه + مخططه من ورا بالابيض و الاسود كسر
 حدة فقاعة اللون البنطلون ، حبيت تفاصيل الدانتيل مع الشيرت وخفته 

قررت البس معه كعب قصير اسود و اكسسوار خفيف
لان تقدرين تضيفين اي نوع من الاكسسوار بس انا احب البس ساعه مع اسواره ، وبعد الحلق من forever21 
الكعب : زارا 

ثاني طله لطلعه خفيفه و زياره سريعه للاهل و الصديقات 

القميص اساسا اخذته للبنطلون من فور افر٢١ ، واللي خلاني اختاره هو الاشكال اللي فيه فيه منها نفس اللون اللي ف البنطلون مع باقي الالوان اللي تعكس فرفشه 

واحلى شي من ورا الفتحه لان من قدام تحسون رسمي و عادي لكن من ورا بووم فيه شي ثاني وانه مو رسمي مره ^^

حبيت البس معه شوز خفيف ويكون اللوك مره بسيط و مريح لكن اذا حابه تقدرين تلبسين معه كعب نود 
الشوز : forever21

اخر طله هي بالنسبه لي الطله المفضله عندي $ـ$ وتعتبر اكثر وحدة مناسبه لجمعات اكبر شوي ، و احس اللي قبل صحيح فيه دمج بين اللون الفاقع و الاشكال الملونه ، لكن هذي حتى النقشات كبيره وفاقعه $ـ$

والكيمونو للحين موضتها مستمره ، وبالنسبه لي احب الكيمونو حقت اسوس ، وهذا تحديدا من موقع اسوس 
تحته تقدرين تلبسين توب ابيض سادة 
لكن لاحظي كيف الورود نفس لون البنطلون من نفس الدرةه تقريبا ، لكن اللي احب اقوله انه لا تخلين الالوان الفاقعه او النقشات الكبيره تخوفك جازفي ممكن تلقين ان الطله كلها تعجبك $ـ$

انا احب البس مع هاللبس تحديدا عقد كبير او واضح ، وهالعقد و الحلق من forever21 و معها كعب نود لان ما احس الطله تتحمل الوان زيادة
ولان القطعه اللي تحت الكيمونو بدي ابيض 


وبس 
ان شاءلله هالبوست فتح نفسكم للبريع و الجو الجميل اللي نمر فيه هالفتره استمتعوا فيه وخلوا الاصواف خخخخخ :$
وشوي شوي دخلي الوان فرايحيه في لبسك وطلتك 
و فعلا استمتعت وانا اصور هالبوست لان الالوان تجيب السعادة $ــ$
اي سؤال او اسفسار تقدرون تتواصلون معي تحت 

فمان الله 

WHEN YOU KNOW ME YOU WILL LOVE ME

all about brows #purpleita || كيف اسوي حواجبي #بربليتا

السلام عليكم ورحمة الله وبركاته 

كيفكم ؟ ، ان شاءالله مرتاحين ومبسوطين بالزياده خخخخ :$

الله يبارك لكم فيها .. تدوينة اليوم عن الحواجب وما ادراك ما الحواجب ، اول شي حابه اقول عن انا كيف احب حواجبي تكون ، احبها تكون طبيعيه شكلها ومب كانها بلكه فوق الراس حتى التقوس حقها يكون طبيعي قدر المستطاع ، دايما الميك ارتيست الاجانب يقولون ان البنت المفروض تتبع الشكل الطبيعي لحواجبها و شعيراتها و بعد لازم نستوعب ان الحواجب خوات يعني مستحيل يكونون مثل بعض بشكل كامل ١٠٠٪ وان صاروا ف هالشي بيعطي منظر مصطنع .

احب اقول اني اشوف الحواجب شي شخصي جدا وكل وحده وطريقتها ف رسم حواجبها ايش يناسبها 

اول شي لازم اقول نوع حواجبي .. الحمدلله حواجبي مرتبه وما شقرتها الا مؤخرا و التشقير انا اسويه ولا اصبغها 

حواجبي سخيفه نوعا ما ف احب اعبيها "شوي" ما اكذب احيانا اتحمس خخخخخ بس بشكل عام احب اتتبع الشكل الطبيعي للحواجب ، مثال على كلامي حواجب بيونسي $ـ$

الحين ننتقل للادوات اللي استدخمها لرسم حواجبي ..

اول شي بالفرشه المشطوفه حقت الكحل + باليت الحواجب من الف اقوم بتعبية الحواجب بالجل اللي جاي مع الباليت 

فيه منه درجات كثير و كل وحدة تشتري درجة حواجبها 

بالنسبه لي اخذت غامقه شوي لان حواجبي غامقه 

اعبيها بشكل خفيف بالفرشه بالجل بعدين اعيد عليه بالبودرة 

ليه ؟ لان الجل يكون مثل الصمغ يمسك ويثبت البودرة مكانها 

برغم رخصه لكن حبيت هالباليت من الف تعدد الدرجات و سهولة الرسم بالجل او البودرة يسهل علي اني ارسم حواجبي بشكل سريع . 

احيانا كثير اوقف هنا وخلاص لكن لان شعر حواجبي بعضها طويل وممكن تتحرك او تنحاس 

هنا استخدم ماسكارا حواجب وفيه ماركات كثير مطلعتها 

لكن انا افضل حقت بنفت لانها صغيره ف تسهل عليك انك تثبتين الاماكن الصغيره (مثل زاوية الحواجب ) وراح تثبت لك كل شغلك وتعطي لون جميل $ـ$

العمليه ماراح تاخذ منك وقت ط،يل اذا عرفتي كيف تتعاملين مع حواجبك ، انا ما احب الحواجب القاسيه اللي تحسينها مرسومه بالقلم ، حلاتها يكون فيها شوي شعيرات و طبيعيه شوي :$ طبعا هذا رايي الشخصي خصوصا اني انا بطبعي احب كل شي طبيعي :$

وبس ان شاءلله هالتدوينه افادتكم شوي 

وقريب راح انزل كل شي عن منتجات الف اللي جربتها 

بس لانها كثيره يبي لها مزاج خخخخخخ ..

اذا فيه اي سؤال او استفسار تقدرون تتواصلون معي تحت 

فمان الله 

WHEN YOU KNOW ME YOU WILL LOVE ME

review on 'Better than Love' mascara with #purpleita || تجربتي لـ ماسكارا من تو فيسد #بربليتا

السلام عليكم 

كيف الحال ؟

تدوينة اليوم عن تجربتي مع ماسكارا جديدة ، هالماسكارا تحديدا سمعت كثير اجانب يستخدمونها و يمدحونها 

بصراحه بشكل عام حابتها بس عندي ملاحظة وحدة عليها . 

معلومات عن الماسكارا 

الاسم : Better than love mascara

السعر : ١٣٢ تقريبا 

الماركه : تو فيسد - سيفورا 

تجربتي مع الماسكارا :

اول شي حبيتها لانها رطبه انا ما احب الماسكرات الجافه مره لانها تنشف بسرعه ، و الشي الثاني اذا انتي تبين رموش كثيفه و doll like lashes 

يعني رموش كثيفه متفرقه و تحسين ان فيه فرق شاسع بين رموشك قبل وبعد الماسكارا . 

احبها لان صدق كأنك مركبه رموش ، وتوسع العين بشكل واضح جدا اعتبرها ممتازه خصوصا ان رموشي ماهي كثيفه او طويله فعلا ممتازه ولا تنحاس او تصير على الجفن السفلي للعين. 
حتى الفرشه تحونها كثيفه ومليانه شعيرات مما يعطي كثافه اكثر للرموش 

انتقادي الوحيد لها ان العكفه اللي تعطيها لعينك ما تطول يعني نهايه اليوم او السهره تحسين رموشك بدت ترجع لوضعها الطبيعي قبل ، مدري اذا فهمتوا او لا بس بشكل عام مشكلتها الوحيدة انها ما تطول ثبات العكفه ف العين ، غير كذا ثابته و شبه ضد المويه ، للي يحبون الرموش تكون متفرقه وكثيفه انصح ف استخدامها $ـ$

وبس ان شاءلله هالريفيو السريع افادكم 

لان انا حابتها بشكل عام ، اذا فيه اي سؤال او استفسار تقدرون تتواصلون معي تحت ^^

فمان الله 

WHEN YOU KNOW ME YOU WILL LOVE ME

مفضلات #بربليتا لعام ٢٠١٤ || #purpleita 2014 favorites

السلام عليكم 

كيفكم ؟ يالله احس اني شي قديم عن البلوق :$

بس ان شاءالله راجعة و العودة حميدة .. بعد فيه مواضيع كثير.. من اهدافي هالسنه اني انزل بوست كل اسبوع والتزم في الموعد .. وان شاءالله خصوصا هالفترة مجهزة مواضيع 

واشياء تفاعليه بيني وبينكم عشان يكون بيننا كونشكن ^^

كبداية ولو انها متأخرة شوي .. بس better late than never ;p

قلت افضل شي تكون بدايتي عن افضل الاشياء اللي جربتها في سنه ٢٠١٤ .. وبعضها اللي متابعين البلوق بيعرفرنها على طول لأني حكيت عنها كثير ف البلوق "^^

أول شي راح اتكلم عن العناية بـ ( البشره - جسم - شعر )

وبيني وبينكم بعض الاشياء ما اقدر استغني عنها ابدا :$

الاغراض :

١- ماكيديما ماسك للشعر 

هالماسك صار لي حدود ٦ شهور او اكثر وانا استخدمه ، ما استخدمه كل اسبوع صراحة ، كل اسبوعين او على حسب المزاج اذا لي خلق او لا ، لكن بكل صراحة غير شعري بشكل كبير ! اذا استخدمته اعرف ان شعري راح يعطي منظر صحي ،يعني يكون فيه لمعه، الفرق اللي حسيته ما حسيته على طول لا فجاة لاحظت بعد فتتتره انه اوه شعري صاير افضل من قبل من ناحيه التقصف و اللمعه، وبعد ما يتعقد بعد الشاور بشكل كبير ، ويسهل علي الاستشوار .. 

٢- بيور كوكنت - ليف ان كوندينشر 

هالعلبه هي ثالث وحدة لي ف السنة اللي راحت ، هو زي البلسم اللي تبخينه على شعرك بعد الشاور ، يفكك الشعر و يحميه من الحرارة ، واهم شي ريحته حلوة شي يجيب الانتعاش لمحبي جوز الهند .. عن نفسي هو شي اساسي استخدمه بعد كل شاور يكفي ان سعره رخيص وفوق ذا يؤدي الغرض انصحكم فيه خصوصا اللي شعورهم تتعقد بعد الشاور :( 

٣- فرشة التانقل تيزر 

هذي استخدمتها على نهاية السنه تقريبا لي شهر من صرت استخدمها ، من زمان وانا ابي اشتريها بس مدري اي شي عليه هايب ما اتحمس اني اشتريه ، لكن هذي تستاهل الضجة لان فعلا تمشط لك شعرك بدون ما تقطعه او تتعبك بشكل انسيابي جدا وتفكك الشعر المتعقد بدون ما تحسين انك جالسة تأذين شعرك :"( .. صحيح ماصار لي شهر استخدمها لكن تستاهل اني احطها من افضل الاشياء اللي صارت لشعري ف هالسنه خخخخخ 

٤- زبدة الجسم من بودي شوب - شيا - 

بشكل عام زبدة الجسم حقات بودي شوب لا يعلى عليها ف الترطيب و الريحة الجميلة ، لكن هذي المفضله عندي لان بشرتي صحراء قاحلة :( .. ف بسرعه يمتص المرطبات وبسرعه يجف ! بس حسيت مع شيا بتر يجلس فترة اطول وهو مترطب وخصوصا انها مخصصة للبشرات شديدة الجاف بشكل عام افضل زبدات الجسم حقات بودي شوب ليتهم بس يحطونها لنا ف علبه ضغاط اسرع للناس العجازة مثلي "^^

الحب الابدي هالاثنين اللي يعرفني يعرف ان هالاثنين هم شيين ما استغني عنهم ابدا .. 

١- بايودرما 

كلنا نعرفه ونعرف هو مزيل للمكياج لكنه خفيف جدا احبه جدا لان ما عمره هيج بشرتي خصوصا انها حسااااسه ، حاولت اجرب غيره بس هالشي الوحيد ف روتيني اللي ماني مستعدة استبدله :$

٢- مقشر اليومي من ST.IVES

هالمقشر حكيت عنه كثير في المدونه ولازلت امشي وانصح اي وحدة عندها دهون وتبي غسول يومي يتخلص من الدهون لكن ما يجفف البشره انصحها تستخدم هالمقشر ، انقطع فترة من الرياض وبغيت انهبل :| ! لان ما عمره طلع حبوب ببشرتي او سبب لها اي مشاكل ، المهم عندي منه 3 علب خخخخخخ جست ان كيس انقطع مره ثانية :$

1- عطر من جورح ارماني 

هالعطر استخدمته بس قبل 3 شهور ! واني انا لمياء شبه اخلص عطر قبل لا امل منه هذا شبه مستحيل ، So it says alot about my love for this perfume 

اعشقه جدا وريحته تجلس فترة طويله ما اعرف اوصف العطوور بس نصيحة اذا تبحثين عن عطر جميل جدا وعطر اذا حطيتيه اللي حولك بيسألونك عنه ؟ انصحك تجربينه 

٢- كريم العيون ضد التجاعيد من كيلز 

ليه اخترت هذا الكريم بالتحديد.. مع اني بكل صراحة ما اشوفه سوا شي للخطوط الرفيعه بس احبه لانه خفيف ومعناه ان المنطقة حول العين تمتصه بسهوله ، ينفع احطه تحت الميك اب وهالشي جميل جدا لان انا هالمنطقه جاافة ف يتكتل فيها الكونسيلر ، ولما ارطبها يخف التفكك او التكتل تحت العين 

بعد لما احطه قبل النوم واقوم الاحظ ان عيني ماهي منتفخة بشكل كبير 

الحين دور الميك اب ^ـ^

كان صعب جدا اني اقلصها لها العدد القليل بس فكرت ف الاشياء اللي اروح لها ف كل مرة احط ميك اب خصوصا الميك اب اليومي ..

اول شي فاونديشن و الوكنسيلر 

بالنسبة لليومي ما استخدم الا 

١- فوتوديرم من بايودرما 

هو واقي شمس ١٠٠spf ومع لون مايل على التان 

احبه اكثر شي واذا انا مستعجلة على طول استخدمه لآنه بيعطيني تغطيه جميلة ، حماية من الشمس ، وشوي ديوي بمعنى منظر صحي خصوصا على عظمة الخد $ـ$

تقريبا ما استخدمت الا هو ككريم اساس يومي ف السنه هذي :$ وهذا يدل على مدى حبي له 

٢- كريم اساس شانيل فاتالومير

اللي في الصورة هي علبه جديدة القديمه خلصت ، في السهرات ما استخدم الا هو احبه لانه خفيف وممكن يعطيك تغطية كاملة اذا حطيتي كذا طبقه ، واحب فيه انه يرطب البشره وما احس ان بشرتي مشدودة او جافه لما احطه ويعطي دوي لوك ، انصح فيه للبشرات الجافه اما الدهنيه ما احس بيناسبكم ، بس بشكل عام انا بيق فان بكريمات اساس شنيل <333

٣- كونسيلر فت مي من مايبلين 

الكونسيلر الممتاز لتغطية اثار الحبوب و كهايلايتر تحت العين 

عندي منه درجتين وحدة فاتحة و الثانية اغمق ، احبه مرررة وشبه متاكدة انه يشابه قوام كونسيلر نارس ، عموما ممتاز جدا وكريمي بشكل لكن احسه يثبت بسرعه ف احاول ادمجه قبل لا يثبت ، غير كذا تغطيه ممتازة ولا يجفف المنطقه . 

مناكير ريفلون $ـــ$

ويني عنهم من زمان جميلة جدااا انا ،قعت في غرام العلبه 

مرة انتيك وكيوت ، وفوق ذا كله الوانها تسطل $ـ$

اخترت هاللون لان كلنا نعرف ضعفي للعنابي ودرجاته :$

بس فعلا حبيتها وصارت هي اللي اختارها لما ابي احط مناكير 

الحين دور الارواج هالسنه كانت سنة المات بالنسبة لي من جميع الماركات صحيح اني احب مات ماك لكن فكرت ف اكثر شي استخدمته وكانوا هالنوعين 

١- ميك اب فور افر ارواجهم المات 

عندي كذا درجة وكلها اكثر من رائعه تجلس معك طول اليوم لكن هي مااات فعلا ف انصح بترطيب الشفايف قبل استخدامها ، احبها واحب الوانهم اللحميه و المايلة شوي على عنابي وقريب راح انزل بوست عن مكياجي اليومي لفصل الشتاء وراح اتكلم باسهاب اكثر عنها 

٢- ريفلون كولور بيرست - المات - 

ما حبيت اللي فيها لمعه ابدا ، لكن المات منها تجنن خصوصا الاحمر و الوردي ، هي مات وتجلس فتره طويله على الشفايف احبها لانها بسرعه تحطينها بدون ما تفكرين وفوق ذا فيها ريحة نعناع اول ما تحطينها على شفايفك بتحسين بها تقرص شوي بعدين يروح ، حتى بسرعه تخلص لكن اعتبرها البديل الرخيص لارواج ميك اب فور افر و ماك ولا هي اقل فعاليه منها 

اشياء مختلفة في الميك اب حبيتها :

١- البرونزر من H&M

احبه كثيييير فيه شمر او لمعه لكن ماهي ذيك القوية و الدرجة نفسها حلوة جدا استخدمه بشكل يومي وصار بديل عن الحب القديم اللي هو برونزر برجوا ، العلبه كبيره و يكفيك منه كمية بسيطة ، فيه منه درجتين انا اخذت الافتح ، ملاحظتي عليه هو انه ما يجلس طول اليوم في الوجه ف استخدم قبله بودرة وبعدين هو عشان يثبت ، لكن بشكل عام اشوف اني استخدمه اكثر من باقي البونزرات اللي عندي 

٢- كحل سايل من برجوا : 

هالسنه كانت سنة الاقلام السايله ، لكن هذا اكتشفته قبل شهرين وكان جميل جدا يعني هو على شكل قلم بس اللي يميزه عن باقي اللي استخدمته انه اسووود وماهو باهت او يقطع وانتي ترسمين ، حتى من بعد ما استخدمته لاحظت كثير يسالوني عن نوع الكحل اللي استخدمه :$

ويسهل عملية رسم الكحل الكات اي للمبتدئات ، ومن الحين اقول له شهرين وللحين ما نشف مثل باقي الاقلام او حتى خربت السفتجة حقته $ـ$ ، صارت عملية رسم العين اسهل واحلا 

٣- الف شدوا وجل الحواجب 

من فترة شريت كمية من ماركة الف كتجربه بعضها كان فشل وبعضها كان ناجح جدا ، لكن هالشي تحديدا كان ناجح وبقوة اول شي فيه درجات كثير تختارين منها و بعد فيه بودرة وعلى شكل جل مضغوط ، بشكل عام تركت باقي الاشياء اللي كنت استخدمها لحواجبي من ماسكرا حواجب لبودرة وصرت ما استخدم الا هذا فعلا بطل وحبيت صديقتي اللي شجعتني اخذه لانه ممتاز 

٤- فرشة من الف 

هالفرشة تحديدا اكثر من رائعه شكلها يسمح لي اني ادمج الكونسيلر تحت العين + اسوي كونتور للانف بشكل افضل 

ما توقعت على رخصها راح احبها ، لانها تدمج لي الكونسيلر بشكل ممتاز واحس لانها صغيره ومليانه شعر وبشكلها هذا يسهل علي الدمج في الاماكن الصعبه 

انصح فيها خصوصا سعرها الرخيص ^^

وبس ، اذا فيه اي سؤال او استفسار تقدرون تتواصلون معي تحت ، واشوفكم بعد اسبوع مع بوست جديد ^ـــ^

فمان الله 

WHEN YOU KNOW ME YOU WILL LOVE ME

طريقة #بربليتا للتخلص من الرؤوس السوداء || Purpleita's way to remove blackheads

السلام عليكم .. 

كيفكم ؟ 

قبل فترة جتني بنت ف الاسك وطلبت مني انزل كيف اتخلص من الرؤوس السوداء , الحمدلله ماعندي كثير بس ولو مزعجة جدا وكلنا نبي نتخلص منها للأبد TT , وحبيت الفكرة وقررت انزل طريقتي وهل فعلا فادت او جابت اثر ولا لا , لأن اللي اسويه ما بانت نتايجة فوريا بالعكس اخذت وقت .. 

الرؤوس السوداء تطلع لاسباب كثير اول شي الدهون اللي تتجمع وبعد الاوساخ اللي تتجمع حول الانف .. كلها تساعد في ظهورها ف استخدام المقشر اليومي - التونر كلها تساعد , لكن فيه بعض الخطوات اللي تقدرين تضيفينها لروتينك ونوعا ما غير مكلفه تساعدك ف التخلص منها خصوصا لو كانت عندك مناسبة ;)

روتيني هو عبارة عن 3 خطوات 

الخطوة الاولى 

غسول الوجه \ Visibly Clear Blackhead Eliminating

من نيتروجينا 

سعره : 37 ريال 

اي صيدلية او سوبرماركت 

عن الغسول :

مقشر يومي للبشره يقوم بإزالة الرؤوس السوداء ومنع ظهورها لغاية 3 اسابيع . المقشر كريمي القوام ويحتوي على حبيبات صغيرة لفتح المسام والتخلص من الرؤوس السوداء و الدهون 

تجربتي معه :

كثير ناس شافت نتايج مع هالمقشر وعشان كذا كتبته هنا لان ممكن وحدة فيكم يناسب بشرتها , وبصراحة ما اعطيته الفرصة عشان اشوف هو فعلا يمنع ظهورها , بالنسبة لي من بعد يومين استخدام ما حبيته ابدا , اولا ما ازال الرؤوس السوداء , وبالعكس بعد ما استخدمه احس فيه طبقة دهنيه على الانف لدرجة اني اقوم اغسله مرة ثانية بالغسول اليومي حقي :( .. قريت مدح كثير عليه ولازم تكون مسامك متفتحه عشان فعلا يزيلها وبصراحة هالشي ما يناسبني كمقشر او مزيل يومي لكن مب معناه انه ما ناسبني ماراح يناسبك ف انصح تجربونه خصوصا ان سعره ماهو غالي , عموما انا حاولت اني اعطيه فرصه لكن بعد كذا محاولة لقيت اني ما احبه احساس الدهني اللي يتركه على بشرتي بعد غسله ما حبيته , لانه ماهو ترطيب اللي احسه , بالعكس وكان فيه طبقة دهنيه فوق بشرتي :/ .. 

عموما الخطوة الالى يفضل انك تستخدمين مقشر يومي بإمكانك تجربين هذا او تستخدمين المقشر اليومي المفضل عندك لأن مهم انك تفتحين مسامك قبل الخطوة الثانية ;)

الخطوة الثانية :

هو موية الورد , وتقدرين تشترين اي نوع او اي مصنع انا هذي العلبه اذا فضت اعبيها بموية ورد من الثلاجة عشان تكون باردة وانها بخاخ تساعد على توزيع الموية بشكل افضل 

ونتايج موية الورد على البشرة ماراح تشوفينها في يوم وليلة بالعكس انا ما بديت الاحظ الفرق في بشرتي الا بعد شهرين من الاستعمال المتواصل ..

وكلنا عارفين ان موية الورد تساعد على تصغير المسام + تورد الوجه وتعطيه منظر صحي ..

طريقتي :

كل يوم بعد ما اقشر بشرتي بالمقشر اليومي ابخ من موية الورد البارده واتركها لما تمتصها البشره ..

سهله جدا وطريقة فعاله <3 ..

ثالث خطوه :

لصقات التنظيف العميق للمسام من بيوريه 

من اي صيلدية 

سعرها : 50 ريال

معلومات اكثر :

لصقات بيوريه تتشبث بالاوساخ و تسحبها من اجل تنظيف اعمق , تحتوي على 9 لصقات للانف 

وهي ما اسويها الا مرة - مرتين ف الاسبوع اذا كنت محتاجة 

 طريقتها :

تقومين بتبليل الانف وبعدها تحطين اللزقة عليه وتتركينها من 10 دقايق الى ربع ساعه , لحد ما تجف بشكل كامل وبعد كذا تزيلن اللزقه 

تجربتي معها :

بصراحة هي اكثر شي جربته وكان فعلا فعال ف التخلص من الاوساخ و الرؤوس السوداء , وفعلا بعد فترة من الاستخدام لاحظت ان المسام نفسها بدت تصغر و الرؤوس السوداء بعد لكن لازم تستمرين كل اسبوع مرة 

واحلا شعور لما اشيل اللزقه واشوف الرؤوس السوداء كيف انشالت و الانف صار انظف , ولاحظت انها فعلا تشيل الاوساخ و الدهون من البشره , فيه منها هالنوع ونوع ثاني يسمح لك تحطينها على الجبهه .. لكن انا اخذت هالنوع لأن يهمني اني اتخلص من الرؤوس D:

وفعلا المنتج قدم ما وعدني فيه وازال \ صغر المسامات 

وبس هذا روتيني حاليا للتخلص من الرؤوس السوداء 

وان شاءلله يفيدكم , هو بشكل عام الاستمرار ف الروتين من ناحية المقشر و التنظيف العميق مرة ف الاسبوع مع الوقت راح يساعدك ف التخلص منها 

واذا عندكم اي سوال بخصوص هالموضوع تواصلوا معي وان شاءلله اقدر افيدكم 

ولا تنسون تدعموني :$

فمان الله 

WHEN YOU KNOW ME YOU WILL LOVE ME