طريقة #بربليتا للتخلص من الرؤوس السوداء || Purpleita's way to remove blackheads

السلام عليكم .. 

كيفكم ؟ 

قبل فترة جتني بنت ف الاسك وطلبت مني انزل كيف اتخلص من الرؤوس السوداء , الحمدلله ماعندي كثير بس ولو مزعجة جدا وكلنا نبي نتخلص منها للأبد TT , وحبيت الفكرة وقررت انزل طريقتي وهل فعلا فادت او جابت اثر ولا لا , لأن اللي اسويه ما بانت نتايجة فوريا بالعكس اخذت وقت .. 

الرؤوس السوداء تطلع لاسباب كثير اول شي الدهون اللي تتجمع وبعد الاوساخ اللي تتجمع حول الانف .. كلها تساعد في ظهورها ف استخدام المقشر اليومي - التونر كلها تساعد , لكن فيه بعض الخطوات اللي تقدرين تضيفينها لروتينك ونوعا ما غير مكلفه تساعدك ف التخلص منها خصوصا لو كانت عندك مناسبة ;)

روتيني هو عبارة عن 3 خطوات 

الخطوة الاولى 

غسول الوجه \ Visibly Clear Blackhead Eliminating

من نيتروجينا 

سعره : 37 ريال 

اي صيدلية او سوبرماركت 

عن الغسول :

مقشر يومي للبشره يقوم بإزالة الرؤوس السوداء ومنع ظهورها لغاية 3 اسابيع . المقشر كريمي القوام ويحتوي على حبيبات صغيرة لفتح المسام والتخلص من الرؤوس السوداء و الدهون 

تجربتي معه :

كثير ناس شافت نتايج مع هالمقشر وعشان كذا كتبته هنا لان ممكن وحدة فيكم يناسب بشرتها , وبصراحة ما اعطيته الفرصة عشان اشوف هو فعلا يمنع ظهورها , بالنسبة لي من بعد يومين استخدام ما حبيته ابدا , اولا ما ازال الرؤوس السوداء , وبالعكس بعد ما استخدمه احس فيه طبقة دهنيه على الانف لدرجة اني اقوم اغسله مرة ثانية بالغسول اليومي حقي :( .. قريت مدح كثير عليه ولازم تكون مسامك متفتحه عشان فعلا يزيلها وبصراحة هالشي ما يناسبني كمقشر او مزيل يومي لكن مب معناه انه ما ناسبني ماراح يناسبك ف انصح تجربونه خصوصا ان سعره ماهو غالي , عموما انا حاولت اني اعطيه فرصه لكن بعد كذا محاولة لقيت اني ما احبه احساس الدهني اللي يتركه على بشرتي بعد غسله ما حبيته , لانه ماهو ترطيب اللي احسه , بالعكس وكان فيه طبقة دهنيه فوق بشرتي :/ .. 

عموما الخطوة الالى يفضل انك تستخدمين مقشر يومي بإمكانك تجربين هذا او تستخدمين المقشر اليومي المفضل عندك لأن مهم انك تفتحين مسامك قبل الخطوة الثانية ;)

الخطوة الثانية :

هو موية الورد , وتقدرين تشترين اي نوع او اي مصنع انا هذي العلبه اذا فضت اعبيها بموية ورد من الثلاجة عشان تكون باردة وانها بخاخ تساعد على توزيع الموية بشكل افضل 

ونتايج موية الورد على البشرة ماراح تشوفينها في يوم وليلة بالعكس انا ما بديت الاحظ الفرق في بشرتي الا بعد شهرين من الاستعمال المتواصل ..

وكلنا عارفين ان موية الورد تساعد على تصغير المسام + تورد الوجه وتعطيه منظر صحي ..

طريقتي :

كل يوم بعد ما اقشر بشرتي بالمقشر اليومي ابخ من موية الورد البارده واتركها لما تمتصها البشره ..

سهله جدا وطريقة فعاله <3 ..

ثالث خطوه :

لصقات التنظيف العميق للمسام من بيوريه 

من اي صيلدية 

سعرها : 50 ريال

معلومات اكثر :

لصقات بيوريه تتشبث بالاوساخ و تسحبها من اجل تنظيف اعمق , تحتوي على 9 لصقات للانف 

وهي ما اسويها الا مرة - مرتين ف الاسبوع اذا كنت محتاجة 

 طريقتها :

تقومين بتبليل الانف وبعدها تحطين اللزقة عليه وتتركينها من 10 دقايق الى ربع ساعه , لحد ما تجف بشكل كامل وبعد كذا تزيلن اللزقه 

تجربتي معها :

بصراحة هي اكثر شي جربته وكان فعلا فعال ف التخلص من الاوساخ و الرؤوس السوداء , وفعلا بعد فترة من الاستخدام لاحظت ان المسام نفسها بدت تصغر و الرؤوس السوداء بعد لكن لازم تستمرين كل اسبوع مرة 

واحلا شعور لما اشيل اللزقه واشوف الرؤوس السوداء كيف انشالت و الانف صار انظف , ولاحظت انها فعلا تشيل الاوساخ و الدهون من البشره , فيه منها هالنوع ونوع ثاني يسمح لك تحطينها على الجبهه .. لكن انا اخذت هالنوع لأن يهمني اني اتخلص من الرؤوس D:

وفعلا المنتج قدم ما وعدني فيه وازال \ صغر المسامات 

وبس هذا روتيني حاليا للتخلص من الرؤوس السوداء 

وان شاءلله يفيدكم , هو بشكل عام الاستمرار ف الروتين من ناحية المقشر و التنظيف العميق مرة ف الاسبوع مع الوقت راح يساعدك ف التخلص منها 

واذا عندكم اي سوال بخصوص هالموضوع تواصلوا معي وان شاءلله اقدر افيدكم 

ولا تنسون تدعموني :$

فمان الله 

WHEN YOU KNOW ME YOU WILL LOVE ME

تقرير عن مزيل العرق من فيشي مع #بربليتا || Review on Vichy antiperspirant with #Purpleita

السلام عليكم ورحمة الله وبركاته 

كيفكم مع الحر الشديد T_T !

بما أن الجامعة قريبة ف راح انزل شبه سلسلة تخص الموضوع بطريقة او اخرى وممكن تساعدكم لين منتصف شهر 11 ^^ 

متحمسة لها مرة امس صورت حق 4 تدوينات <3 , ادري ادري ماعندي حل وسط خخخخ :$ , يا تدوينة وحدة ف الشهر يا عشر خخخخخخ , بس العام سويت سلسلة واحس كثير حبها ف قلت هالسنة اسويها بطريقة مختلفة ومتنوعه وماهي ملتزمة مرة لموضوع الجامعه .. وبعد لو ف بالكم شي معين عطوني خبر ;)

المهم .. موضوع اليوم عن مزيل العرق من فيشي , وليه قررت اتكلم عنه هو تحديدا لأني شفت فرق من استعملته 

ملاحظة :

راح اتكلم بدون اي تحفظات عشان كلنا نسفيد :$ .. ف اللي بيضاقها الموضوع ياليت ما تقرا , انا هنا افيد وانقل تجربتي بكل صراحة <3 

معلومات عنه :

اسمه : VICHY deodorant

مكان الشراء : صيدلية وايتس

سعره : تقريبا 69 ريا 

مزيل العرق من فيشي خالي من العطور و الكحول و الباربن الإتانول 

لطيف للبشرة الحساسة , ويحمي من العرق لمدة 48 ساعه 

مخصص للبشرات الحساسة او بعد ازالة الشعر 

تجربتي :

كنت متضايقة من مزيل العرق حقي , كنت استعمل دوف وبعد فترة غيرته وصرت استخدم نيفيا , لكن بعد فترة من استخدامه لاحظت انه يكتم , بمعنى انه صحيح اني اجلس يوم ما اعرق لكن اليوم الثاني نسبة التعرق كبيرة لدرجة ما احس بأرتياح , وبعد النسبة نفسها من التعرق كانت كبيرة وشي جسمي ما تعودت عليه ف وقفت ماعاد صرت استخدمه , وقررت اني اجرب مزيل عرق خالي من الكحول او العطور * هذا اهم شي عندي كان*

رحت لصيدلية وايتس وطلبت منهم يعطوني مزيل فيه هالخواص

ف اعطاني هالمزيل من فيشي , بصراحة اول ما اخذته كنت مشككة انه ماراح يعطي اي نتيجة , وخصوصا اني ما احب الرول , افضل البخاخ اكثر 

لكن بعد شهرين من استخدامه لاحظت الفرق <33 !

ايجابيات :

1- نسبة العرق تجي بشكل معتدل يعني ما احس المنطقة مكتومة او جافة بشكل كبير 

2- انا ما عندي مشكلة مع العرق الخفيف ولكن لاحظت انه اول يوم فعلا ما اتعرق لكن ثاني يوم اعرق بشكل طبيعي جدا 

وحتى لو حصل فيه عرق ف اول يوم يكون بشكل طبيعي , النسبة نفسها ماهي كبيرة مرة 

3- ماسبب حساسية لبشرتي او سواد . . بعكس نيفيا اللي يدعي بأنه يفتح البشرة مع انه ماكان يفتحها , هذا لاحظت انه البشرة رطبه والترطيب بحد ذاته يساعد انها ما تسمر <3 

4- اهم شي انه يناسب البنات اللي يعملون ليزر او بعد ازالة الشعر باي طريقة لأن وقتها البشرة تكون حساسة من اي شي واي مزيل عرق فيه عطور او كحول ممكن يهيج البشرة وهالشي ممكن يسبب ان العرق يكون له رائحة كريهه .. ف انصح البنات بعد ازالة الشعر تستخدم خصيصا هالمزيل 

بشكل عام 

انا راضية عنه بشكل كامل كل الاشياء اللي كانت مزعجتني شوي ف مزيلاتي اللي قبل ما لاحظتها فيه .. غير اني موسوسة شوي ف لازم بعد ما استخدمه امسح الرول نفسه بمنديل :$ .. 

غير كذا ممتاز ويكفي انه خالي من كل المواد اللي ممكن تضر البشرة على المدى البعيد <3

وبس 

ان شاءلله البوست هذا مفيد وبعد ان شاءلله كوني صريحة شوي ف هالموضوع ما ضايقكم "^^ 

بس كلنا نبي تكون اجسامنا نظيفة و ريحتني حلوة مع هالحر خخخخخخ 

اذا فيه اي سؤال او اسفسار تقدرون تتواصلون معي على الروابط تحت <3

فمان الله 

WHEN YOU KNOW ME YOU WILL LOVE ME

مكياج يومي ضد الحر والعرق مع #بربليتا || Sweat Proof makeup #Purpleita

السلام عليكم 

وكل عام وانتوا ومن يعز عليكم بخير <3 

بما انه اول يوم من شهر اغسطس وبما اننا في عز الحر 

قررت انزل بوست مخصص لمكياجي #بربليتا اليومي واللي استخدمته فعليا شبه يومي ف السفر + وانا طالعه ف الشمس 

وهالمكياج ( ضد العرق + سريع )

طبعا هو بسيط وسهل لكن تقدرين انتي تضيفين له اللمسات اللي تحسين انتي تحتاجينها لكن هذا فعليا استعملته كثير ف قلت اشارككم وان شاءلله يعجبكم 

ملاحظة :

ما نزلت صور للفرش قلت اسهل ف الشرح ..

1- واقي الشمس من بايوديرما - وايتس 

2- كونسيلر رول اون من قارنيه - سوبر ماركت

3- بودرة ستاي مات من مايبلاين - وايتس

أول شي استخدم واقي الشمس من بايوديرما 

هالواقي اللي اغناني عن البي بي كريم , وراح اكتب تدوينة كاملة عنه قريب ان شاءلله لأن ماعاد صرت استغني عنه , بس بشكل بسيط هو يجي منه درجتين ( فاتح + داكن )

انا اخذت الداكن وهو مايل على برونز ويعطي البشرة منظر ديوي خصوصا على عظمة الخد , وفعلا يقوم بتغطية خفيفة الى متوسطة , ولكن اذا بشرتك فيها حبوب او اثار استخدمي كونسيلر

ولأنه واقي فهو مو بس يعطيك تغطية لكن يحمي من اشعة الشمس 100SPF وبعد ضد الموية و التعرق ف راح يدوم وقت طويل معك .. وفعلا صرت استخدمه ف المشاوي البسيطة وتركت البي بي كريم <33 

عموما .. استخدم واقي الشمس واوزعه على وجهي بيدي بعدين اتركه شوي لين يجف , بعد كذا اخذ كونسيلر المفضل عندي " كونسيلر قارنيه " وحطه تحت العين او اي مكان يحتاج تغطية اثار او هالات .. 

ولأني مثل ما ذكرت قبل ان التي زون صارت دهنيه ف اخذ فرشة كبيرة واحط بودرة مايبلاين ستاي مات على التي زون وتركيزي يكون على الانف اكثر شي .. 

1- عكافة الرموش - وايتس

2- ماسكارا ميك اب فور افر - سيفورا - رياض قاليري

بعد كذا ننتقل للعين , ولاني عادة اكون مستعجلة ولأن هاللوك لليومي ف يهمني يكون التركيز على البشرة اكثر من اي شي ولان الواقي يعطي ديوي لوك , ف العين ما احط فيها شي وان حطيت يكون برونزر فقط مع الكثير من الماسكارا , عشان كذا استخدم اولا عكافة الرموش بعدين ماسكارا ميك اب فور افر 

صحيح هي للسهرات بس احب يكون عندي رموش كثيفة وتمسك طول اليوم ولأنها ضد الموية ف بتجلس وقت اطول <3

1- Smokin' eyes من بنفت - سيفورا

بعد كذا ننتقل للحواجب , هذا يختلف من شخص لاخر وكيف 

هي تتعامل مع حواجبها ف طريقتي ممكن ما تصلح لحواجبك خصوصا اني ما اشقر جواجبي ولانها غامقة مرة ف دايما استخدم هالباليت من بنفت وواضح جدا اني احبها :$$ .. ارتب الحواجب بالجل البني + درجة الرمادي الفاتح بفرشة مايلة .

1- بلش من الف (tickled Pink) - موقع درق ستور

وبعد كذا انتقل للبلش .. 

أحب هالبلشر من الف جدددا , مع اني اول ما شريته حسيته خفيف وما يعطي لون ابد وتركته لكن بعد ما شريت هالواقي ولانه اغمق من بشرتي ويعطي لون برونز جدا جميل ف قلت اجرب معه هالبلش , هو لونه على مشمشي فااااتح <3 , واسم البلش جدا مناسب الدرجة P:

 بس مع البلرونز يعطيك منظر صحي جدا وفيه لمعة خفيييفة ف جدا جدا احبه <3

احطه على الخد وانا مبتسمة بفرشة كبيره وبس 

واخيرا الروج وبكل صراحة يخلف على حسب المزاج احيانا كثير احط قلوس واحيانا روج مات , بس اليوم قررت استخدم الروج المات المفضل عندي من ميك اب فورافر احسه من الاشياء الاساسية اللي المفروض تكون عند كل بنت وهالدرجة تحديدا <3 .. 

وبسس ^_^

حابة هالميك اب لأنه سهل جدا وتقدرين تخلينه مناسب لطلعات اكبر شوي بكحل سايل او شادو , في كل الحالتين احبه لأنه فعلا ضد الحر و التعرق ومناسب للجامعه مع قربها والحر الرهيب للي عندنا ما يناسبه الا واقي 100 ويالله خخخخخخ :$

وبكذا بعد ما نتعب البشره بطبقات كثيرة عليها ..

وان شاءلله اعجبكم واستفدتوا لو شوي :$ 

ولا تنسون تتابعوني ف كل وسائل التواصل تحت 

فمان الله 

WHEN YOU KNOW ME YOU WILL LOVE ME