مرحبا جميعا. كيفكم اليوم ؟
حبيت اليوم اتكلم عن ٣ طرق لازالة المكياج♥. خصوصا اني جربت كل الثلاث طرق وراح اذكر افضل وحدة بالنسبة لي حاليا♥. لكن قلت اكتب عن هالثلاث لان البشرات تختلف و نوع الميك اب يختلف ف كل وحدة تقدر تشوف وش انسب طريقه لها من بين هالثلاث طرق.
١- عن طريق استخدام المقشر اليومي.
ST.IVESالاسم:
25السعر:
مكان الشراء: صيدلية النهدي
قبل فتره مو بعيده كنت ما استخدم الا هالطريقة وكان فعلا يعطيني بشره ناعمه وخاليه من الميك اب او كريم الاساس♥♥. لكن اللي ما حبيته في استخدام هالمقشر هو انا بالنسبة لروتيني ف انا شبه يومي احط ميك اب ويختلف احيانا ثقيل واحيانا خفيف. لكن اللي ما حبيته هو انه مع الاستخدام اليومي لها المقشر لاحظت ان مسامي توسعت وصارت اوضح للعين. لان كل يوم اغسل بشرتي بمقشر قوي نوعا ما وانا ماهي دهنيه عشان استخدم مقشر فيه حبيبات ويتخلص من كل الوسخ. صحيح كنت احس بنظافه وبشرتي ناعمه وهالمقشر من افضل المقشرات بالنسبه لي. لكن كاستخدام يومي لازالة المكياج بعد فتره لاحظت انه ما يناسبني. و الشي الثاني احسه يناسب البشرات الدهنيه اكثر لانه فعلا يخلي بشرتك جدا نظيفه ومنتعشه. ويتخلص لك من المكياج اللي على وجهك ماعدا مكياج العين. ما المس عيني به لان فيه حبيبات و بشره العين خفيفه، ف اضطر استخدم شي ثاني معه وهذا الشي مع الوقت صار يسبب لي ازعاج.
ف الاخير صرت استخدمه مره الى مرتين في الاسبوع لتنظيف عميق لبشرتي♥♥ لان احبه ينظف البشره بشكل جدا عميق و يتخلص لي من الجفاف و الدهون اللي ممكن تراكمت على وجهي وسط الاسبوع.
٢- عن طريق بايوديرما
الاسم: بايوديرما
السعر: 68 هالحدود
مكان الشراء: صيدلية وايتس
بايوديرما من الاشياء اللي مستحيل استغني عنها في حياتي♥♥♥. هو عباره عن مادة تزيل المكياج لكن المكون الاساسي فيها هو الماء لذلك تحسينه خفيف ولا يسبب لك اي حساسيه او تهيج. احبه في ازالة مكياج العين من ظلال و كحل وكل هالاشياء. واحب فيه بعد انه ما يعمي عيني او يسبب لها اي حساسيه♥. ويتخلص من الماسكارا ضد الموية بسهوله♥. لكن وبكل صراحة عيبه الوحيد هو انه ما يزيل لك كريم الاساس او مكياج الوجه بسهوله. تتعبين وانتي تمسحين وبعد مع المسح كله تحسين ان بشرتك لسه فيها بقايا مكياج. لذلك اضطر اني استخدم شي ثاني معه. لكن كمزيل مكياج العين بالنسبه لي هو الافضل ومستحيل استبدله. و المزيل هذا تحديدا غني عن التعريف و حتى لو مررتيه على بشرة مافيها مكياج يتخلص لك من الاوساخ اللي عالقة فيها. ومثل ماهو واضح في الصورة اللي عندي شوي ويخلص ، وهذا دليل على مدى استخدامي وحبي له♥♥.
٣- زبدة التنظيف
Camomile cleansing butterالاسم:
79السعر:
مكان الشراء: بودي شوب - المملكة
لي فترة ابحث عن زبدة لتنظيف البشره من المكياج. وقريت عند مدونة ولاء عن زبدة التنظيف من بودي شوب. وقلت اجربها صراحة اول استخدام لها ما حبيتها اعمت عيني و صار فيه زي الضباب عليها. لكن في المرة الثانيه لي ف استخدامها حبيتها كثير♥♥♥. اول شي اخذ من الزبدة كمية وافركها على يدي حتى ما تذوب شوي بعدها اقوم بفرك وجهي كامل بالزبدة حتى عيني واركز شوي على الرموش لين ما احس الماسكارا ذابت معي وراحت. بعدها ابلل منشفة صغيره عندي (يفضل تكون ناعمه) وابللها بموية دافيه وامسح فيها مكياج العين و الوجه♥. لما استخدمت هالطريقة حبيت الزبدة كثير كثير♥. ولي فتره ما استخدم الا هي كمزيل مكياج♥♥. احب هذي تحديدا لانها ناعمه على البشره♥ وما احسها تجففها بزيادة عن اللزوم. واكثر شي حبيته انه تتخلص من المكياج بدون ما تسبب لي احمرار او جفاف. وهي لجميع انواع البشره. جربت ازيل فيها المكياج السهرات ومكياج اليومي وكلهم تخلصت منهم بسهوله. افضل انكم تستخدمون منشفه معها على يديكم لانها تتخلص لكم من كل طبقة المكياج.
وبس هذي ثلاث طرق للتخلص من المكياج اتمنى تكونوا استفدتوا ♥
وانتوا ايش طريقتكم لازالة المكياج؟
ايش افضل منتج عندكم لازالة المكياج؟
اكتبوا لي عنها في التعليقاات يمكن اجربها او احد ثاني يستفيد منكم.
تقدرون تكتبون تجاربكم و تتواصلون معي تحت يسعدني تعليقاتكم وتفاعلكم ♥
فمان الله ♥
WHEN YOU KNOW ME YOU WILL LOVE ME
