سوالف ، فضفضة ، وهدية لكم #weekWpurpleita ♥

السلام عليكم ، كيفكم ؟

ادري اخر تدوينة من سلسلة “اسبوع مع بربليتا” تاخرت لكن حبيت اخرها شوي لنهاية نوفمبر. 

هالتدوينة جديدة من نوعها وهي فضفضه ، سوالف ، وهديه لكم ^^♥

من الحين احب اقول لكم ان هالتدوينة بتجي حوسة لاني ماعرفت كيف ارتبها لذلك قلت اخليها عفوية خصوصا انها بتجي على هيئة سوالف. 

ليه بديت في التدوين ♥ ؟

التدوين بديته في نهاية سنة ٢٠١٣ و اللي شجعني اني ابدا فيه هو اني احب الميك اب وسوالفه♥♥ وعلى ايام الجامعه كانت مكافأتي كلها تروح على الميك اب وسوالفه. وكنت دايم اذا جربت شي وحبيته فعلا اروح ازعج صديقاتي ولا ارتاح الا لما يشترونه لان احب اقول لهم عن الاشياء الكويسة اللي جربتها وكانت نتيجتها حلوة. 

معنى : when you know me you'll love me

اذكر وحدة سالتني ليه احطها في نهاية كل تدوينة. هو تذكير لي ولكل وحدة فيكم انه اي شخص لما يعرفني او يعرفك فعلا يعرف معدنك راح يحبك، لان فطرتنا كويسة وعلى الاسلام، لذلك احب اذكر نفسي دايم انه صحيح يا لمياء صعب ان الناس تعرفك لكن في النهايه لو عرفوك راح يحبونك ^^

من وين بدا حبي للميك اب ♥؟

الصراحة امي قبل لا ادخل الجامعه اصرت علي اني اخذ دورة في الميك اب ، واخذتها وانا كارهه هالشي، احب اقول انه في هالدورة تعلمت الاساسيات وهي اللي عطتني المفتاح لباب الميك اب و اشياء البنات كلها. ومنها صرت اشوف اليوتيوب طبعا هالحكي قولوا قبل ٥ الى ٦ سنوات. يعني تقريبا بداية كل مقاطع اليوتيوب حقت الميك اب و البيوتي قيرلز في اليوتيوب. واحب اقول ان اول كان فعلا اجمل بكثير من الحين. خصوصا ان اغلب اللي اتابعهم قديمات كانوا ف فعلا كانوا يسوون دروس ميك اب و ريفيوز غير مدفوعه. ومنهم فعلا حبيته وحبيت كل شي له علاقه فيه. 

الميك اب بالنسبه للمياء - بربليتا-؟

هو شي اسويه احيانا في نص الليل وانا جالسة في بيتي وما وراي طلعه. بالنسبه لي هو متعه♥♥ وشي اذا بديت فيه القاني شوي شوي اروق وانبسط♥. ما انسى مره امي دخلت علي الفجر وتلقاني فل ميك اب ! ما يحتاج اقول لكم صدمتها خخخخخخخخخخخ. 

لكن المكياج هو حلاته في اللعب فيه بدون خواف او حواجز احب العب فيه واجرب و اغير استخدامات الفرش. واحب اجازف فيه قد ما اقدر. 

نرجع للمدونة ، احب المدونة فعلا ومو هدفي اني احصل منها على دخل مادي. لكن عندي مشكله وحدة. 

المشكلة:

ان الحافز في الكتابة كل ماله يقل. مع اني احاول شتى الطرق اني انزل بشكل دوري و انوع في التدوين. اللي مقلل التحفيز عندي هو ان رغم ان نسبة المشاهدة كل ماله يرتفع لكن التفاعل كل ماله يقل. بالرغم اني خليت التعليقات بدون اسم او مستخدم. لكن لازال التفاعل قليل جدا. اكثر مكان القى فيه تفاعل هو التويتر. لكن الانستقرام اغلب صور اللي لها علاقة بالمدونة نادر ما يكون عليها اي تفاعل. ليه اقول لكم ؟ لان انتوا احد الاسباب اللي اكتب عشاانها. احب اسولف واكتب لكم لكن لما تسولفين مع احد وتحسين هالشخص مو مهتهم بسالفتك وش راح يصير ؟ راح توقفين. لذلك كثير تجيني فكره اني اوقف التدوين. لكن قررت اكتب لكم يمكن تعطوني اقتراحات ^^ . لان انا بس اجرب وانقل لكم تجربتي مثل لما تجلسين وتسولفين مع صديقاتك عن شي انتي حابته. 

هل بوقف عن التدوين ؟

بصراحة ؟ لا ♥♥♥

 ما اتوقع حتى لو ما كان فيه ذاك التفاعل. صحيح يفضل يكون فيه تفاعل وتعليقات وسوالف واعرفكم اكثر وتعرفوني لكن احب التدوين. القاني لما اكتب مدونة جديدة سعيدة اكثر. ودامه شي يسعدني فما احس اني راح اوقف. لان مكياج وراح نشتري خخخخخخخ  وتجارب اكيد راح نجرب اشياء جديدة. ف بدال ما بس اسولف على صديقاتي اوسع الدائرة واسولف عليكم انتوا بعد :$. 

———— — — — 

طيب الحين خلصنا من الفضفضة. راح احكي لكم عن شي انا جربته العام وقلت اكمل عليه هالسنة ان شاءلله. 

الكالندر او التقويم السنوي من كايت سبيد. 

التفاصيل : هنا

انا حياتي كلها كنت معتمدة على امي او صديقاتي في تذكيري بالواجبات او العروض ايام الجامعه و حياتي الدراسية بشكل عام. احب اعترف ان ذاكرتي مصنوعه في الصين لذلك تلقوني ممكن انسى الشي اللي قلتي في اللحظة اللي ارجع بيتي خخخخخخخخ. لذلك قررت العام اشتري تقويم دفتري. هالتقويم اخذته من كيت سبيد. 

يجنن يجنن يجنن احسه شي ماعاد اقدر استغني عنه في حياتي ♥♥

ليه يجنن♥ ؟ لانه نظم لي حياتي صرت كل شي اكبته فيه♥. ولما اقول كل شي ف انا اعني كل شي. 

اي مناسبة اي طلعه، مواعيد، مهامي اليومية، اهدافي لكل شهر، حتى نظم لي توقيتي في اني انظم نزول البوستات في المدونة. 

حتى افكاري السيئة و الجيدة اكتبها فيه، الحلو في تقويم كيت سبيد انه مقسم.

 اول صفحة لكل شهر فيها جدول يحتوي مربعات صغيره لكل ايام الشهر.

 بعدين الصفحة اللي بعدها ، خمس سطور او ما يقاربها لكل يوم لو حابه تكتبين فيه شي. و فيه فاصل بين كل شهر وشهر يحتوي على اقتباس محفز ^^ 

هالسنة شريت واحد جديد لي ولكم وهذي هديتي لكم ، حبيت اهديكم شي انا حابته واحسه راح يفيدكم فعليا. خصوصا ان السنة الجديدة على الابواب ف حلو انك تحطين لك هدف لها السنة. انك تكونين منظمة اكثر. 

اللي ساعدني انه حتى في طلعاتي ومناسباتي صرت اعرف ان هالاسبوع عندي كذا وكذا ف ارتب وضعي و وقتي على هالاساس. 

تقدرين تستخدمين الوان و ستكرات تساعدك وتشجعك انك تكلمين. وهالشي انا سويته هالسنة. شريت استكرات مليانه تعابير وجه وكل يوم احط ستكر واكتب فيه مشاعري ^^. و ستكر كاميرا ليوم الاحد و الخميس طول الشهر للمدونة. وهكذا فيه ناس كثير على اليوتيوب مبدعين اكثر، لكن انا حبيته بسيط وعملي. 

كل سنة احط لي اهداف حابة احققها السنة هذي ٢٠١٥. هي صحيح مابعد خلصت لكن احب احكي لكم بعض الاشياء اللي حققتها هالسنة ♥ ♥. 

١- تحدي قراءة ٣٠ كتاب هالسنة حققتها الحمدلله.

٢- ادون بشكل اكثر او منتظم ( شبه تحقق خخخخ )

٣- احافظ على صديقاتي بشكل اكبر (تحقق ^^)

الباقيه شخصية نوعا ما. لكن هذا بعضها. وان شاءالله السنة الجاية راح احط لي اهداف جديدة لها. 

بالنسبة لهديتكم ♥:

اخذت لكم الحجم الصغير وحبيته خصوصا لبنات الجامعه او المدرسة راح يساعدكم اكثر في ترتيب جداولكم واختباراتكم. خصوصا انه على الميلادي فقط واغلب الجامعات نظامها على الميلادي. والشكل نفس حقي منقط ذهبي من برا ومن جوا منقط اسود. 

♥

للدخول في الهديه:

١- تكتبين هدف من اهدافك في هشتاق #purpleita2016

٢- تسوين رتويت او لايك على الصورة في التويتر او انستقرام 

٣- تعملين تاق لحسابي في التويتر او انستقرام مع عمل فولو في كلا الحالتين. 

وبس الهديه راح تكون مفتوحة لمدة اسبوع من هالاحد ٢٢ نوفمبر - الاحد ٢٩ نوفمبر. 

اتمنى هالتدوينة تشجعكم انكم تعلقون وتتفاعلون معي بشكل اكبر لان في النهايه هي لي ولكم في وقت واحد

واذا فيه اي سؤال او استفسار تقدرون تتواصلون معي تحت 

فمان الله ♥

WHEN YOU KNOW ME YOU WILL LOVE ME

روتين الميك اب اليومي لـ #بربليتا ♥♥ || My Everyday Makeup Routin #purpleita

السلام عليكم ، كيفكم اليوم ♥؟

تدوينة اليوم عن الميك اب اللي استخدمه بشكل يومي ، طبعا انا مو كل يوم احط ميك اب لكن في الايام اللي استخدم الميك اب يكون هذا اللوك ^^.. 

احب الديوي لوك♥♥، احب بشرتي تكون منورة وفيها لمعه ، خصوصا ان بشرتي شاحبه هالفتره من قل النوم “^^.. لكن بشكل عام انا بشرتي جافه ماعدا التي زون، و الدهون اللي تطلع ماهي كبيره♥ لدرجة وجهي يكون معرق او سايح.. لذلك دايم اختار كريمات اساس خفيف على البشره وتعطي تغطيه.. 

اول شي الوجه :

من اول ما فتحت المدونة وانا اتكلم عن كريمات اساس شنيل بكل انواعها♥♥. البعض ما يحبها لان فيها شوي عطر او معطره.. لكن انا ما استغني عنها. دايم دايم ارجع لها، ف تلاقوني دايم استخدمها وعندي هي من الاشياء اللي مستحيل استغني عنها. 

فاونديشن اليومي حقي هو شانيل فايتالوميير .. التغطيه حقته خفيفه إلي متوسطة.. قوامه سايل وخالي من الزيوت ، فيه تغطيه من الشمس 15SPF، لذلك احب استخدمه بشكل يومي♥، لانه خفيف فما احسه يكتم بشرتي. وانا الحمدلله ماعندي حبوب او اثار كثيره عشان كذا مرتاحة معه بشكل كبير. احب استخدمه مع فرش سيجما للوجه. لانه احس قوامه سايل ما افضل استخدمه مع البيوتي بلندر “^^.. 

بعد كذا استخدم الكونسيلر ، و الكونسيلر ما عندي شي ثابت على حسب مزاجي وعلى حسب وجهي ذاك اليوم خخخخخخخ ، لكن اغلب الاحيان استخدم مايبلين Age rewind استخدم درجة فاتحه شوي واحبه تحت العين يعطي تغطيه و اضائة للمنطقه ويجلس معك فتره طويله لانه يجف بسرعه 

بعد كذا يكون الفاونديشن قد جف هنا استخدم الباودر واحب حقت مايبلين match perfection احبها كثير♥♥ لان تغطيتها عاليه و ثباتها قوي لذلك استخدمها على التي زون ومنطقة الخدود .. لان لاحظت اذا حطيت بودرة قبل البلش او البرونزر يثبت معي فتره اطول. 

مكياج العين :

كذا يكون وجهي كامل ، بعدها انتقل للعين ، العين دايم استخدم الوان ترابيه ، ولا يكون فيه شغل من ناحية الشادو كثير ، احب استخدم باليت نايكد بيسك ودايم اخذها معي في السفر لانها تناسب الاستخدام اليومي، ومعها مرايه ^^. 

استخدم ثالث درجة من ناحية الاسود على جفن العين بشكل كامل ، واحط افتح درجة على زاوية العين عشان يعطي اضائة للعين ويوسعها. لاحظوا اني ما استخدم برايمر للعين لان ما احتاجة في الاستخدام اليومي و الكونسيلر مع الشادو ثابتين معي طول اليوم. بعدين احط داخل العين كحل ماكس فاكتور الابيض بعد لتوسيع العين و يعطيها منظر صحي اكثر كانك نايمة لين قلتي بس خخخخخخ .. لكن هذي الخطوة اساسيه بالنسبه لي و انصح فيها لاي وحدة عيونها صغيره شوي. اذا ما تحبين الابيض استخدمي لون لحمي او بنك فاتح راح يعطيك نفس التآثير لكن بشكل انعم. 

واهم خطوة واللي بدونها احس عيوني عاريه خخخخخخخ ، هي الكحل♥♥♥، انا لازم احط كحل ولا بدونه احس ميكياجي اليومي مو كامل، احب ارسم cat eye واحب رسمتي تكون عريضة شوي لان ماحطيت شادو بارز او اي شي ف هو يكون الاساس في وجهي .. 

وبعدها اختم عيني بماسكارا، ولاني اعشق الماسكارا♥♥ مافيه شي ثابت عندي كل يوم وحدة او على حسب المزاج ، لكن هالماسكارا من تو فيس better than love اعشقها♥♥، تعطيك منظر كانك مركبه رموش تفتح لك عيونك ورموشك تكون متقوسه بشكل ممتاز و قد تكلمت عنها بشكل مفصل هنا. 

الحين وقت الحواجب ، وقد كتبت تدوينة كاملة عن حواجبي وكيف ارسمها  هنا، فما راح اتطرق للموضوع ، لكن ما استخدم لحواجبي الا باليت الحواجب من الف .. 

بعدها ارجع لوجهي ، قد قلت قبل اني نادرا ما استخدم بلشر ، لذلك تشوفون عندي مجموعه من البرونزر ، هالفتره حابه استخدامي لبرونزر من نارس ، اول شي كبير ومعه مراية ويعطيك منظر صحي لاهو اللي بني تقل تراب ولاهو اللي اورنج و القلتر اللي فيه تعطي منظر جميل على الخد. 

فوقه استخدم هاي بيم من بنفت ، هالمنتج من بنفت مافيه مثله في الهايلايت♥ ، يعطيك اضائة قوية احب احطه بفرشة كريم الاساس يندمج بسهوله ويجلس معك طول اليوم ما يتحرك من مكانه ! 

اخر خطوة هي الشفايف و اعترف ان من شريت هالروج ما استخدم الا هو لدرجة اني شريت نفسه ثاني من خوفي انه يخلص♥، احب احط هالروج من نارس درجة tonkin .. مع محدد الشفايف من ماك spice  !

هالاثنين مناسبين جدا اذا حابه تدخلين في مود الشتاء و الخريف من ناحية الروج 

وبس اتمنى هالتدوينة اعجبتكم ♥♥

لاتنسون القيف اواي اللي راح يصير بكره على البلوق بمناسبة انتهاء اسبوع مع بربليتا. 

#weekWpurpleita

فمان الله ♥

WHEN YOU KNOW ME YOU WILL LOVE ME

The Perfect Cardholder from Fendi #Purpleita ♥ ♥

السلام عليكم ، كيفكم اليوم ♥؟

ادري لي يومين ما دونت لكن جدا انشغلت ولا حتى قدرت افتح اللاب هالفتره ذي كلها، ع العموم راح اكمل الـ ٧ تدوينات وبعدها نرجع لنظام كل اسبوع انزل تدوينتين “^^.. 

بين فتره وفتره احب اجيب شي لنفسي كهديه ♥♥.. وهالشي مب غريب علي اللي يعرف لمياء يعرف هالطبع فيني. طبعا هديتي لنفسي تختلف مره يكون شي فيه حقه ومره يكون شي لجسمي من يوم سبا كامل او حاجة انا ابيها من زمان. 

الفتره اللي راحت كنت ابحث عن كارد هولدر، مليت من البوك او محفظة الفلوس الكبيره، خصوصا اني انا ما احب يكون معي كاش اغلب شي استخدم الكاردز حقتي واحس انها مسوية لي زحمة على الفاضي “^^. 

لذلك قررت اني اشتري لي كارد هولدر♥، وكنت ابي شي كلاسيك يجلس معي فتره طويلة. ما ابي شي امل منه بسرعه او يخرب بسرعه ♥. البحث كان بين فندي وشانيل. وكلهم كانوا غاليات ، عشان كذا اخذت وقتي وشفت هل فعلا راح استخدمها او لا خخخخخ. 

بعد بحث طويل قررت اني اخذ من فندي، حبيتها من اول ما شفتها

 وانا كيف اعرف اني حبيت غرض شفته في المول ؟

لما اشوفه ولا اشتريه ف تشوفون اذا رجعت البيت اجلس لي كم يوم اقول ليتني اخذته وليتني رجعت له واصير افكر فيه♥♥ خخخخخخخ ، وهالشي صار مع حافظة البطاقات من فندي ^^ .. 

اللي حبيتها فيها انها مو بس فيها مكان للكاردز، حتى موجود فيها مكان تحطين فيه فلوسك لو حابه. والجلد تبعها مره قوي ومتين فما راح تخرب او تتعفط وهي مرمية في الشنطة. 

اخذت اللون الاسود لانه هو اللون الوحيد اللي مستحيل امل منه ويناسب كل شي. حبيت فيها اللمسات الذهبيه خصوصا ان اغلب مجوهراتي ذهبي ونادر ما البس فضه ^^”. حسيتها تمثلني ♥♥.

احب ان اسم الماركة ماهو مطبوع على الجلد. انه على قطعه ثانيه لان فكرت لو على الجلد ممكن يروح مع الوقت "^^. 

اللي يضحك في الموضوع اني طلبت انهم يغلفونها خخخخخخخخخخخ :$ ، زي العادة لما اروح لمحل حابه اشتري منه هديه لنفسي ♥، اطلب منهم يغلفونها ويحطون كرت :$$.. اعيش نفسي جو انها هديه، ممكن يشوف البعض ان هذا شي ماله داعي لكن انا دايم (وبتقولون مجنونه) لكن انا دايم اعتبر نفسي شخص منفصل، لذلك يحق لي اجيب لها هديه وادلعها واريحها اذا تعبت ، لان لنفسك عليك حق في كل شي ^^.

عشان كذا قررت اخذ الكارد هولدر ولانه شي انا ابيه وبكل المقاييس بالنسبه لي راح احتاجها واستخدمها. 

اذا تبحثين عن كارد هولدر كلاسيك من ضمن خياراتي كانت ( فندي - شانيل ) واذا حابه يكون فيها فكره كان عند MCM وحدة جدا غريبه على ذهبي مع اسود … 

اتمنى البوست هذا اعجبكم و لا تنسون اذا عندكم اي اقتراح تقدرون تتواصلون معي تحت او على هاشتاق 

#weekWpurpleita 

فمان الله 

WHEN YOU KNOW ME YOU WILL LOVE ME

تخلصي من الحبوب قبل لا تطلع مع St.Ives #بربليتا ♥♥

السلام عليكم ، كيفكم اليوم ؟

تدوينة اليوم عن مقشر مخصص للبشرة الدهنيه و التخلص من الحبوب. 

تفاصيل :

الاسم: St.Ives

السعر: 27

مكان الشراء: الدانوب

هالماركة احب كل انواع المقشرات حقتها واستخدمها لي سنين انصح فيها لجميع انواع البشره. عندي منها للوجه و الجسم وكلهم ممتازة في التقشير اليومي والتخلص من الحبوب حتى اللي موجودة احيانا في الظهر. لكن هذا جديد علي ومميز لانه حبيباته ناعمه على البشره. هذا مكوناته اكثرها الشاي الاخضر فهو يصفي البشره من الحبوب وفي نفس الوقت يهديها. خفيف على البشره قاومه كريمي اكثر من انه فيه حبيبات خشنه ♥ 

طريقة استعماله:

انا ما استخدمه بشكل يومي، فقط في الايام اللي احس فيها ان فيه حبه بادية تطلع في وجهي وقتها استخدمه.

 لان احيانا تحسين بالحبة قبل لا تطلع ف انا اذا حسيت فيها استخدمه على طول.لان احس افضل اعالجها قبل لا تبرز بشكل كامل.  افضل شي تستخدمينه وبشرتك نظيفة من اي شي من ميك اب او غيره، وتبللين وجهك بشوي موية بعدين تحطين نقطه منه وعلى وجهك كامل. ما اكذب عليكم ينشف وجهك فاللي بشراتهم جاافه ماراح يناسبهم. لكن اذا بشرتك مختلطة او دهنيه فهو راح يكون مناسب لك. 

لذلك انا ما استخدمه كل يوم. بس في الايام اللي بشرتي تحتاجه ♥♥. استخدمه مره في اليوم، بعدين صير استخدمه مرتين في اليوم . اذا حسيت ان الحبه بدت تختفي استخدمه مره في اليوم. وما اكذب عليكم صراحة مفعوله تشوفينه! 

هو يجفف البشره من كل الدهون اللي عليها لكن ما تحسينها متقشره ، بس شادة شوي. عشان كذا قلت ماراح يناسب البشرات الجافه او العادية. هو هدفه انه يتخلص من الحبوب. لذلك ينشف البشره ويجفف الحبه قبل حتى لا تطلع بشكل واضح. 

يعني الحبه تختفي بشكل اسرع ♥♥ اللي خلاني اشتريه هو ان جل الحبوب اللي استخدمه من لش هنا خلص. ف شفت هذا وقلت اجربه خصوصا اني احب هالماركة في المقشرات ^^. 

ومثل ما ذكرت الشاهي الاخضر معروف في تصفية الحبوب و انه يهدي البشره من اي احمرار. 

في النهايه انا اشوف ان اسرع طريقة للتخلص من الحبوب خصوصا اللي ممكن تطلع بس في وقت البيريود هو انك تقضين عليها قبل لا تطلع بشكل كامل..لان اذا سويتي كذا ، بهالطريقة ماراح يكون فيه اثار على الوجه، والاثار تجلس فتره طويلة على ما تروح. ف الافضل انك تستعملين اي منتج يناسبك ويناسب بشرتك في التخلص من الحبوب قبل لا تطلع ^^.. 

وبس ، اتمنى البوست فادتكم و لا تتردون انكم تشاركوني حلولكم وارائكم في التخلص من الحبوب ♥

واذا فيه اي فكره لتدوينة جديدة شاركوني في #weekWpurpleita 

فمان الله ♥

WHEN YOU KNOW ME YOU WILL LOVE ME