Winter LookBook Purpleita : طلاتي الشتوية بربليتا

السلام عليكم بنات، كيفكم اليوم ؟

حبيت اليوم انزل لكم طلاتي وتنسيقاتي لها الشتوية، وراح تلاحظون وجود المخمل و القطع وسيعه شوي وهذي الترندز اللي قرت اني اتبعها هالموسم. وحبيتها كثير خصوصا المخمل الالوان عليه تقتل وكل ما غمقت كل ما كانت اجمل. 

بس عندي لكم سؤآل وش تفضلون القطع اعرضها لكم على الارض او على المانيكان تكون اوضح ؟

التنسيق الاول:

البلوزة: زارا (موجودة حاليا)

الشال: اسوس

اللقنقز: سبلاش

الشوز: بيرشيكا (موجود)

من القطع و الاكسسوارات الاساسية في فصل الشتاء هو الشال بالنسبة لي. عندي هوس شالات واحبها كثير تضفي للطله بشكل كامل. ولان البلوزة oversized يعني كبيره موديلها حبيت اني البس شي ماسك تحتها و اللوك يكون كاجوال بالسنيكرز. 

التنسيق الثاني:

الفستان: زارا

الهيلز: شارلز اند كيث

الشنطة: ساينت لوران (لندن)

المخمل مع الالوان الغامقة يجي جدا فخم خصوصا العنابي و الكحلي و الاسود. حبيت انه مخملها مو تقليدي وجاي محفط شوي. ولان الفستان قصير شوي حبيت البس عليه كيلون ثقيل اسود منها نتفدى ويكون التركيز على الفستان. وكيف انه oversized من فوق ولكن ماسك من تحت وطالع شوي كانه قصير نتفه من قدام وطويل من ورا. 

التنسيق الثالث:

الشيرت: زارا (متوفر)

البنطلون: زارا (متوفر)

الهيلز: ستيف مادن

الشنطة: مايكل كورس

طلة مخملية بشكل كامل، وهذي احد الترندز لها الموسم انوا تلبسون كامل لون موحد او مخمل كامل. وهذي في منها كذا لون لكن حبيت هاللون اللي لاهو فيراني او بنفسجي مع رمادي حبيتها كثير. وحبيت انها تكون شيك كاجوال مع هيلز و شنطة نود. 

التنسيق الرابع:

السوتر: موقع romwe

البنطلون: زارا 

السنيكرز: اسوس - نايكي

الشنطة: مايكل كورس

حبيت اغير شوي واخلي الطله كاجوال على تراينينق شوي. ركبت عليها سويتر كبيره عندي من سنين لكن كل مره ارجع لها واحبها كثير ومع السنيكرز صار اللوك كاجوال اكثر. 

التنسيق الخامس:

البلوزة: زارا 

البنطلون: سبلاش

الهيلز: شالرز اند كيث

الشنطة: ساينت لوران

هالبنطلون هاي ويستد و قماشه كان جدا دارج في الصيفيه و الشتوية الان، متوفر في كثير محلات وفيه منه الخفيف وفيه منه اللي ثقيل شوي مثل اللي في الصورة. حبيته كثير وما ترددت اني اخذه اول ما شفته يمشي عليه اشياء كثيره والهاي ويستد على وسيع شوي يعطي طول للجسم وفخامه اكثر. 

وبس اتمنى تنوع التنسيقات و الطلات لها الشتاء اعجبتكم. و اذا فيه اي استفسار تقدرون تتواصلون معي تحت ولا تنسون تتابعوني على السناب انزل فيه يومياتي واشياء سريعه اعجبتني. 

فمان الله 

روتيني المسائي || My Nighttime Routine #purpleita

اهلا بنات ، كيفكم اليوم ♥ ؟

مع انو مقصره شوي في المدونة لكن اوعدكم كنت شعلة في السناب وانزل فيه تغطيات واشياء يومية لحياتي و مشترياتي وجولاتي التسوقية ف اذا غبت هنا اعرفوا اني فعاله هناك، اضيفوني عشان ما يروح عليكم شي على #ipurpleita.

اليوم حابة اتكلم عن روتيني الليلي خصوصا في الايام اللي اكون حاطة فيها ميك اب، لان احس هي اللي احرص اكثر في اتباع الخطوات اللي راح احكي لكم عنها. 

١ـ اول شي ازالة المكياج وهنا انا احاول قد ما اقدر اشيله بشكل كامل و معه الاوساخ اللي تجمعت طول اليوم. 

احب ابدا اول شي بإزالة مكياج العيون باستخدام قطن مع مزيل الميكاج من بايوديرما الوحيد اللي كل ما خلص ارجع اشتريه واحرص عليه رغم غلاء سعره، صحيح نيتروجينا عندهم واحد يشبه له واستخدمته وحبيته لكن هذا استخدمه لي سنين ومن سنين ما عمر عيني تحسست منه او جففها ف عندي منه هالعلبه الكبيره وبكم مسحة اشيل مكياج العيون بشكل كامل. 

بعدها ابلل وجهي بموية دافيه بعدين استخدم الكلنزر اللي بـ ألوفيرا والمعروفة بتهدأة البشره من اي تهيج او حساسيه.البراند هي اتود هاوس الكورية، اخذته من محلهم في اندونسيا لكن متاكدة الحين تقدرون تطلبونه من النت او من البائعات. لي فتره استخدمه وبصراحة احبه كثير لانه يسهل عملية ازالة المكياج ولا يجفف لي بشرتي المختلطة. وفعلا يتخلص من المكياج. بعد ما ابلل وجهي بموية دافيه اخذ كمية بسيطة منه وافرك فيه وجهي واشوف الميكاج يتم ازالته بشكل سريع ومريح. 

بعدها ارجع اعيد على وجهي بقطنه مبللة بالبايوديرما عشان اتاكد ان وجهي خالي من اي شوائب الميك اب بشكل كامل. 

الحين فقرة الترطيب وعلاج بشرتي من الميك اب اللي كان عليها طول اليوم ، وهالخطوات مهمه عشان ما اقوم بكره ووجهي تعبان او فيه حبه طالعه لي. لانه وقت النوم بالنسبة لي هو الوقت اللي اخلي بشرتي ترتاح وتعالج نفسها. 

اول شي اخذ قطره من سيروم كيلز وقد تكلمت عنه هنا في المدونة، وهذي ثالث علبه اشتريها وبتخلص وعندي منه جديدة، والخبر الجميل ان كيلز راح يفتح عندنا في الرياض $ـــ$!! المهم اخذ قطره واوزعها على وجهي ورقبتي بشكل كامل يرطب ويساعد الكريم اللي بتحطينه بعده في انه يتغلل في البشره وفي ان البشره تستفيد منه بشكل اكبر. ويعالج بشرتك ويعيد بنائها مع الوقت

. 

بعدها احط كريم من فيشي، هالكريم خلصت العلبه تقريبا خفيف ويرطب البشره ولانه خفيف ف البشره تمتصه بسرعه وما ياخذ وقت في وضعه وتوزيعه على البشره وهالشي جدا مريح. واحس لانه خفيف كقوام ينفع للبشرات الدهنيه. لكن انا بالنسبة لي فرحت انه خلص قبل فصل الشتاء لان احس اني احتاج كريم فيه نسبة ترطيب اعلى منه. ولا هو طول فترة استخدامي له وانا حابته خفيف و يعطي ترطيب ويعطي ملمس ناعم للبشره. ويكفي انه طبي وخالي من المواد اللي ممكن تضر بشرتك على المدى البعيد. 

اخر خطوة هي كريم العين من كيلز و اللي هي خطوة جديدة بالنسبة لي. لان جربت كريمات عين كثيره وكلها ما احسها تسوي شي لكن هذا الكريم سمعت كثير ناس تمدحه وتشوفه رقم واحد في كريمات العيون. لذلك بديت استخدمه ولي الحين كم يوم استخدمه بشكل يومي نهاري وليلي. وان شاءلله اكتب لكم هنا تفاصيل كاملة. لكن حاليا ما اقدر اقول لكم اذا حابته او لا لين ما استخدمه فترة كافيه اني اتكلم عنه. لكن كخطوة لروتيني الليلي استخدمه على اعلى عظمة خدي واوزعه بالطبطبة لان الشد يرهل الجفن. 

واخر شي مرطب الشفايف استخدم اللي تم ذكره هنا. ولي فتره استخدمه واعتبره من المفضلات عندي واللي كل ما خلص ارجع اشتريه لان انا شفايفي جافه وتتشقق بسرعه وهو الوحيد اللي اقوم من النوم القى شفايفي موردة و ممتلئة بدون شقوق. 

وبكذا ينتهي الروتين الليلي لبشرتي خصوصا وجهي ورقبتي. احب لما احط ميك اب بعد ما اشيله اني اعتني ببشرتي من ناحية الترطيب و كاني اريحها بشكل اكبر من بعد الميك اب. واتمنى ان الموضوع فادكم كخطوات للعناية ببشرتك بعد الميك اب. 

فمان الله ♥♥♥

WHEN YOU KNOW ME YOU WILL LOVE ME

KENZO x H&M Haul Purpleita || KENZO x H&M مشترياتي وتغطيتي لـ

السلام عليكم بنات ، كيفكم ؟

اليوم ولو انها متاخرة لكن حبيت انزل لكم مشترياتي من تعاون

 KENZO x H&M ، وراح احكي عن تجربة التسوق بشكل عام هالسنة. لان كل سنة اتش اند ام تتعاون مع براندز كبيرة ويكون فيه ضجة اعلامية و حوسة. لكن هالسنة الحمدلله تجربة التسوق بالنسبة لي كانت جدا ممتازة ومرتبة. 

طلعت من المحل بثلاث مشتريات. التصاميم بعضها كان مره اوفر لدرجة احس صعب احنا نلبسها مكانها في الفاشن شو وبس. لكن بعضها جدا فنكي و غريبة وفيها لمسات كنزو المعروفة من التايقر و الطبعات اللي خارجة عن المألوف. وهذا اللي حبيته فيها ماهي تقليدية جدا بالعكس فيها غرابة و تقدرين تزيدين غرابتها وتكون اوفر وتقدرين تهدينها بقطع كلاسيك عندك. واذا حابين راح انزل تنسيقاتي لها القطع اللي شريت. 

السعر:١٢٩٩ريال

اول قطعه هي اكثر قطعه كنت متحمسة لها واتمنى اني احصل عليها. هي الكيمونو الشتوية حبيتها لانها ثقيلة و راح استفيد منها في موسم الشتاء و البرنت اللي فيها ملفت للعين و يخليك توقفين طبعا ممكن تكرهونها او تحبونها لكن انا حبيتها كثير. واللي حبيته اكثر هو اللوقو حق كنزو في مسكة السحاب. و الاحلى من هذا كله هو انك تقدرين تلبسينها بطريقتين مختلفات. و الطريقة الثانية اهدى و انعم من البرنت الاورنج الصارخ. 

السعر:١٧٩ريال

القطعة الثانية اخذتها من قسم الرجال خخخخخخخخ ، بالنسبة لي حبيت الشيرت حقت الرجال اكثر من القسم النسائي كانت فيها من طابع اديداس الجديد و الوسع اللي الحين دارج في السوق. و الطبعات اللي فيها مع تطريز التايقر يصرخ كنزو و تقدرين تخلينه كاجوال او رسمي بتنورة تحته. بس تداخل الالوان فيه حبيتها كثير. 

السعر:٩٩٩ريال

اخر قطعه واللي كنت جدا محتارة فيها لكن قررت في الاخير اني اخذها هو الفستان. هو زحمة البرنت و الالوان اللي فيه تخلي الواحد يتردد. لكن على اللبس و المانيكان طالع جدا جميل وفخم. وهالشي لاحظته في الملابس انها تعطي فخامه واعلى بشوي من ناحية الخامات باللي متعودين عليه من اتش اند ام. وكون بعضها شتوي يعطي ثقل اكثر. لكن الفستان جدا حبيته الكسرة اللي فيه وال flow حقه يعطي راحة. احسه ما يحتاج معه شي ثاني غير شنطة سودا وخلي الفستان يحكي عن نفسه “^^. 

الحدث نفسه:

 رحت لفرع اتش اند ام العليا الساعه ٨:٣٠ صباحا، وكان جدا مرتب و يدخلون البنات على دفعات ويلبسونك اساور بلون معين تدخلين على حسب لونك ووقتك. البنات اللي يشتغلون في المحل خدومات و يساعدونك بروح حلوة وابتسامة بشوشة. حتى التنظيم كان عند البوابة شديد فيه رجال و سكيورتي لكن الحمدلله ماكان فيه تدافع او تزاحم. القطع المميزة بسرعه تخلص. الجاكيت الكيمونو انا اخذت اخر قطعه كانت متوفرة بالرغم اني اعتبر جاية بدري. حتى القطع الحلوة من قسم الرجال خلصوها البنات خخخخخخخ. بشكل عام كانت تجربة حلوة. 

وبس اتمنى تكون التغطية و التدوينة امتعتكم، انا سويت تغطيه كاملة على سنابي وقتها

واذا حابين اشياء معينه او تنسيقات للملابس اكتبوا لي تحت 

فمان الله ♥♥♥

WHEN YOU KNOW ME YOU WILL LOVE ME

My Top 5 Makeup & Skin Care FAVES | IPURPLEITA

مرحبا بنات، اليوم حابه اتكلم عن افضل ٥ اشياء حابتها في الميك اب و عناية بالبشره ♥. 

Origins Active Charcoal Mask to Clear Pores

من فتره وانا استخدمه و بصراحة من الماسكات اللي تلاحظين الفرق في بشرتك لما تستخدمينه. الماسك مخصص للبشرات الدهنيه المعرضة للحبوب. يحتوي على الفحم واللي يقوم بجذب كل الدهون المتراكمه و يقضي عليها. احب احطه فقط في منطقة التي زون عندي لان هي اللي فعلا تتجمع فيها الدهون و المسام. لاحظت بعد استخدامه المسام تصغر و الدهون تختفي. فيه شوي شد على البشره لما تستخدمينه لكن من الماسكات اللي تشوفين فايدتها على بشرتك. بعد ما تحطينه بشرتك تكون صافيه اكثر. احب استخدمه المناسبات الكبيره عندي. 

Collection Lasting Perfection Concealer

كونسيلر كثير بولقرز بريطانيات يتكلمون عنه ويفضلونه على كثير كونسيلر غاليه او هاي اند. وهالشي خلا عندي فضول استخدمه. خصوصا ان سعره جدا رخيص و الوانه بعد محدودة. مع استخدماي له حبيت فيه تغطيته الكامله للهالات السوداء تحت عيني. احب قوامه لانه مو خفيف مره و ف نفس الوقت يجلس على الجفن السهره كلها او وقت الاستخدام كامل. ما يجلس على الخطوط الرفيعه. ولما اقول يخفي العيوب فهو فعلا يخفيها !! والاحلى من سعره هو انه مقاوم للموية و ماراح يطبع على ملابسك. عندي ينافس كونسلر نارس واللي ما استغني عنه. 

Too Faced Born This Way

كريم اساس لي شهور استخدمه وجدا حابته لتغطيته المتوسطة الى الكاملة و ثباته على البشره. مخصص للبشرات الدهنيه و المختلطة. اعتبره ثقيل شوي لذلك الاحظ افضل شي ادمجه بالبيوتي بلندر عشان يعطي تغطيه كامله وما تكون cakay. الدرجات اللي فيه طبي وتخيري وهذا شي جدا مريح. خالي من الزيوت ويعطي منظر مخملي للبشره وتقدرين بضغطه وحدة يعطيك تغطيه ناعمه وخفيفه. متوفر في سيفورا. 

Beeline Lip Care Flavour Free

تحديدا هذا المرطب اللي كل ما يخلص ارجع اشتريه. لدرجة اني نسيت هذي اي علبه عندي. انا شفايفي تتقشر و مهما شربت موية فهي جدا جافه وتتحسس بسرعه. بدون اي مدح قررت اجربه لانه خالي من العطور ويهدي البشره الجافه. من لما استخدمته لاحظت الفرق في شفايفي. احطه وقت النوم اصحى القى شفايفي موردة مليانه و مافيه اي قشور زي باقي مرطبات الشفايف. اللي تعاني مثلي انصحها تستخدمه. اخذته من السوبرماركت. 

Nars Pure Matte Lipstick - Tokin

مقدر اتكلم عن عشقي لها الروج عندي منه حبتين زيادة جست ان كيس خلص !… هالدرجة تحديدا مره ناسبت درجة بشرتي و استخدمه مع او بدون ميك اب. هو مطفي و اللون لحمي غامق شوي ورجعت له مع رجعت الشتاء و حبي له كل ماله يزيد. مع انه مات لكن ما احسه يجفف الشفايف و اتمنى اجرب درجات اكثر من نفس الروج لانه يجلس فتره طويلة و لانه يحتوي على الفيتامين اي يعطي ترطيب في نفس الوقت. 

وانتوا ايش حابين هالفتره من مكياج وعناية بالبشره، شاركوني اياها عشان اجرب معكم ♥♥

واذا عندكم اي سؤال تقدرون تتواصلون معي تحت او ف اي مكان، ولا تنسون تتابعوني على سناب المدونة انزل فيه نزلاتي للسوق و المطاعم و اي شي من يومياتي 

فمان الله ♥♥♥

WHEN YOU KNOW ME YOU WILL LOVE ME

SmashBox Brow Tech Stick Review || 2016 Purpleita

السلام عليكم ، كيفكم ؟

سبق ونزلت كيف اسوي حواجبي و تكلمت عن الادوات اللي كنت استخدمها. لكن هالمرة حابه اتكمل بتفصيل اكثر بخصوص الادوات و كيف انا اسوي حواجبي. 

حواجبي اول شي ما هي مصبوغه او كثيفه، خفيفه نوعا ما ويسهل علي رسمها. 

لكن احب انظفها وارسمها بطريقة مرتبه بالليزر، اسويه كل شهرين عند عيادة عبدالعظيم البسام. احب اسوي تشقير بالليزر لانه يجلس فترة اطول و حتى لما يروح التشقير يكون مرتب مو مثل لما اشقره بالطريقة الاعتيادية، وهذا رأيي الشخصي واتمنى احترامه. 

انا التنظيم الوحيد هو في نهاية الحاجب من تحت فقط الحمدلله يعني ماهي متعبه في الرسم او التشقير. 

الحين نروح للادوات اللي استخدمها. لي فتره طويله ما استخدم غير قلم الحواجب من سماش بوكس وهو يعتبر دايما الخطوة الاولى او الوحيدة. 

تفاصيله:

الاسم: Brow Tech Gloss Stick

السعر: 21$

الموقع: هنا

الدرجة: Brunette

اللي في الصورة هو قلوس يعني فيه لمعه خفيف يعطي منظر قلوسي للحواجب وعندهم مات نفس القلم. انا لي فتره استخدمه وفعليا من بديت استخدمه والكل لاحظ الاختلاف في حواجبي كيف هي طالعه نظيفه اكثر ومرسومه بطريقة مرتبه وطبيعيه اكثر !

ومن يومها وانا كل ما خلص اشتريه لاني استخدمه بشكل يومي ولا لاحظت عليه تساقط لشعر حواجبي. 

الخطوة الثانية هي اذا حسيت لازال فيه فراغات او حابه اطفي القلوس اللي في حواجبي استخدم بودرة من باليت naked basic من اربن دكاي. لي سنين استخدم هالدرجة وشوفو كيف من حبي لها وصلت للاخير خخخخخخخخخخ. احب فيها ارتب و اثبت القلم بشكل اكبر. وانا الحمدلله حواجبي ما تتحرك من مكانها او تنحاس ف مريحتني في هالموضوع. 

ثالث واخر خطوة هي ماسكارا الحواجب. وللامانه ما استخدمها كثير اذا صرت رايقة و مشتهيه ادلع حواجبي استخدمها لكن لي فتره من شريت قلم الحواجب من سماش بوكس وانا شبه متوقفه عن استخدامها. بس احب استخدمها في بداية حواجبي عشان ارفع واثبت شعيرات الحواجب اللي في البداية يعطي منظر حواجب طبيعيه وكانها محيوسة شوي و كثيفه شوي “وهذا الاتجاه للحواجب هالفتره”. 

وبس 

انتوا ايش الادوات اللي تستخدومها في رسم حواجبكم؟ وفيه قلم معين حابيني اتكلم عنه؟

ياليت تكتبون لي ردودكم تحت يسعدني اني اعرف ايش تحبون وكذا ^^

فمان الله ♥♥♥

WHEN YOU KNOW ME YOU WILL LOVE ME

Review: Charlotte Tilbury's Filmstar Bronze & Glow

مساء/صباح الخير بنات 

كيفكم اليوم ؟

تدوينة اليوم راح تكون تقرير كامل عن باليت البرونز+اضاءة من ماركة شارلوت تولبري. واذا كانت اعجبتني او لا. 

معلومات :

الاسم: FILMSTAR BRONZE & GLOW

السعر: ٤٩ باوند

الموقع: هنا

تجربتي:

اول شي انا اخذتها لاني سمعت مدح كثير على تقريب جميع منتجات وادوات التجميل من خبيرة المكياج شارلوت. وحتى الباكجنق او التعليب حق اشياءها تفتح النفس و طريقة تغليفها و اكيسها اخر دلع. تحسين كل منتج مفكرين فيه ومتعوب عليه. 

هالباليت تحتوي على برونزر و هايلايتر و معها مراية كبيره. العلبه نفسها جدا انيقه وجميله وتنفع للتصوير وكذا واللون النحاسي هو الغالب على علب منتجات ومكياج شارلوت. 

بالنسبه للمكياج نفسه، حابتها كثير اول شي راح اتكلم عن البرونزر:

خفيف وناعم ومو معناه انه ما يبان معك بالعكس لما تحطينه يطلع على البشره بطريقة جدا جميله، وفعلا برونزر يعطي منظر صحي و مشع للبشره كان الشمس ضربتها على خفيف، لمسه حياة. مهما حطيتي ما تحسين انك حطيتي كثير او كثرتي او تخافين لما تحطين الفرشه عليه بالعكس مريح جدا و ينفع للدوام و الاستعمال اليومي وحتى لو اني حابه تحطين شي خفيف على خدودك يبرز التان او يعطيك منظر صحي لخدودك.

الاضاءة جدا ناعمه ما تقارن طبعا بماري لو او شامباين من بيكا، هذي تنفع لاستخدام يومي و تجمل عظمة الخد بذريقة جدا انيقه ونظيفه احسها تنفع بعد للي بشراتهم دهنيه وحابين يحطون لمعه بس متخوفين من الموضوع، هي راح تعطيك الاضاءة الناعمه اللي تبحثين عنها للدوام او لما تطلعين في الشمس. 

احس كل الاثنين يناسبون جميع درجات البشره و حتى انواعها. ويكفي انها خالية من البربان و الكمية اللي فيها جدا كثيره وتجلس معك عمر. 

بالنسبة لي حابتها كثير وكثير اخذها معي في شنطتي او سفراتي لانها تعطي منظر نظيف ومنعش وما تحسين انك تتعبين في الدمج او الوضع نفسه. 

قد جربتوا مكياج من شارلوت تلبوري ؟ وايش الاشياء اللي حبيتوها منها؟

اذا عندكم اي سؤال او اسفسار او حتى اقتراح تقدرون تتواصلون معي تحت او في السناب و التويتر 

فمان الله ♥♥♥

WHEN YOU KNOW ME YOU WILL LOVE ME