تجربتي و رأيي في ميك اب H&M #بربليتا || A Review on H&M Makeup and tools #purpleita

السلام عليكم ، كيفكم اليوم ♥؟

تدوينة اليوم هو تقرير عن منتجات الميك اب من H&M من قبل فترة نزلوا مجموعة ميك اب كاملة. ولاني من زمان قد جربت بعض الاشياء الخفيفة اللي نزلوها، حبيت اجرب الاشياء الاساسيه اللي نزلوها خصوصا اني سمعت عليها مدح من بعض المدونات الاجنبيه. ما شريت منهم كريم اساس، حبيت اشتري اشياء انا راح اجربها واستمتع في استخدامها. 

السعر: ٦٩ ريال

الدرجات: 

العنابي : Penny Red 042

اللحمي: Kombucha 002

البني: Heyday 011 (المفضل)

مكان الشراء: HM فرع المملكة

اول شي الارواج (فيس يصيح من جمالها♥♥♥) اول شي الالوان و التنوع في الدرجات يقتل♥♥. عندهم كل الدرجات اللي ممكن تفكرين فيها. واللون يطلع معك من اول طبقه تحطينها على شفايفك، قوامها كريمي على مخملي واللون فعلا مثل ماهو واضح معكم في الصورة. حبيت اخذ الوان انا راح استخدمها ومثل ما انتوا عارفين لازم درجة من العنابي و اخوانه. لكن اعترف ان اللون البني الاخير في الصورة هو اكثر لون استخدمته هالفتره♥♥. لان بصراحة طايحة في درجات البني و اللحمي *ــ^، لكن هذا جدا جميل♥ وبسرعه يخلص من عندهم ف اللي حابه تشتريه تجربه على يدها لان راح تبهرك الالوان و قوتها على يدك. عندهم من درجة البني ثنتين وكل ما رحت ادور الدرجة الثانية من نفس حقي ما القاها. لكن بشكل عام الباكجنق تبع الارواج جدا انيق وجميل “ذهبي و ابيض” واسم الماركة بالذهبي صاير منظرها جدا جميل. 

السعر: ٤٩ ريال

الدرجات:

الذهبي: Shitake

بني محروق على رمادي: Fig Figment

البنفسجي: Wild Sable

ثاني شي ظلال العين .. عندهم الوان كثيرة ومختلفة عن الموجود في الماركات اللي تلقينها في الصيدليه. لان بالنسبة لي اشوف ان مكياج اتش اند ام في مستوى مكياج الدرق ستور. عشان كذا اقول انه ظلال العين عندهم مختلفة من ناحية ان الدرجات عندهم مختلفة ومنوعه، وفيه منها المات - لمعه خفيفه - قطع من اللمعه، وفيه منها درجات كثيره و الوان غريبه للي تحب تجرب وتلعب في الميك اب.

من فترة شاريتها لكن حبيت اول شي اجربها بنفسي قبل. الفترة اللي راحت كانت كلها فترة تجارب في مكياج العين. عشان كذا اقدر اكتب واقول انها جدا جدا حلوة♥♥. خصوصا ان الالوان اللي اخترتها (او على الاقل اثنين منها) مناسب للاستخدام اليومي السريع. حبيتها تندمج معك بكل سهولة وتعطيك لمعه مرضية (بالرغم اني اول مره جربتها استخدمتها بدون برايمر للعين) وفعلا كانت جدا جميلة♥، خصوصا اللون اللي مايل على ذهبي او لون الشامبانيا. هذا حق استخدام يومي تحطينه على العين كامله و رسمة بالكحل وانتهى مكياج عينك. حبيته كثير اللمعه اللي فيه بسيطة وماهي مزعجة. تندمج معك بسهوله مثل ما قلت لكن فيه شوي تساقط تحت العين مع الدرجات الغامقة شوي. لكن اتوقع مع الدرجات الفاتحة مثل الذهبي اللي عندي ماكان فيه تساقط بكثره. وما تتعب ابدا في الدمج بالعكس كانها كريميه قوامها جدا حلو بالنسبه لسعرها. 

الشي الوحيد اللي ابدا ما حبيته هو الباكجنق حقها، كذا من ملمسها وفتحها وكذا تحسين ان البلاستيك حقها من النوع الرخيص جدا بعكس الباكجنق حق الارواج واللي حابته فعلا. ما يهمني المراية في الشادو، لكن ليت ثقلون نوع البلاستيك احس لو طاحت بالصدفة في الارض بيتكسر بسهولة. 

الدرجة: Mouve on up 12231

المناكير♥ هو اللي بعد من الاشياء اللي ابهرتني في المجموعه حقتهم. الالوان كلها باردة وحلوة وفيه منها المناسب لفصل الشتاء و اللي مناسب لفصل الصيف و الربيع. البجمنت تبع المناكير لا يعلى عليها. تبهرك من اول ما تحطين و اول طبقه يبان معك المناكير واللون♥♥. كريمي تحسينه و لمعة المناكير جدا جدا جميلة. هاللون هو المفضل عندي ومن شريته وانا دايم احطه لان فعلا فعلا لون حلو و دامج مابين الموف و الرمادي. وهاللون جدا دارج هالموسم. ف انصحكم تشوفونه. و الفرشة حلوة بعد من ناحية انها كبيره ف تغطي الظفر من اول مره

السعر :٦٩ ريال

اخر شي شريته من عندهم هو هالفرشتين. انا قد جربت فرش اتش اند ام وحابتها وللحين استخدمها وقد تكلمت عنها في المدونه هنا. الاولى اللي على اليمين حبيتها لانها كبيره ومايله شوي ف تنفع للبودرة و تحت العين لين حبيت اثبت الكونسيلر تحت العين. و بسرعه تلقط البودرة و تدمج الاشياء بسهوله. وفوق ذا كله ناعمه.

السعر : ٢٦ ريال 

الثانيه حبيتها لانها من الجهتين شهة فيه فرشة المشطوفه و الجهة الثانيه فيها فرشة لتمشيط شعر الحواجب. يعني تعتبر اساسيه وشي عادي دايم نستخدمه لكن حبيت اخصصها للحواجب بس وما يكون لها شي ثاني واكون عارفتها. لكن بصراحة الجهه المشطوفة مو ذاك الزود يعني احسها بلاستيك الشعر اكثر من انه ناعم مثل باقي فرشهم فما اعجبني مره. 

وبس اتمنى تدوينة اليوم اعجبتكم و اذا عندكم اي سؤال تقدرون تتواصلون معي. 

وانتوا هل جربتوا مكياج H&M ، هل اعجبكم ؟ اتركوا ارائكم وتجربتكم مع مجموعتهم هنا نسمع من تجارب بعض ♥♥

فمان الله ♥

WHEN YOU KNOW ME YOU WILL LOVE ME