شنطتي اللعبه من MICHAEL Michael Kors #بربليتا | my mini tiny bag from Micheal Kors #Purprleita

السلام عليكم ورحمة الله وبركاته , 

اخباركم مع هالاسبوع الطويل :( ؟

تدوينة على السريع لأن كثير ناس سألت عن الشنطة :$ 

تفاصيل عن الشنطة

الأسم : 'Hamilton - Mini' Leather Messenger Bag

مكان الشراء : Nordstrom

السعر : 800 مع الشحن 

...

من زمان وانا ودي بشنطة صغيره , لكن انا بطبعي أحب الشناط

الكبيره وما اطلع الا ومية غرض في شنطتي , حتى قريب راح انزل وش في شنطتي اليومية خخخخخ .. 

عموما انا اللي يعرفني يعرف وش كثر احب الاشياء الصغيره :$

الكب كيك - الماكرون - حتى الفطاير و الحلى الاشياء الصغيره 

استملحها و احسها شي كيوت للعين <3 , ف يوم شفت هالشنطة 

في بلوق قورجستا وقريت كلامها عنها "هنا" قررت اشتريها !! 

بس كنت محتارة اطلبها او اشتريها من هنا .. 

وهنا بدت مهمة البحث خخخخخخخخ , رحت لكذا سوق في الرياض وكلهم قالوا مخلصة وماراح يجيبونها :( ! , وكنت ابيها للعيد خصوصا اني مستملحتها مع فستاني , قررت ابحث عنها في الانترنت , ولسعادتي لقيتها ف نوردستروم .. قد تعاملت معهم من قبل وموقع موثوق وسريع ..

تفاصيل الطلب : 

الشي اللي يخليني اتردد من الطلب من هالموقع هو غلاء السعر في الشحن الخارجي او العالمي , يعني هم يشحنون مع DHL , وصحيح انها شركة سريعه في الشحن وتوصلك ف يومين , بس الشحن غالي , بس اني قلت معليش اهم شي توصلني قبل العيد وفعلا وصلت قبل العيد بيومين .. 

الاشياء اللي ما حبيتها : 

هي التغليف سيء جددددا , وتم مراسلتهم بخصوص هالشيء , يعني لو اني لاقيتها هنا كان افضل لي , بتكون في علبة الماركة نفسها وكيس الشنطة ودلع خخخخخخ , بس هنا ف كرتون شحنه عادي مع كيس بلاستيك فقققط !!! واشك انهم يشحنونها بهالشكل داخل امريكا :( ! صحيح الشنطة سليمة بس يعني على الشحن الغالي و كونه موقع مخصص للماركات المفترض يكون فيه اهتمام لتغليف الشحن :( .. 

الشنطة حبيتها جدا جدا جدا , شايفين كيف هي صغيره $_$ !! 

طول الايفون , مربعة سعنووونه , كفت جوالي والميك اب اللي احتاجة لتعديل اي شي ومفتاحي بسسسس , بس انها كيووووت !

واخذت اللون الاسود لأني حبيت استفيد منها , خصوصا اني من الناس اللي تمل وبشكل سريع من الشنط الملونة , لأن فيه منها الوان كثير " بنك - اورنج - ابيض - ..الخ" كنت محتارة بين الابيض و الاسود بس صار الابيض مخلص , وقريت الرفيوز يقولون ان اللون يبدا يروح ف قلت الاسود مع العباية ماراح ينضر مرة , وبعد حسيت ان الاسود مع الذهبي معطي الشنطة فخامه اكثر ..وموضة الشنط الصغيره داخلة وبقوة في فصل الشتاء , زيادة على كذا ماهي خفيفة او تحسين صناعتها رخيصة 

الجلد واقف وقوي , و يمديك تحطينها كروس بودي او بشكل طولي <3 

طريقتي في لبسها يوم العيد :

لأن الفستان قصير , وفيه دانتيل , حسيت ان الشنطة بتعطيه مودرن تتش , وخصوصا انها صغيره فهي بتعطي لمسة كواته للموضوع كله , ومع الهيلز البنك و الأحمر اللي فيه راح يعطي شوي فخامة اكثر للطلة ككل , عموما هذا تنسيقي لها , ولأنها اسود ف انا واثقة اني راح استخدمها كثير , خصوصا في الطلعات السريعه <3 .. 

في النهايه ان شاءلله انه اعجبكم البوست 

خفيف وسريع , وان شاءلله راح يكون فيه تدوينات كثير هالفترة

فإذا في بالكم شي لا تتردون في سؤالي , حبيت اكتب لكم مو بس عن الشنطة لكن عن تجربتي بشكل عام و كيف نسقتها <3 .. 

جميع المعلومات مع رابط الشنطة متوفر فوق ..

صور أكثر في حسابي في الانستقرام 

ولا تنسوني من دعمكم من الرتويت و الفولو <3 

فمان الله 

WHEN YOU KNOW ME YOU WILL LOVE ME

الأرواج الداكنه المفضلة لـ #بربليتا في الشتاء \ #Purpleita favorite dark lipsticks for fall&winter

السلام عليكم ورحمة الله وبركاته 

وكل عام وانتوا بألف خير :$ .. كالعادة متأخرة في تدويناتي :$

وحج مبرور وسعي مشكور لكل من حج <3 

اشتقت للتدوين بشكل , بس للأسف هالاسبوعين كلها

كنت تعبانه :( ! وحتى لو بغيت ما قدرت من الزكمه :(

وللحين ماخفيت .. بس اني ماقدرت اشتقت للتدوين ولكم

بشكل قلت معليش خل انزل بوست لأن مهما كان اعتبره

نوع من التحفيز لنفسي وشي انا احبه واستمتع فيه <3 واستمتع اني اسويه .. 

بوست اليوم عن الارواج الداكنه , واللي يعرف بربليتا يعرف ان عندها ضعف لها الارواج :( .. جد اكتشف اني كل ما جيت اشتري روج جديد يكون من هالارواج الداكنه العنابي او البنفسجي الداكن .. حتى ف الصيف :( .. 

وحبيت اشارككم افضل الارواج اللي احب استخدمها 

وحبيت بعد انوع لكم من الدرق ستور و الهاي اند 

الدرق ستور : رخيصة نوعا ما وتلقينها ف الصيدليات

الهاي اند : غاليه نوعا ما وتلقينها ف المحلات الخاصة 

* التوضيح لأن فيه كثير سالتني وش معناها :$* 

وبعد اغلبها من زمان عندي ف مو كلها راح اذكر اسعارها :$

يلا نبدا 

.....

حبيت اقسمها بشكل مقارب لبعض , وبعد راح اذكر لكم المفضل عندي <3 

1- Revlon color burst - Raspberry 045 

المكان : سنتر بوينت 

2- Lancome - 131 0BAA

المكان : وجوه 

مثل ما انتوا عارفين انا وحدة تعشق هالمجموعه من ريفلون .. 

تقريبا عندي كل الالوان من كولور بيرست , وتكلمت كثير عنها

هي القوام حقها كريمي وكل ما تحطين اكثر كل ما يبان اللون ودرجته عنابي مع اندر تون ازرق , وهالشي بكل صراحة ينفع للاستخدام اليومي , لأن مثل ما انتوا شايفين في الورقة , مرة وحدة يعطيك لون طبيعي للي ما يحبون يجازفون بلون داكن مرة ولكن حابين يتابعون الترند , هالدرجة استخدمه شبه يومي , لأنه كريمي الثبات ماراح يكون قوي مرة .. لكن يرطب ويعطيك اللون اللي في العلبه , وفيه شوي قلتر مثل ماهو واضحة في الصورة <3 . . العلبه أعتبرها انيقة وشكلها كأنه الهاي اند براندز وهالشي مخليني احب هالمجموعه من ريفلون  .. 

بشكل عام :

كريمي - عنابي مع اندر تون ازرق - فيه لمعه - ثبات مو قوي 

ترطيب . 

ثاني واحد اعتبره كريمي واحسه مقارب لقوام ريفلون هو هالروجة من لانكوم . * التصوير مفتح الدرجة شوي* 

وقعت فيه غرامه اول ما شريته , العلبه و اللون فاتن :"( ! , قلت ما اخليه لأن من نقاط الضعف عندي هو هالدرجة في الارواج و المناكير بعد *تتنهد* خخخخخخخخخخخ .. 

نرجع للروج , الريحة حلوة انا من الناس اللي تنفرني بعض الارواج بسبة ريحتها لكن هذا ريحته حلوة وماهي قوية بس لين فتحت العلبه وقربت شوي اشم الريحة , هذا غير ان العلبه فخمه وتحسين انك تشترين شي جدا فخم ويسوى سعره <3 ! 

بالنسبة للروج , عنابي داكن ف العلبه لكن لأنه مخملي شوي ف اللون ماراح يكون مثل العلبه , يعني لازم تعيدين شوي عشان يعطيك نفس النتيجة , اللون العنابي الجميل اللي احس كلنا نبحث عنه , ما ينفع للأستخدام اليومي , اعتبره للمناسبات اكثر لأن النتيجة اللي يعطيك اياها اقوى من ريفلون , مثل ما قلت مخملي مع لمعة بسيطة , يجلس معك من 4 - 5 ساعات <3 .. 

أحب احطه فوق روج ماك اللي عندي *راح اتكلم عنه تحت* ..

عموما اذا حابة تشترين روج عنابي ويسوى سعره ويجلس معك فترة ف انا انصحك فيه , لأن كثير لين استخدمته يسألوني عنه <3 .. 

1- Rimmel  By Kate - Lasting finish - 60

المكان : سنتر بوينت - الصيدليات 

2- TOPSHOP - The Damnd 

المكان : توب شوب 

أول واحد هو الروج من ريميل , اخترته للناس اللي تحب هالدرجات لكن ما تحبها تكون غامقه مرة مثل اللي فوق , وخصوصا ان كثير تحب هالمجموعه من ريمل , لا تنسون انه بسبب الاضائه ف اللون افتح من الطبيعه ... 

اللون جميل جدا , يعطيك درجة أحمريكا على عنابي وشوية لمعة على ازرق , لو دققتي شوي فيه , مخملي و يعطيك اللون اللي ف العلبه من اول ما تحطينه يعني ما يحتاج تعيدين عليه , ما احسه كريمي يعني يرطب مرة , مخملي اكثر من كونه كريمي , أحسه ينفع هالاوقات اللي ما بعد دخلنا ف الشتاء لكن ف نفس الوقت ودك تبدين في هالترند <3 , وخصوصا ملاحظة ف الفاشن شوز اللون اللي استخدموه على العارضات ماهو اللون العنابي الداكن مرة , لكن اللي يعطيك على لون التوت البري كذا هذي الدرجة 

وهاللدرجة من ريميل احسها مناسبة جدا .. الثبات حلو يعني يجلس معك 6ساعات تقريبا بدون اكل طبعا خخخخخخخخ .. لكن للي شفايفهم جافة مثلي انصحك ترطبينها شوي قبل ما تحطينه . . 

ثاني روج من توب شوب , هالروج احبه بشكل خصوصا انه ما عندي ارواج كثير مايله على بنفسجي , وتكلمت عنه قبل في بوست قديم "هنا" لكن عموما انا احبه واحب انه اول ما تحطينه يعطيك على بنك لو مانتي حابة تثقلينه كانه تنت او لمسة خفيفة لشفايفك , وبعدين لو حابة درجة اغمق يمديك تعيدين عليه  ماراح اتكلم عنه أكثر لأني تكلمت عنه قبل وحتى في الانستقرام تكلمت عنه كثير :$ ! 

مثل ما انتوا شايفين ف الورقة , هذا بس مرة وحدة وكيف اللون صاير على بنك  <3 ... 

1- MAC MATTE - Diva - A72

المكان : ماك - غرناطة 

2- Karaja - Mat54 

المكان : موزع كاراجا 

المفضل عندي وحبيب قلبي :$ , هو الروج اللي استخدمته يوم العيد , واللي اذا كنت طالعة مناسبة وابي روج عنابي داكن وثباته قوي هو ماك ديفا <3 , ازعجت صديقاتي فيه واقاربي من كثر ما انا واقعه في غرامه , عموما انا لو ابي روج مات يعني مطفي وثباته قوي يعني ما يسيح *لأن كثير ارواج تسيح تحت الشفايف مع الاكل وكذا* هو الارواج المات من ماك <3 .. 

ثباته قوي يجلس معك 9 ساعات ومجربه هالشي لكن لأنه مات لازم ترطبين شفايفك مرررة . . عموما اذا حابة تشترين روج مات وتبين ثباته قوي ويجلس معك ساعات كثير ف انصحك هالدرجة من ماك <3 , الدرجة تطلع نفسها اللي في العلبه من اول ما تحطينه , يعني من العلبه على طول تطلع الدرجة <3 .. 

مافيه كلام كثير غير اني اعطيه 10/10 <3333 ... 

أحب استخدم فوقه ف نص الشفايف شوي من لانكوم يعطيه شوي لمعه <3 .. 

اخر روج من كاراجا , ما عمري شريت منهم ارواج صراحة , يعني انا دايم اخذ منهم بلشرات <3 , لاني احبها جدا ... 

بس هالروج حسيته راح يكون اضافة جميلة للكلوكشن حقتي :$ 

يعني غير عن الباقين , مو عنابي او بنفسجي , صاير درجة داكنه من الاحمر , وطبعا كلنا نعرف ان الاحمر ماله وقت او فصل <3

ثباته حلو يجلس معك 5 ساعات , ومخملي , اللون يطلع معك من اول ما تحطينه , لكن اعتبره عنابي جاي على احمر شوي ..

فيه لمعة خفييفة جدا يعني ما تلاحظينه مرة , عموما بالنسبة انه اول تجربة شراء روج من كراجا ف انا تفاجئت ف جودته <3 !

حبيته فعلا يعني اعتبره قريب من ماك لكن على افتح شوي و مخملي <3 

بعض النصائح : 

1- غالب البنات تعاني ان الروج ما يطلع نفس ماهو في العلبه

انا ما قد صارت معي كذا , لكن اذا حابة جربي تشترين محدد شفايف نفس درجة الروج وعبي الشفايف كلها وبعدين حطي الروج

2- عشان تثبت الارواج الداكنه يفضل تحطين مرة وحدة وبعدين تطبطبين شفايفك ف المناديل بعدين ترجعين تعيدين عليه هذا الشي راح يساعد روجك يدوم لفترة أطول 

3- هالطريقة ما احبها لكن ممكن تنفع مع بعض البنات , حطيك كريم اساس على شفايفك وبعدين حطي الروج فوقه وهالشي راح يساعد يطلع لون الروج الحقيقي ويكون ثباته اقوى , لكن ما انصحك تسوينها بشكل دائم لان الكريم الاساس راح يجفف شفايفك

وبس هذي نهاية البوست الجميل اللي وانا اصوره تعبت

فعلا لان مهما غيرت الاضائه ما يجي مثل ما انا ابي 

ف تقريبا كلها جت افتح شوي :( ! عموما انا كتبت كافة التفاصيل عشان تشوفونها في المحلات :$ .. 

وهي كلها من المفضلات عندي واحبها وتقريبا كلها انصح فيها

ونوعت لكم بالدرجات و الانواع عشان يكون شي كافي ووافي للي حابين يشترون ارواج داكنه <3 .. 

وانصحك تجربين تشترين واحد منها واعرفي انتي وش تبين 

يعني اذا كان كريمي - مخملي - مات لأن كلها تختلف 

وراح تعطيك نتيجة مختلفة و ثبات مختلف <3 

وإن شاءلله تكونون استفدتم من البوست و النصايح ..

وفي النهاية لا تنسوني من الدعم من رتويت و لايك ف الانستقرام

أحبكم وانكم حتى مع تأخري فيه ناس سالت عني ف الاسك <3

اذا فيه أي سؤال او اسفسار بإمكانكم التواصل معي هنا او على 

الروابط تحت

فمان الله <3

WHEN YOU KNOW ME YOU WILL LOVE ME