السلام عليكم ، كيفكم اليوم ♥ ؟
تدوينة اليوم جديدة و مره متحمسة لها وللفكره حقتها، خصوصا ان الموضوع تجربه من قبل الموقع. في الغرب فيه كثير منتشره فكرة الصندوق اللي توصلك بشكل شهري بمبلغ مادي انتي تدفعينه سنوي او كل ٦ شهور. حتى تطوروا من ناحية فكره الصندوق انه فيه صندوق ميك اب او ملابس وحتى اكل صحي و مكسرات صحيه.
الصندوق هذا اسمه ماجيك بوكس من موقع فانيلا السعودي♥. حبيت فكره الصندوق وانه منوع وكل شهر تقريبا ثيم معين. وهذا ما يخليك تملين من الصندوق واشتراكك فيه. تعبين بيانات معينه وتحطين فيها تفضيلاتك ومنها تجيك اشياء تدور احيانا على حسب تفضيلك انتي. بما ان الموضوع تجريبي،ف الافضل تتواصلون معهم.
الموضوع هالشهر من فانيلا هو (صنع في السعودية) والله ما تعرفون وش كثر فرحت وانا اشوف تنوع الصناعات السعودية ودقتها وجمالها والابداع اللي حاصل فيها. احب لما يكون فيه فكره و صناعه حرفيه او غيرها من البنات و الشباب السعودي. في النهايه اقول الشعوب الثانيه ماهي احسن مننا، وكيف انه اول صندوق وصلني من ماجيك بوكس هو يعبر و يدعم الصناعه السعودية حاجة تثلج الصدر♥♥♥♥♥. لان احنا نحتاج اننا ندعم بعض و ننمي مواهب بعض. ف حبيت كثير هالخطووة من الموقع و اصحاب البوكس انفسهم♥.
البوكس كان كبير نوعا ما ومحتوياته متنوعه وكثيره. فيه من كل بحر قطره♥.
الشغل على الكرت ومحتويات الصندوق جدا راقي♥ و النقشات على الكرت نفسه توحي بالثيم حق الصندوق. ثاني شي حبيته ويدل على مدى احترافيه الشغل♥، و الشي الثاني على كل منتج موجود في الصندوق كرت تبع الماركة يعطي تفصيل بسيط عنها وعن المنتج♥.
راح احكي لكم كل شي بالتفصيل وفي الاخير راح اذكر اكثر شي حبيته في الصندوق لها الشهر.
اول شي ماركة مطر. مؤسسة سعودية شابه ولدت من فكري ادبي صوري.
جاني منهم كيس خدادية♥♥، ابهرني جودته و الطباعه اللي عليه و النقشات و الشغل بكل تفاصيله. حبيت الدمج بين الشماغ و الحروف العربيه، بنات من قوة ماهو اعجبني اقول بحطه في اطار مو خدادية خخخخخخخ♥♥. لكن فعلا حبيته كثير لا من خامة او نقشه او حتى الاهتمام بالتفاصيل الصغيره.
ثاني شي هو اللمسة السحريه : وهي منشفه سحرية تقوم بازاله المكياج وهي منتج سعودي ١٠٠٪♥
متحمسة اجربها واشوف اذا هي فعلا تزيل المكياج مثل المنشفة اللي اللي انتشرت بكثرة بين البلوقرز او لا، لاني انا الماركة الاجنبيه ما استخدمتها، ف حبيت انها هالمنشفة السعودية هي تجربتي الاولى للفكره ككل.
ومن هنا نبدآ بالقرطاسيات و من الاشياء اللي احبها كثير كثير♥♥ هي اي شي يتعلق بالقرطاسية من ناحية تنظيم الوقت او حتى خربشات على الماشي.
اول شي عالم دُوري: هو عبارة عن انتاج بنات سعوديات للهدايا ومستلزمات الحفلات.
اي شي ايجابي محبب لقلبي ويكفي الاسم و الالوان اللي مطبوعه عليه♥، حبيت الكلام وجودة الالوان♥. من جوا مقسم لمهام اسبوعيه للشهر كامل بالوان باستل فاتحة وبين صفحة و الثانيه كلام حلو يشرح الصدر♥. واحلى شي نهاية الدفتر موجود فيه الاذكار عسى الله يعطيهم الف عافيه♥♥. واعترف ان جماله يخليني مابي المسه. لكن اتمنى منهم انه الورق الداخلي حق الدفتر او الاجنده يكون ورق مطفي وهذا تفضيلي الخاص. لان ف الكتابة افضل انه يكون مطفي “^^.
ثاني شي فنجان: وهو متخصص في صنع الهويات المبتكره.
حبيت الدفتر كثير كثير♥♥، وذكرني بالدفتر اللي اسمه werck this journal كان عندي من زمان، كل صفحة تحتوي على فكره او طلب عشوائي ويحفز المخ على التفكير و الابداع. لكن اللي حبيته في دفتر “فنجان” هو انه يحمل الطابع الاسلامي و الاخلاقي في ديننا. مع شقاوة شوي، ولا ننسى ان حجمه الصغير يساعدك في انك تحطينه في شنطتك وتملين فيه وقت الانتظار♥♥.
اخر شي من القرطاسيه هو متجر عذوب. وهو انتاج سعودي لفتاتان.
اللي حبيته هو النقشات اللي على الظروف و بساطتها وجمالها وكيف الكلمات العربيه مطبوعه عليه، لكن كون الظرف ابيض و ازرق ؛يعني التقليدي، احسه قلل من جمال شغلهم ممكن لو كان كله يحمل نفس الطابع حق شغلهم راح يكون اجمل. لكن ما يمنع ان الشغل و الصاميم جميله♥♥.
واخر شي فقرة العناية بالبشره من برييز: علامة سعودية للمستحضرات الطبيه العطريه.
كريم اللمسة المخملية من شركة سعوديه من قوة اللي ما صدقت قلبت الكرتون وشفت انه صنع في السعودية فز قلبي وكان انا اللي صنعته♥♥♥، العلبه و التغليف بشكل عام جيد جدا. لكن ممكن لو كانت العلبه نفسها قزاز ممكن تعطي منظر افخم للشكل العلبه♥. صحيح ان المنظر الخارجي يعطي انه زجاج فاخر. وهذا كان انطباعي اول ما فتحته.
بالنسبه للكريم قوامه ثقيل ويعطي كانه جل لكن يندمج معك بشكل سهل♥. هذا انطباعي الاولى عنه. بس بنشوف بعدين راح ارجع لكم بتقرير كامل عنه.
الحين اقول لكم وش اكثر شي حبيته في الصندوق وهذا شي راح اذكر كل شهر لكم باذن الله♥♥♥. اكثر شي حبيته وابهرني هو كيسة المخدة من مطر. احب انا الدمج ما بين الخط العربي و النقشات العربيه بطريقة بسيطة و انيقه، وها اول شي جاني لما شفت الكيس المخدة♥♥♥.
وبس اتمنى التودينة هذي اعجبتكم شي جديد بالنسبة للمدونه♥.
حبيت التنوع اللي موجود في الصندوق و اختلاف الخامات والمنتجات♥. وحبيت دعمهم للمنتجات السعودية♥. وهالشي يخليني اتحمس لصندوق الشهر الجاي.
التفاصيل تقدرون تتواصلون مع موقع فانيلا.
ياليت تعطوني رايكم اذا حابين تجربون هالصندوق او لا♥.
حبيتوا الفكره او لا؟
واذا فيه اي سؤال او استفسار يسعدني اني اجاوب عليها كلها
فمان الله♥
WHEN YOU KNOW ME YOU WILL LOVE ME
