السلام عليكم ، كيفكم ؟
قبل فتره كانوا سنتر بوينت مسوين عرض على برجوا
اشتري اثنين و الثالث مجانا .. ما ادري اذا العرض للحين موجود عموما انا حبيت انزل هالبوست و اجمع معه مشترياتي من السوق الحره في مطار قطر مره وحدة ^^
السعر بعد الخصم : ٥٨ ريال
الاساس انا كنت رايحة اشتري قلم الكحل منهم $ـ$ عشقي تركت الجل و الكحل السايل بسببه $ـ$ ماعاد استخدم الا هو من فتره طويله ❤ ..
اللي احبه فيه ان قوامه كأنه سايل و السفنجه حقته ما تخرب بسرعه او تجف بسرعه ، حتى زاوية السفنة او حافتها ما تميل او تخرب مثل باقي اقلام الكحل السايل ، و اسووود $ـــ$
احسه يناسب اللي حابين يتعلمون على الكات اي ، لأنه يمشي معك بسهوله وبدون تقطع
السعر : ٥٧ ريال
بعد ما قالت لي عن سالفة الخصم قلت اجرب اشياد من برجوا كثير سامعه مدح عليها ، ف اخذت الروج المات
اخذت درجة البنك قلت للاستعمال اليومي خصوصا مع الصيف و الربيع ، اول ما شريته و استخدمته بغيت ارميه ف الزباله *الله يكرمكم* الريحة حقته جدا غريبه كآنه مناكير او منتهي صلاحيته :| ! لكن بعد ما بحثت ف النت لقيت كثير يشتكون من ريحته ، تركته فتره بعدين رجعت اعطيه فرصه ثانيه واخلي الريحة السيئه ، النتيجة :
- في البدايه قاومه جدا غريب يعني وانتي تحطينه بالسفنجة حقته ما تدرين هو روج ولا قلوس ؟
لكن يثبت معك مات ، احسه جاف جدا على الشفايف ف افضل احذ قبله مرطب ، اللون رائع للاستخدام اليومي و الريحة السيئه فتره وتروح ، ثباته حلو لكن يخف بعد الاكل
لكن ف كل مره استعمله استغرب قوامه كآنهم عجنوا روج وحطوه ف العلبه < ؟
السعر٤٢ريال
اخر شي من برجوا هو البيكد بلش من اقدم البشر اللي موجوده عندهم ، لكني شفتها وحبيت اخذ لي لون لاهو برونز او مشمشي وحبيت هاللون تحديدا ، لاني حسيته بين الحمره و البرونزر !
جميل جدا على التان ، لاني احسه برونز محمر ! وفيه لمعه لكن ماهي قويه بسيطة و خفيفه ، من كثر ما انا حابته افكر اجرب درجات و الوان اكثر من نفس المجموعه ❤..
السعر ٣٩ريال
بعدها رحت لنكس ولقيت عندهم قلم عين ابيض
من فتره طويله وانا ابي كحل عين ابيض ، خصوصا اني اشوف وبشكل واضح تآثيره الجميل على العين
اخذته بدون ما ابحث او اقرا عنه شي وهذا جديد علي خخخخخخ نادرا ما اشتري الشي بدون ما اجلس ابحث عنه حتى لو وسط المحل خخخخخ :$
بس جميل جددددددا ❤❤..الكحل ماهو جاف بالعكس كريمي ويمشي على خط العين الداخلي بشكل سهل ، من شريته وانا استخدمه بشكل يومي وحبيت ان اللي حولي لاحظوا التغيير البسيط ف مكياجي اليومي $ـ$ ، لان ولو انه لمسه بسيطة لكن عطت منظر+توسيع حلو للعين !
الجزء الثاني من مشترياتي، هو من السوق الحره في قطر
وقتها كانوا مسوين تخفيضات على الهاي اند ميك اب ٢٥٪
السعر : ٨٣ ريال قطري
اول واهم شي واكثر شي كنت حريصه اني اشتريه هو السيروم من كيلز ، عندي مثله وراح اكتب بوست كامل عنه لكن من بدت تخلص العلبه الللي عندي وانا in a freaking out mood خخخخخخخ .. كنت ناوية اطلبه بس لما دريت انه موجود ف قطر اخذت علبه اكبر من اللي عندي $ـــ$ !
قريب ان شاءالله راح انزل بوست لكن انصح فيه وبقوه ❤❤..
السعر : ٦٣ريال قطري
بعدها اخذت لي حاجتين من ماك ، اول شي منظف الفرش حقهم ، من حبيت الميك اب وانا ما استخدم الا هو . لكن ما احب امسح او انظف فيه فرش الوجه ، اكثر استعمالي له لفرش العين لان احس الوجه لااازم غسيل ، ولو حابين انزل كيف اعتني بفرشي قولوا لي ^^ .. احبه ويجلس فتره طويله ما يخلص.
السعر : ٨٣ ريال \ ريترو ماك مات
حبيته حبيته حبيته $ــــــ$ !! لونه صابني في مقتل خخخخخ
لان فعلا هاللون ريترو
يعني قديم شوي بس لونه ع الشفايف خيال ومات لكن ما احسه سوبر مات لاني حطيته وما احسه جفف شفايفي مثل باقي الارواج المطفيه من ماك.
السعر : ٩٨٩ريال قطري
من بعد هذا غير عطورات ديور ماراح اشتري
صديقتي قد تكلمت لي عنه بس كنت وقتها واقعه في غرام سي من جورج ارماني ، لكن وقتها ف المطار كان فيه ركن كبير لديور ولما شميت هذا قلت لنفسي : I'm in love
خصوصا انه عود ، وانا احس اني من ذا العجز احب دهن العود و العنبر $ــ$ ، احس مافيه مثلهم شي
انصحكم تروحون لكاونتر ديور وشموه بس T_T
وبس هذي مشترياتي المجمعه خخخخ
ان شاءلله يفيدكم وتعرفون وش الجديد ف السوق او شي حابين تجربونه ، غير كذا اذا عندكم اي سؤال او اسفسار تقدرون تتواصلون معي تحت يهمني رأيكم و تعليقاتكم
فمان الله
WHEN YOU KNOW ME YOU WILL LOVE ME
