السلام عليكم
اليوم راح اتكلم عن مفضلاتي و اشياء جابت لي السعادة في سنة ٢٠١٥. الحمدلله كانت سنة مليئة باشياء تجيب السعادة♥♥. كانت صعبه شوي في بدايتها و متعبه. لكن الحمدلله انتهت باشياء تجلب السعادة و الله يجعل هالسنة مليانه فرح وسعادة علينا وعليكم يارب♥.
راح اتكلم عن كل شي حبيته هالسنة و استخدمته كثير من ميك اب و فاشن و حتى عشوائيات. اتمنى تاخذون لكم كوب قهوه او شاي لاني مطوله ومشتهيه اسولف عليكم شوي :$
اول شي راح اتكلم عن الميك اب لانه هو اكثر شي كان استخدام هالسنة و لاني بعد جربت منه اشياء كثير وفيه حاجات كثير حبيتها هالسنة من ناحية الميك اب.
اول شي الوجه (كريم اساس - كونسيلر - ومثبت )
كريم الاساس من نارس كان من المفضلات لها السنة♥. اشتريته قبل ٥ شهور ومن يومها وانا استخدمه بكثره. احبه لانه يعطي تغطيه كاملة و ينفع للبشرات الجافه الباهته اللي تحسين مافيها حياه. ينفع بعض للبشرات المايلة على صفار. احبه كثير و استخدمه في المناسبات لانه يخفي العيوب و يعطيني اللمعه اللي انا احبها في البشره♥. افضل استخدمه مع البيوتي البلندر من الفرشه وهذا تفضيلي. في هالسنة هو الفاونديشن اللي كل ما احطه اقول ف نفسي (وراني ما احطه كل يوم :|) ! الشي الوحيد اللي ما احبه فيه هو انه ماله عصار ف اضطر يا اصب شوي مره يا كثير بزيادة عن اللزوم.
ثاني شي كونسيلر-خافي عيوب- ، قد تكلمت عن افضل خافي عيوب بالنسبة لي هنا، و لما جيت للسعر و الاستخدام حسيت ان كونسيلر فيت مي من مايبلين هو الافضل هالسنة. كريمي و قوامه يرطب المنطقة تحت لعين لدرجة انه ما يجلس ف الخطوط بشكل سريع. يعطيك تغطيه عاليه واحسه اقرب شي لكونسلير نارس واللي بعد من المفضلات. لكن بالنسبة للسعر احس افضل مايبلين ويكفي انه متوفر في الصيدليات وف كل مكان♥.
وبعد شي ثاني حبيته في الفتره اللي راحت هو بعد من مايبلين♥ ، كريم الاساس الستيك من مجموعة فيت مي. احب اخذ منه درجة غامقه واستخدمه كاساس للكونتور او البرونزر. يثبت لي البرونزر فتره اطول ويجلس معي طول اليوم. وحتى لو ما استخدمت كونتور يعطيك منظر طبيعي وصحي للبشره كان فيها حياه و الشمس معطيتك منظر صحي وشوي تان.
اخر شي و اللي كل وحدة تحب الميك اب او تستخدمه تنصح فيه هو بخاخ فكس بلس من ماك. هذا شي اساسي يكون عند كل وحدة تحب الميك اب وتستسمع فيه. لانه وبكل صراحة ينقل اللوك النهائي لمكياجك لمستوى ثاني مختلف تماما. كل الكلام اللي سمعته عنه وكنت احس انه “مبالغه” صار صح♥♥♥! احب استخدمه قبل وبعد الميك اب. لكن احب لما اخلص مكياجي كامل ابخه على وجهي يدمج كل شي مع بعض وفجآة تحسين مكياجك ارتب و اصفى وماكان فيه بودرة اساسا !
احب بعد استخدمه على عظمة الخد بشكل اكثر لانه يبرز اللمعه اللي بحطها وتكون بارزة و قلوسي اكثر♥.
شي ثاني غير من مكياجي ونقله لمستوى ثاني هو باليت الكونتور و اللايت من كات فون دي، تكلمت عنها في البلوق من قبل و بشكل مفصل هنا. لكن حابة اذكر انها فعلا شي اساسي في مكياجي استخدمها عشان اثبت الكونسيلر واعطي اضاءة لجفون تحت العين و تخفي الهالات بشكل اكثر♥. معها لاحظت ان المسام تختفي بشكل اكبر وتجلس مختفية طول اليوم. تثبت لك كل شي في مكانه استخدم الدرجات الفاتحة منها في كل الاماكن اللي حابه ابرزها في وجهي. وكل الدرجات الغامقه منها في الاماكن اللي ابي اسوي لها كونتور او اصغرها. كل يوم اكتشف فيها شي جديد احبه اكثر وتستاهل كل ريال فيها بكل صراحة♥.
نارس في سنة ٢٠١٥ كانت صديقتي ، مو بس كريم الاساس اللي احبه فيها، حتى البرونزر تبعها و اللي اسمه “كازينو” احبه كثير♥♥. ما يطلع من شنطة الميك اب ومن بعده وانا ساحبه على كل البرونزرات اللي عندي. اللون هذا تحديدا يمشي مع بشرتي “مصفره شوي” يعطيها صحه ومنظر كانها صحيه وطبيعي جدا. احبه لانه فيه لمعه خفيييفه ولونه فيه هنت اورنج ف يعطي Sunk kissed glow .
رغم اني جربت ماسكرات كثير هالسنة، وفيه منها اشياء قديمة لازالت من ضمن المفضلات ومن اكثر الاشياء اللي اجربها. لكن وبكل صراحة هالسنة ماسكارا مايبلين رائعة. وهذي تحديدا لا يعلى عليها. بالنسبة لي تنافس الماركات الغالية مثل بنفت وديور. تكبر العين وتوسعها و تطول الرموش♥♥. صحيح انها من زمان نازلة لكن انا ما شريتها الا مؤخرا ومن يوم ما شريتها ما استخدم الا هي في الايام اللي احط فيها ماسكارا. انصحكم تستخدمونها او حتى تجربونها♥.
لكن في الايام اللي ما استخدم فيها ماسكارا ، احب اركب رموش♥♥. وهذي تحديدا كانت صديقتي في الفتره اللي راحت كلها. احبها لانها تعطي منظر طبيعي وكانك حاطة ماسكارا و الماسكارا هذي تحديدا روعه و تطول رموشك و و ، وانتي في النهايه مركبه رموش. احبها بعد لانها خفيفه جدا على العين وما احس ان فيه شي على عيني. الوحدة منها استخدمها ٤ مرات. توسع العين بشكل و تعطي منظر حلو كثير.
واكثر اشياء استخدمتها هو الكحل الابيض، عندي منه ماركات كثير لكن ماكس فاكتر الكحل الابيض حقهم مره ممتاز♥♥. انا عيني ماهي واسعه مره فما ينفع لها كحل اسود لانه يصغرها زيادة. و الابيض بشكل عام يعطي منظر اوسع للعين ويوسع مدى البياض اللي جوا العين مما يعطي كان عينك اكبر مما هي عليه.
الارواج عندي الماركات تنوعت لكن الدرجة تقريبا هي نفسها على بني او لحمي هيك شي. هذي اكثر شي استخدمته هالسنة لدرجة عندي من حق نارس واحد ثاني من خوفي انه يخلص ولا اقدر اطلبه او اتعيجز. ف قلت يا بنت خذي واحد ثاني يقعد لك. نوعت لكم في الماركات و السعر لان بالنسبة لي كلها حلوات وكلها استخدمتها كثير هالسنة.
ارواج سيفورا المات جدا رائعه ودرجاتها ولا احلى. حتى سعرها حلو ٦٩ ريال. والالوان اللي فيها لحميه و نود على بني او على موف فاتح و عنابي فاتح، كلها الوان دارجة و اللي حاب يجربها انصح في حقات سيفورا♥.
البني هذا تحديدا اللي من اتش اند ام من اجمل الاكتشافات حقت السنة اللي فاتت♥♥. تكلمت عن مجموعة اتش اند للميك اب في المدونة هنا. لكن هذا الدرجة تحديدا اسرت قلبي♥♥ و صارت اساسية في شنطة الميك اب.
وافضلهم واكثرهم استعمالا هم نارس و NYX احب هالاثنين فوق بعض. الدرجات نارس(tonkin) ومن ان واي اكس (London)
وتحتهم محدد ماك سبايس الحب♥.
اتوقع من مفضلات العام ٢٠١٤ هنا، تكلمت عن فرشة الف هذي تحديدا الصغيره هي من الفرش اللي مستحيل اعيش بدونها♥♥♥. ممتازة لدمج و تثبيت الكونسيلر تحت العين. احبها كثير لها المنطقة. و بعد تستعمل لدمج الشادو بشكل عام.
و الفرشة المايلة جمبها عندي من سيجما. عندي من سنين ولكن نادر ما استخدمها. لكن من صرت استخدم كونتور كريمي صرت استخدمها بكثره. وتدمج لك الكونتور على الانف و الخدود بشكل ممتاز.
واخر شي هالمناكير اللي من شريته من اتش اند ام وانا ما اتكلم الا عنه وما احط الا هو. تلقون كافة المعلومات عنه في التدوينة.
لكن من شريته وانا كل ما جيت بحط مناكير القاني ما استخدم الا هو. قوامه رائع و الفرشة كبيره و اللون قاتل.
الحين ننتقل للعناية بالبشره و الجسم بشكل عام.
حطيتهم في صوره وحدة وراح ابدا باليمين. اول شي زيت بيبي جونسون. هالزيت اللي من سنين ما استعمل الا هو لجسمي♥♥. وبشهادة الجميع ولله الحمد بشرتي جدا ناعمه. بالرغم من انا بشرتي جافة جدا. لكن مع استخدام بي بي جونسون وانا بشرتي من افضل لافضل. خصوصا اني انا عجازة من اني استخدم زيوت ثانيه وثقيله وتعلق في الجسم. احب استخدمه بعد الشاور مباشرة وانا جسمي رطب احطه على كامل جسمي وبعدها الحقه بزبدة جسم ثقيله من بودي شوب. انصحكم تجربون هالطريقة وراح تشكروني.
في تدوينات مفضلاتي لسنة ٢٠١٤. تكلمت عن سيروم كيلز♥. و كتبت عنه بعد تدوينة كامله هنا. هالسيروم سحر. في الايام اللي احط فيها ميك اب واستخدمه ف الليل، اقوم من النوم بشرتي اصفى وتكون رطبة. ولاحظت حتى في الايام اللي بادية تطلع فيها حبه ف الليلة اللي استخدمه فيها اقوم من بكره وهي رايحة♥. عندي منه علبه جديدة باك اب لانه وبكل صراحة شي مستحيل استغني عنه. ويشجعني اكثر اني اجرب منتجات كيلز.
عطري هالسنة كان برعاية جفنشي. استخدمه في المناسبات تحت دهن عود عشان يثبته. احبه واحب ريحته♥♥. ما اعرف اوصف الروايح ف انصحكم تروحون وتشمونه وماراح تندمون.
من الاشياء الاساسية عندي بعد كل شاور هو مسك الختام من عبد الصمد القرشي♥. احبه لانه مربوط عندي بالنظافة وفعلا يعطيك هالاحساس، وريحته تجلس معك طول اليوم وانتي تحسين بالنظافة. استخدمه بشكل يومي وهو مع روتين الشاور حقي وانصح كل بنت تشتريه.
اخر شي ومن الاشياء الجديدة اللي استخدمتها مؤخرا هالسنة هو زبدة ازالة المكياج من بودي شوب. تكلمت عنها في تدوينها هنا. لكن فعلا فعلا رائعة عندي شي يشبه لها من ماركة كورية لكن فعلا هي افضل ما تجفف بشرتي رغم ان بشرتي جافه. لكن تتخلص من مكياج العيون بكل سهولة. وكمية بسيطة منها تزيل لك المكياج الوجه كامل حتى اللي ضد الموية.
الحين ننتقل للعشوائيات و اشياء جلبت لي السعادة في السنة اللي راحت.
اول شي الخواتم و هالاثنين تحديدا، انا مره سنتمنتال بالنسبة للاشياء المللبوسة♥♥. خصوصا الخواتم دايم اربطها باشياء صارت لي حلوة او من الشخص اللي اهداني ايااها. ف السنة اللي راحت كانت سنة الخواتم بالنسبة للاكسوارات عندي. الخاتم اللي تحت تحسونه قديم ومكروف لكنه اغلى عندي من ذهب الدنيا كله♥♥♥♥♥. هالخاتم كان هدية من جدتي الله يرحمها ويغفر لها ويجعل مثواها الجنة. ف دايم البسه سواء يناسب ما يناسب احس لما افصخه في شي في يدي ناقص واجلس ادوره. تعودت انه في يدي ويكفي انه شي من ريحة الغاليه.
ثاني واحد احبه لانه جاني ف وقت كانت نفسيتي شوي تعبانه. وكونه قلوب كذا وصغير كيوت♥ويناسب ذوقي بشكل كامل. احبه هالخاتم وهو مع خاتم جدتي الله يرحمها صحيح ستايلهم مختلف لكن كلهم احب البسهم بشكل يومي.
ولاني دودة كتب قلت لازم اذكر كتاب ازعجت كل اللي حولي فيه و كنت اقول لهم اقروه هو We Were Liars. هالكتاب كان هوسي لفترة طويله♥، واحب بين فتره و الثانيه ارجع افتحه و اقرا الاقتباسات اللي اثرت فيني واعجبتني، انصحكم تقرونه خصوصا انه قصير بس نصيحة اشتريه بدون ما تقرين اي شي عنه اقريه وبس. وهذا اصلا الحملة التسويقية حقته. لان اي شي ممكن تقرينه عنه ممكن يحرق عليك الكتاب.
واخر شي واجمل الاشياء اللي شريتها السنة اللي راحت هي الكاميرا الفورية♥♥♥♥♥. انا مهووسة تدوين احب اكتب وادون كل الاشياء الجميلة اللي تصير لي ف السنة، واحب اصور لما اسافر الاشياء اللي تركت فيني اثر♥. لكن وبكل صراحة الكاميرا الفورية غيرت لي تجربتي واضافت لها في التدوين اليومي. لو تشوفين كالندر ٢٠١٥ منتفخة من كثر الصور الفوريه اللي فيها. انا مره صوريه فلما اقرا شي احب اناظر الصورة ويرجعني مخي لذاك المكان تحديدا واحس اني فعلا اعيش اللحظة. لهوات كتابة تدويناتهم اليوميه انصحكم انكم تشترونها. لان فعلا اضافة حلوة لحياتك.
اخر شي فاشني من مفضلات ٢٠١٥، هو هالكعب من ستيف مادن♥♥. افضل كعب شريته السنة اللي راحت. اللون هذا كنت ادوره لي فترة طويله وهالدرجة تحديدا. لانه يمشي مع كثير اشياء انا البسها. وفعلا هو اكثر كعب عندي لبسته هالسنة ما يمر اسبوع او تمر مناسبه الا والبسه. يمشي مع اشياء كثير عندي وينحف الرجل ويعطيها منظر انيق.
- حبيت اقول لكم اني لقيت واحد نفس الدرجة ويشبه له كثير عند زارا قبل كم يوم “ومخفضين بعد”
في النهايه
ادري التدوينة جدا طويله بس هي كتعويض عن الاسبوع اللي راح اللي ما نزلت فيه شي. لاني كنت عارفه انه هالتدوينة راح تكون طويله. لكن بكل صراحة استمعت جدا وانا اكتب واصورها. احب اكتب اهدافي لكل سنة بعضها معنوية وبعضها
اهداف ملموسة. وكل سنة اعيد بعض الاهداف المعنويه مثل:
اجلسي مع ناس تسعدك وتعطيك طاقة ايجابيه وانتي تسوين معها نفس الشي.
تجنبي الاشخاص السلبيه و اللي تنتقد لمجرد الانقاد
احرصي على صديقاتك لانهم صديقات العمر
اقرأي اكثر و نوعي في القراءة
اطمح ان هالسنة تكبر مدونتي فيكم واكون منتظمة اكثر في التدوين ومنوعه اكثر.
اسوي رياضة اكثر واعتني بنوعية اكلي واكون صحية اكثر.
والباقي شخصية اكثر فما اقدر اشارككم فيها.
لكن بشكل عام اطمح اني اكون شخص سعيد اكثر و تسعدني التفاصيل الصغيره اكثر. واحبكم كثير ♥♥♥♥
واجازة سعيدة عليكم.
فمان الله ♥
WHEN YOU KNOW ME YOU WILL LOVE ME
