اهلين، كيفكم اليوم♥؟
من فتره وانا صايرة اهتم اكثر بنوعية اكلي، وبين فتره و الثانية اسوي رجيم معين. لكن اليوم ماراح احكي عن الرجيم و الدايت. اليوم حبيت احكي عن اشياء تساعدك انك تسوين رياضة وتبدين حياة صحية او ستايل صحي اكثر♥♥.
اول شي حطي لك هدف♥♥. هدفك تنقصين وزن ؟ توصلين وزن معين؟ هنا حددي الوزن اللي حابه توصلينه وخلي الفتره اللي تبين تنقصينه فيها فتره معقولة. لان لو نقصتي مثلا ٤ كيلو ف اسبوع اعرفي انك بترجعينها ف يومين خخخخخخخخ.
فيه كثير برامج تساعدك انك تمشين على نظام صحي، خصوصا في الجوال و الايفون تحديدا. لان هو اكثر جهاز ف يدك ٢٤ ساعه ما تتركينه الا وقت النوم. وعن طريقه تقدرين تحفزين نفسك انك تمشين كل يوم من نص ساعه الى ساعه تقريبا. انك تخلصين خطوات المشي حقت اليوم.
البرامج عندي كثير وراح اقسمها لكم عشان تكون ارتب لي ولكم.
اول شي فيه برامج تساعدك انك تتمرنين يوميا. بالنسبة لي اسويها ف الايام اللي ما اقدر امشي او ما عندي وقت اني اروح للممشى.
اول شي ملابس الرياضة:
البرا : نايكي
اللقنق: مانجو
الشوز: نايكي
الحين صار فيه خيارات كثير من ناحية الملابس الرياضية♥♥، وفيه الغالي و الرخيص بالنسبة لي احب برا الرياضية من نايك وجدا مرتاحة معها لانها تثبت الصدر في مكانه. فيه بعد عندي من مانجو و اتش اند ام وكلها حلوات ومريحات وفيها سفنج للي يحبون♥♥. والحين ماركات كثير صارت توفرها بالوان توسع الصدر واشكال كثير واسعار متنوعه تناسب كل الميزانيات. انا اشتريت بس ٢ كتجربه ولما شفتني استمريت في الرياضة و المشي بديت ازيد. عشان كذا لا تتحمسين مره تجمعين بعدين ما تستخدمينها خذي لك لونين مودلين مختلفين عن بعض، واذا لاحظتي انك مستمره كنوع من التشجيع لنفسك اشتري اكثر.
من البرامج اللي احبها واحب استخدمها هي :
-Daily Cardio + Daily Ab
كلهم تتطبيقات على الايفون مجانيه♥♥. الحلو فيها انها تعطيك تمارين لمدة ١٠ دقايق وفي هالعشر دقايق تتمرنين تمارين منوعه و ما تحتاجين فيها اي معدات، بعد الحلو فيها ان فيها عداد يحسب لك الوقت لكل تمرين. انا احب هالنوع من التمارين المنوعه واللي ما تحتاجين فيها اي معدات♥♥♥. طبعا تقدرين تزيدين الوقت مع استمراريتك في التمارين. وفي هالعشر دقايق تحرقين ١٠٠ سعره حرارية. غير لو كنتي من النوع اللي يمشي في البيت او في الجامعه. كل التطبيقين لي فتره استخدمهم وجدا مرتاحة معهم لان ما يحتاج انترنت او معدات كل اللي عليك انك تخصصين ٢٠ دقيقة من يومك لتمارين جسم و معده ومنها تحرقين ٢٠٠ سعره في اليوم.
قناة : FitnessBlinder
وفيه قنوات كثير على اليوتيوب اللي تعطيك تمارين منوعه من المبتدئين للمحترفين، احب اسويها قد ما اقدر لو مره في الاسبوع لانها تحرق اكثر و تشد اكثر من التمارين اللي في التطبيق♥♥. هالقناة تحديدا احبها لان كل فتره والثانيه تنزل تمارين شديدة الى متوسطة كارديو من التمارين اللي احبها لانها متنوعه وتمشي على كافة عضلات الجسم، وهالشي ممتع بالنسبة لي اكثر من اني اجلس ١٠ دقايق مركزة على جزء معين، احبه فيهم انهم في كل تمرين يحطون لك كم حرقتي من السعرات الحرارية في هالتمرين. ويعطونك وقت راحة في التمارين القوية شوي. واحلى شي فيه تمارين بديلة للمبتدئين لكل مقطع. والسعرات اللي يحرقونها لو سويتي التمارين الخفيفه.
الحين انتقل للخطوات و المشي، استخدم ٣ برامج.
- Health
يجي مع الايفون يحسب لك خطواتك و مشيك لليوم كله طول ما الجوال ف يدك او في شنطتك وانتي تمشين يحسب لك اياها♥. اللي اعرفه ان كل شخص لازم اقل شي يمشي ١٠ الف خطوه في اليوم♥. وهو من شريتي الجوال تقريبا يحسب لك خطواتك و الدرجات اللي صعدتيها. احب فيه هالشي انه مو لازم افتحه عشان يحسب لي خطواتي. بكل اريحيه قبل تنامين افتحيه وشوفي معدل مشيك في اليوم او الاسبوع. ومنها تعرفين اذا يبي لك تمشين اكثر او اذا انتي طبيعي او المتوسط. من الاشياء اللي احب اسويها هو اني بدال ما اصعد الاصنصير في كل الاماكن اني اصعد عن طريق الدرج العادي. لان صعود الدرج يحرق لك اكثر من نزوله. لذلك بنات اللي في الجامعه او في الدوام حاولي تصعدين وتنزلين من الدرج افضل لك من ركوب اللفت. وهذا قصدي لما قلت اسلوب حياة صحية اكثر من انه رجيم او دايت معين.
-Running Nike
احبه كثير♥♥♥♥ لما ابدا جولة المشي حقت اليوم. الحلو فيه انه لما تبدين تمشين تفتحينه وتحطين ابدا وهو طول ما انتي تمشين يحسب لك خطواتك، سرعتك، كم سعره احرقتي، وكم كيلو قطعتي، مع الوقت. وبعد يسمح لك تشاركين خطواتك ومشيك مع صديقاتك في السوشال ميديا وهالشي يشجعك اكثر انك تمشين اكثر و تشاركين غيرك في رياضتك اليومية♥. انا احاول امشي نص ساعه يوميا وما اهمل الموضوع. في اليوم هدفي اني امشي ٤ كيلو. وعادي عندي تكون متقطعه يعني في النهار ٢ كيلو و بعد المغرب ٢ كيلو. اهم شي انهي يومي ب ٤ كيلو. وتخيلي لو تمشين ٤ كيلو يوميا لمدة شهر. وانا من الناس اللي امشي مشي سريع زي ما يقولون، بصراحة انا كنت استحي اركض الا شوي بعبايتي. لكن صديقتي جعلها في جنات النعيم قالت لي وشجعتني اني امشي بشكل اسرع لان المشي عادي نتايجه ابطئ وما يحرق شي. لذلك صرت امشي اسرع ومنها اخلص الخطوات و الكيلو اللي محددتها لنفسي. اذا انتي بادية في موضوع المشي جديد نصيحة امشي على الوقت اكثر من الكيلوات. لان الوقت راح يسهل لك الموضوع قولي كل يوم راح امشي ٢٠ دقيقة وبعد فتره زيديها او نقصيها وانتي اللي يناسبك.
-My Diet Dairy
من البرامج اللي تسمح لك تسجلين فيها وجباتك ووش اكلتي في اليوم. ومنها تحسب لك سعراتك اللي تحتاجين تحرقينها في اليوم. لانه يحسب لك السعرات اللي اكلتيها. اول ما تحملينه تحطين وزنك الحالي وطولك و الوزن اللي حابه توصلينه. ما استخدمه كثير لان عشان يحسب لك لازم تفتحينه وتسجلين بشكل يومي وش اكلتي وكذا♥♥.
- My Fitness Pal
اكثر البرامج استمتعت في استخدامها من ناحية تسجيل الاكل اليومي و الوجبات و السعرات، كان جدا ممتع وسهل في تسجيل الاكل لان اغلب الوجبات متوفره بالعربي و بالجرام. واذا ماكانت متوفرة تسوي سكان للاكله من الباركود ويحسب لك سعراتها. حلو نعرف احنا وش نستهلك وهل اكلنا “صحي” فعلا او لا. لانه في النهايه يوريك انتي وش اكلتي من ناحية السكريات و النشويات والدهون و الفيتامينات. وهل انتي اخذتي كفايتك منها او لا، او حتى تعديتي المفروض لك. ينفع للي يستخدمون رجيم السعرات في اكلهم يساعدك كثير في هالموضوع. وعلى اكلك انتي يحدد لك كم تحرقين سعره في اليوم.
هذي البرامج اللي استخدمها بشكل عام، وارتاح معها لانها تساعدك وتذكرك في انك تسوين رياضتك و تمشين اكثر. وكل شخص يسوي اللي يناسبه. لان نمط الحياة من شخص للثاني يختلف. بالنسبة لي ما يناسبني اروح للنادي او اسجل فيه. لان الممشى قريب من بيتي ف افضل اني امشي في الهواء الطلق يوميا على اني اروح للنادي♥♥. لكن كثير يحبون فكرة النادي من ناحية التشجيع و الدروس المنوعه. انتي شوفي اللي يناسبك ولا تخلين شي يمنعك من انك تمشين او تخصصين بس ساعه فقط من يومك الطويل على انك تمشين او تعملين رياضة.
وانتوا ايش اكثر شي حسيتوا يفرق معكم من ناحية الرياضة؟
وهل حابين اتكلم عن انواع الرجيم اللي سويتها؟ فرقت معي او لا؟
في النهايه اتمنى التدوينة فادتكم ، يسعدني تواصلكم معي تحت و عالسناب شات انزل فيه يومياتي وحياتي بطريقة ايجابيه لي ولكم.
فمان الله ♥♥♥
WHEN YOU KNOW ME YOU WILL LOVE ME
