سوالف ، فضفضة ، وهدية لكم #weekWpurpleita ♥

السلام عليكم ، كيفكم ؟

ادري اخر تدوينة من سلسلة “اسبوع مع بربليتا” تاخرت لكن حبيت اخرها شوي لنهاية نوفمبر. 

هالتدوينة جديدة من نوعها وهي فضفضه ، سوالف ، وهديه لكم ^^♥

من الحين احب اقول لكم ان هالتدوينة بتجي حوسة لاني ماعرفت كيف ارتبها لذلك قلت اخليها عفوية خصوصا انها بتجي على هيئة سوالف. 

ليه بديت في التدوين ♥ ؟

التدوين بديته في نهاية سنة ٢٠١٣ و اللي شجعني اني ابدا فيه هو اني احب الميك اب وسوالفه♥♥ وعلى ايام الجامعه كانت مكافأتي كلها تروح على الميك اب وسوالفه. وكنت دايم اذا جربت شي وحبيته فعلا اروح ازعج صديقاتي ولا ارتاح الا لما يشترونه لان احب اقول لهم عن الاشياء الكويسة اللي جربتها وكانت نتيجتها حلوة. 

معنى : when you know me you'll love me

اذكر وحدة سالتني ليه احطها في نهاية كل تدوينة. هو تذكير لي ولكل وحدة فيكم انه اي شخص لما يعرفني او يعرفك فعلا يعرف معدنك راح يحبك، لان فطرتنا كويسة وعلى الاسلام، لذلك احب اذكر نفسي دايم انه صحيح يا لمياء صعب ان الناس تعرفك لكن في النهايه لو عرفوك راح يحبونك ^^

من وين بدا حبي للميك اب ♥؟

الصراحة امي قبل لا ادخل الجامعه اصرت علي اني اخذ دورة في الميك اب ، واخذتها وانا كارهه هالشي، احب اقول انه في هالدورة تعلمت الاساسيات وهي اللي عطتني المفتاح لباب الميك اب و اشياء البنات كلها. ومنها صرت اشوف اليوتيوب طبعا هالحكي قولوا قبل ٥ الى ٦ سنوات. يعني تقريبا بداية كل مقاطع اليوتيوب حقت الميك اب و البيوتي قيرلز في اليوتيوب. واحب اقول ان اول كان فعلا اجمل بكثير من الحين. خصوصا ان اغلب اللي اتابعهم قديمات كانوا ف فعلا كانوا يسوون دروس ميك اب و ريفيوز غير مدفوعه. ومنهم فعلا حبيته وحبيت كل شي له علاقه فيه. 

الميك اب بالنسبه للمياء - بربليتا-؟

هو شي اسويه احيانا في نص الليل وانا جالسة في بيتي وما وراي طلعه. بالنسبه لي هو متعه♥♥ وشي اذا بديت فيه القاني شوي شوي اروق وانبسط♥. ما انسى مره امي دخلت علي الفجر وتلقاني فل ميك اب ! ما يحتاج اقول لكم صدمتها خخخخخخخخخخخ. 

لكن المكياج هو حلاته في اللعب فيه بدون خواف او حواجز احب العب فيه واجرب و اغير استخدامات الفرش. واحب اجازف فيه قد ما اقدر. 

نرجع للمدونة ، احب المدونة فعلا ومو هدفي اني احصل منها على دخل مادي. لكن عندي مشكله وحدة. 

المشكلة:

ان الحافز في الكتابة كل ماله يقل. مع اني احاول شتى الطرق اني انزل بشكل دوري و انوع في التدوين. اللي مقلل التحفيز عندي هو ان رغم ان نسبة المشاهدة كل ماله يرتفع لكن التفاعل كل ماله يقل. بالرغم اني خليت التعليقات بدون اسم او مستخدم. لكن لازال التفاعل قليل جدا. اكثر مكان القى فيه تفاعل هو التويتر. لكن الانستقرام اغلب صور اللي لها علاقة بالمدونة نادر ما يكون عليها اي تفاعل. ليه اقول لكم ؟ لان انتوا احد الاسباب اللي اكتب عشاانها. احب اسولف واكتب لكم لكن لما تسولفين مع احد وتحسين هالشخص مو مهتهم بسالفتك وش راح يصير ؟ راح توقفين. لذلك كثير تجيني فكره اني اوقف التدوين. لكن قررت اكتب لكم يمكن تعطوني اقتراحات ^^ . لان انا بس اجرب وانقل لكم تجربتي مثل لما تجلسين وتسولفين مع صديقاتك عن شي انتي حابته. 

هل بوقف عن التدوين ؟

بصراحة ؟ لا ♥♥♥

 ما اتوقع حتى لو ما كان فيه ذاك التفاعل. صحيح يفضل يكون فيه تفاعل وتعليقات وسوالف واعرفكم اكثر وتعرفوني لكن احب التدوين. القاني لما اكتب مدونة جديدة سعيدة اكثر. ودامه شي يسعدني فما احس اني راح اوقف. لان مكياج وراح نشتري خخخخخخخ  وتجارب اكيد راح نجرب اشياء جديدة. ف بدال ما بس اسولف على صديقاتي اوسع الدائرة واسولف عليكم انتوا بعد :$. 

———— — — — 

طيب الحين خلصنا من الفضفضة. راح احكي لكم عن شي انا جربته العام وقلت اكمل عليه هالسنة ان شاءلله. 

الكالندر او التقويم السنوي من كايت سبيد. 

التفاصيل : هنا

انا حياتي كلها كنت معتمدة على امي او صديقاتي في تذكيري بالواجبات او العروض ايام الجامعه و حياتي الدراسية بشكل عام. احب اعترف ان ذاكرتي مصنوعه في الصين لذلك تلقوني ممكن انسى الشي اللي قلتي في اللحظة اللي ارجع بيتي خخخخخخخخ. لذلك قررت العام اشتري تقويم دفتري. هالتقويم اخذته من كيت سبيد. 

يجنن يجنن يجنن احسه شي ماعاد اقدر استغني عنه في حياتي ♥♥

ليه يجنن♥ ؟ لانه نظم لي حياتي صرت كل شي اكبته فيه♥. ولما اقول كل شي ف انا اعني كل شي. 

اي مناسبة اي طلعه، مواعيد، مهامي اليومية، اهدافي لكل شهر، حتى نظم لي توقيتي في اني انظم نزول البوستات في المدونة. 

حتى افكاري السيئة و الجيدة اكتبها فيه، الحلو في تقويم كيت سبيد انه مقسم.

 اول صفحة لكل شهر فيها جدول يحتوي مربعات صغيره لكل ايام الشهر.

 بعدين الصفحة اللي بعدها ، خمس سطور او ما يقاربها لكل يوم لو حابه تكتبين فيه شي. و فيه فاصل بين كل شهر وشهر يحتوي على اقتباس محفز ^^ 

هالسنة شريت واحد جديد لي ولكم وهذي هديتي لكم ، حبيت اهديكم شي انا حابته واحسه راح يفيدكم فعليا. خصوصا ان السنة الجديدة على الابواب ف حلو انك تحطين لك هدف لها السنة. انك تكونين منظمة اكثر. 

اللي ساعدني انه حتى في طلعاتي ومناسباتي صرت اعرف ان هالاسبوع عندي كذا وكذا ف ارتب وضعي و وقتي على هالاساس. 

تقدرين تستخدمين الوان و ستكرات تساعدك وتشجعك انك تكلمين. وهالشي انا سويته هالسنة. شريت استكرات مليانه تعابير وجه وكل يوم احط ستكر واكتب فيه مشاعري ^^. و ستكر كاميرا ليوم الاحد و الخميس طول الشهر للمدونة. وهكذا فيه ناس كثير على اليوتيوب مبدعين اكثر، لكن انا حبيته بسيط وعملي. 

كل سنة احط لي اهداف حابة احققها السنة هذي ٢٠١٥. هي صحيح مابعد خلصت لكن احب احكي لكم بعض الاشياء اللي حققتها هالسنة ♥ ♥. 

١- تحدي قراءة ٣٠ كتاب هالسنة حققتها الحمدلله.

٢- ادون بشكل اكثر او منتظم ( شبه تحقق خخخخ )

٣- احافظ على صديقاتي بشكل اكبر (تحقق ^^)

الباقيه شخصية نوعا ما. لكن هذا بعضها. وان شاءالله السنة الجاية راح احط لي اهداف جديدة لها. 

بالنسبة لهديتكم ♥:

اخذت لكم الحجم الصغير وحبيته خصوصا لبنات الجامعه او المدرسة راح يساعدكم اكثر في ترتيب جداولكم واختباراتكم. خصوصا انه على الميلادي فقط واغلب الجامعات نظامها على الميلادي. والشكل نفس حقي منقط ذهبي من برا ومن جوا منقط اسود. 

♥

للدخول في الهديه:

١- تكتبين هدف من اهدافك في هشتاق #purpleita2016

٢- تسوين رتويت او لايك على الصورة في التويتر او انستقرام 

٣- تعملين تاق لحسابي في التويتر او انستقرام مع عمل فولو في كلا الحالتين. 

وبس الهديه راح تكون مفتوحة لمدة اسبوع من هالاحد ٢٢ نوفمبر - الاحد ٢٩ نوفمبر. 

اتمنى هالتدوينة تشجعكم انكم تعلقون وتتفاعلون معي بشكل اكبر لان في النهايه هي لي ولكم في وقت واحد

واذا فيه اي سؤال او استفسار تقدرون تتواصلون معي تحت 

فمان الله ♥

WHEN YOU KNOW ME YOU WILL LOVE ME