منتجات خلصتها ورأي فيها #بربليتا | #purpleita products i've used up

السلام عليكم ورحمة الله وبركاته 

كيفكم وش اخباركم ؟

اليوم حبيت اخذ بريك عن #سلسلة_الميك_اب 

لأني ناوية اخر بوست لهالسلسلة يكون شامل لكل من حاب يبتدي في الميك اب 

خصوصا ان كان على هالموضوع طلب كبير وحابة اوفيه حقه ;)

فقلت موضوع اليوم يكون عن منتجات خلصتها او قريب بتخلص 

وبتكلم عن رايي ف كل منتج , من ايجابيات وسلبيات ^^ 

أول منتج هو من كلين&كلير , ما اذكر بكم لأنه من قوة ما انا راميته كان عليه غبار وحالته صعبه جدا P: !
أشتريته يوم كنت ف الجامعه تعرفون مع الحر و تجمعات اليوم على الوجه مهما كان الوجه جاف بيكون فيه لمعان , ف شفت هذا ومكتوب عليه "يومي" قلت بيكون خفيف على بشرتي خصوصا انا بشرتي جافة وما تتحمل الشي الثقيل .. 
أستعملته اول مرة وكانت تجربة فاشلة للأسف , مب بس تخلص من الدهون بس كان قوي جدا على البشره , حتى استعملته كذا بنت وبشراتهم دهنيه وصار لهم نفس النتيجة , اللي هي جفاف شدييد وقشر البشره يعني تعرفون اللي من قو الجفاف ما تقدرين تبتسمين تحسين وجهك بينشق الا شوي خخخخخخ ؟
 ايه هو هذا اثره على بشرتي , وزيادة على كذا تطلع ف منطقة الجبهه زي القشورالبيضاء.. 
عطيته فرصى ثانية وقللت كمية الاستعمال صرت استعمله مرة وحدة ف الاسبوع لكن لاحظت مع استعمالي له ان طلعت لي حبوب و تحسست بشرتي منه ف الاخير :( !
التقييم : ما حبيته وما انصح فيه احد ابد ... 

االمنتج الثاني هو من بياودرما , هو عبارة عن منظف ومزيل للمكياج , سمعت عنه 
كثير من الاجانب , ف أول ماشفته في صيدلية وايتس اخذته على طوول <333 !
ووقعت في حبه:$$, اللي يعرفني يعرف اني امشي وامدح فيه , حتى ما طول عندي وخلصت ثلاث ارباع العلبه , خفيف جدااا على البشره وما يسبب اي نوع من انواع الحساسية او الاحمرار, يزيل المكياج بسهوله و كل اللي اسويه اني احط شوي منه ف قطنة وأزيل به المكياج , حتى اللي ضد الموية يزيله ;) !
خفيف على البشره ويزيل الاوصاخ بشكل ما يؤذيها ..
السعر ف الثمانينات , 85 يمكن :$ 
التقييم : أنصح فيه لأنه خفيف و لطيف و يسوى سعره , وكمية قليلة تكفي <3

المنتج الثالث هو سبريه أو مثبت للشعر ,  من لوريال , عادي مثل اي سبريه ما عندي كلام كثير عنه الا انه خفيف يعني اللي ما تحب ان شعرها ييبس بس تبي اللفه تنمسك تستخدم هالمثبت , لكن ما ادري فجأة خلص ! , احسه فضى من نفسه ما احس اني استخدمته كثير , مدري المشكلة كانت من استعمالي او منه , المهم انه جميل وخفيف 

المنتج الرابع : عطر من لانكوم , هالعطر حكاية عشق انا وياه , شوفوا قبل لا اتكلم احب اقول اني انا وحدة تمل من العطور بسرعه وبشكل سريع اغيرها :$ ! 
بس هالعطر حبيته ومن اجمل العطورات اللي شريتها , حتى نادرا ما اخلص العطور عندي بس هذا صايرة ابخ شوي عشان ما يخلص :( وعارفة اني لازم اشتري شي جديد واودعه خخخخخخخ :$ , العطر قوي شوي بس مو اللي تصدع ف الراس , ما احسه معروف مثل باقي العطور اللي من كثر ما تشمينها تملين منها :# ! العكس مميزه ريحته لكن ينفع اكثر للطلعات , وكم بخة منه تكفي <333 ! انا فاشلة في وصف الروائح 
بس لين شميته احس فيه شي قديم يعني يذكرك بشي قديم :$$ !
التقييم : رائع وجميل , السعر 500 من سيفورا رياض قاليري 

المنتج الخامس : هي ماسكرا قديمة شوي من مايبلين , قديمة وكانت عند الجميع واتوقع
من قدمها انتهت صلاحيتها , لكني احبها وهذي ثاني وحدة اشتريها , مدري احسها من الفرش اللي تحطينها ف شنطة الميك اب ف شنطتك و تستعملينها بدون ما تفكرين فرشتها كثيفة , وتصلح للأستعمال اليومي , أحيانا استعملها فوق الماسكرا اللي انا استعملها بسبة فرشتها احسها تفرد و تكثف الماسكرا اللي انا حاطتها <33 ! 
منزلين وحدة جديدة تشبه لعلبتها , لكن ما بعد جربتها , عموما هي من الماسكرات اللي نجحوا مايبلين في انتاجها ..
التقييم : للأستعمال اليومي , وتقوم بالتكثيف حبيتها , هذي ثاني حبه عندي <3

المنتج السادس : هو من ميك اب فورافر , الستنق سبراي حقهم , من الاشياء اللي تحسفت اني اخذتها منهم , ما احسه يسوي شي :/ ! بالعكس احسه يخرب كريم الاساس خصوصا بعد ما يكون ثبت شوي على البشره , احاول فيه احاول اقنع نفسي فيه بس ماااش عجزت , هالبخاخ استعملته قبل الميك اب وبعده وما احس انه سوا شي ف مكياجي او خلاه يدوم بشكل اطول :/ ! حتى مرة جربت مكياجي بدونه و به ولا احس فيه اي فرق ! , الشي الوحيد اللي استعمله له واحس انه هه ممكن سوا شي هو اني ابخ شوي على فرشة كريم الاساس بعد وضع الاساس و امشي بها بشكل خفيف على الوجه احسه يخفف الجفاف ف المناطق اللي يكون فيها الكريم متعلق فيها ويخلي مظهرها طبيعي , غير كذا ما يثبت او يخلي كريم الاساس يدوم لفترة اطول 
التقييم : جيد .. ما راح اشتريه مرة ثانية  

المنتج السابع : كحل جيل من ماك , وهذا من اشهر المنتجات عندهم يعني كثيير ناس تعرفه و تكلمت عنه , هو اول كحل جل شريته , بقول لكم تجربتي معه مثل القصه خخخخخخ ! 
اول ما شريته حبيته ومدحته عند كثير من الناس , لانه سهل علي عملية رسم الكحل ويمديني اخففه واثقله , وكل شي كان جميل بيننا , لكن بعد فترة لاحظت انه بدأ يجف :/!
وبدا يصير ثقيل علي اني امشيه على عيني او جفنها  , وحتى اني اخذه بالفرشة لدرجة 
انه صار زي الكتل صغيره واللي صارت تطيح :/ ! مع انه ما طول وهو عندي لكن جف بشكل غريب :/ ! شوي شوي لقيتني ما استعمله وابعد عنه لأني حاولت فيه واني استعمله بس ماش , وعقب فترة اكتشفت اني مو لحالي وانه كثير من الناس يشتكون من هالشي ... ماك المفروض تلقى لها المشكلة حل يعني مب من رخصه عشان يخرب ف شهرين :) ! 
التقييم : جميل وسهل الرسم فيه لكن قبل لا يجف وينشف :/ ... ماراح اشتريه مرة ثانية

المنتج الثامن : روج ريفلون , العشق <33 ! هالروج اسمه " soft rose " ومن اجمل الارواج اللي طلعت بها ريفلون في هالمجموعه <33 ! , الروج هذا استخدمته شبه يومي في الجامعه وما ساح مع انه كان مرمي ف شنطة الجامعه , وكذا اقدره على هالشي P: 
يعطي لون طبيعي ويرطب الشفايف , صحيح ما يدوم لفترة طويلة , لكن انا عادي عندي هالشي لأن يهمني الترطيب ف الدوام , خصوصا انا شفايفي تجف بسسرعه ! 
هو يعتبر من اكثر الارواج مبيعا في هالمجموعه <33 ! 
احسه من الارواج اللي تحطينها تبع الاساسيات ف المجموعه حقتك , لأنه يرطب ولونه جميل لحمي على شوي حمار , وما راح تملين منه <3 !
التقييم : جميل جددددا وراح اشتريه مرة ثانية وثالثه <3 

اخر منتج : هو شمعه من باث&بودي ووركس , طبعا شموعهم اعتبرها من افضل الشموع عندنا , وهالشمعه بالذات احبها <33 ! هذي ثاني علبه منها و عندي ثالثه جديدة :$$ ! اعرف بتقولون ادمان , وبقول لكم ايه نعم , من الشموع اللي ريحتها غريبه اسمها "اوراق" لكن ريحتها ما احسها ريحة ورق محترق خخخخخخخ :# ! ما اعرف اوصف الروائح لكنها تبع المجموعه الشتوية ف ريحتها اقوى و اثقل من روائح الصيف , كثير يحبون هالريحة وانا منهم <33 ! , هالشمعه تطول على ما تخلص والريحة تجلس ف الغرفه حتى بعد ما تطفينها تقريبا تقعد يوم كامل <333! ومع الشتاء تحسينها صدق تعطي شعور انه دفى الجو <33 ! ما استعملها ف الصيف الا اذا مسكت معي احيانا اني اشمها :$$ 
اخذتها ب 30 ريال بعد الخصم , وغالبا اشتري روائح الشتاء ف الصسف لانهم يكونون مخفضين عليها وهي بينزلونها نفسها ف الشتاء بالسعر حقهم اللي 95 ريال :/ ! 
التقييم : من الروائح اللي ما امل منها واحبها و اشتريها مره ثانية <3

وبكذا نكون خلصنا , واستمتعت جدددا وانا اشتغل على هالبوست <3 , حسيت اني جالسة اسولف على صديقاتي وهذا عطاني شعور جميل وان شاءلله يكون هالشعور وصل لكم <3 

أخيرا لا تنسوني من دعمكم وتعليقاتكم من نشر للتدوينات او الفولو على بلوق لوفين في اليمين ;) !

اذا فيه أي سؤال او استفسار بإمكانكم التواصل معي هنا او على الروابط تحت

فمان الله <3

WHEN YOU KNOW ME YOU WILL LOVE ME