1-سلسلة الميك اب \ مكياج يومي #بربليتا | #purpleita makeup series \ everyday makeup

السلام عليكم ورحمة الله وبركاته

كيفكم ؟ وش اخباركم ^^؟

الشهر عليكم مبارك , والله يجعلنا من صوامه وقوامه يارب

تدوينة اليوم راح تكون أول تدوينة او بوست لسلسلة الميك اب , حبيت أنزل هالسلسلة في رمضان بما أن العيد قرب والتجهيزات له وكذا , هذا أول درس وأن شاءلله مايكون الأخير ♥

قبل لا ابدا حابة أقول اني حابة افيدكم اولا وأخيرا بخبرتي المتواضعه , ما اتفلسف او اوريكم الاشياء اللي عندي , العكس تماما وان شاءلله تستفيدون من تدوينة اليوم ♥

اليوم راح يكون عن الميك اب اليومي , او السريع هالشي اخترت أبدا فيه لأني اسويه بشكل سريع ما ياخذ مني ولا 10 دقايق , راح تحسون مع الشرح أنه طويل لكن أوعدكم اذا سويته بنفسك ماراح ياخذ منك أي وقت , خصوصا اني انا اروح له اللوك اذا كنت مستعجلة ;)

طبعا بعد ما تغسلين وجهك وتستخدمين منظف البشره و الكريم نبدأ بالبرايمر ^^

البرايمر هذا من بنفت , احبه لأنه خفيف ولأن بشرتي جافة و احيانا تكون دهنيه في مناطق معينه وهالبرايمر يخفي المسامات ولو كانت صغيره و يكون طبقة عازلة بين بشرتك و الميك اب , انا ما احطه ف كل وجهي احطه ف المنطقة اللي حول الأنف او اللي ممكن تكون دهينه بعدين ^^

بعد البرايمر نجي لكريم الأساس , ف الطلعات الخفيفة وخصوصا اذا كنت مستعجلة ولا لي خلق افكر ف كريم الاساس استخدم هالكريم اللي هو " شانيل أكوا" أحبه كثير لأنه خفيف على بشرتك ويعطيها نضاره خصوصا للبشرات الجافة, هو اقرب لتنتد او البي بي كريم , لكني افضله أكثر ما ادري احس اني بعد ما استعمله تكون بشرتي اليوم الثاني مو تعبانه او مرهقه :$ , قبل ما استعمله ارجه بقوه لأنه يتفكك شوي ف لازم ترجينه قبل و بعدين استخدم الفرشة من سيجما " flat top F80".

بعد ما اترك كريم الاساس شوي ف بشرتي , انتقل للكونسيلر او خافي العيوب , ولأن هالميك اب لطلعه خفيفة او يومي احب استخدم خافي العيوب من قارنيه "Rool-on" , الكورة الباردة اللي فيه احسها تريح جفن عيني و لأنه سائل احسه ما يجفف الجفن , ثباته اكيد مو قوي بس مو لدرجة اللي يسيح وكذا لكنه يغطي الهالات <33!

الحين ننتقل للعين و الشي الجميل ف عملية وضع المكياج بالنسبة لي هي العين احب العب و استمتع ف هالمرحلة , لأن المكياج عشان تستمعي فيه خذيه على انه شي انتي تستخدمينه عشان تظهرين الاشياء الجميلة واللي تحبينها ف بشرتك وتخفين اللي ما تبين العالم مرة ينتبهون له ;) !

قبل لا نبدا بوضع الشدو نستخدم برايمر للعين , عمل البرايمر هو انه يكون عازل عن الزيوت اللي يطلعها الجفن من الشدو وكذا يدوم مكياجك فترة اطول ولا يتكتل او يتجمع ف مكان معين !هالبرايمر من اربن ديكاي , وهذي عينه  اللي تجي مع اربن دكاي نيكد ^^

بعد البرايمر ننتقل للشدو , ولأننا بنكون مستعجلين ومالنا خلق "هذا انا :$" أحب اقول لكم وبكل صراحة اني دائما وابدا اروح لها الكريم أي شدو من ميك اب فورافر :$$!!

لأنه ما يحتاج فرشة ما يحتاج تعب ابد حطي شوي ف اصبعك و مرريه على الجفن , والباقي من اصبعك احب اثقل شوي عند جفن العين ويبدا يخف كل ما رقيت فوق عند صفطة العين

وما يتحرك ولا راح يتلحلح من مكانه واللون جميل جدا , ذهبي على لمحة خفيفة من البنك او زي ما يقولون " rose gold" , وتقدرين تخلينه مرة قوي او خفيف *_^ !

بعدها عشان نبعد شوي التعب عن العين ونكبرها شوي اخذي اصبعك الصغير و حطي شوي من venus من " Naked basics" أو أي لمعه خفيفة عندك وحطيه في زاوية العين بس شي بسيط وراح تلاحظين الفرق <33 !

بعد كذا تقدرين توقفين وتحطين شوي ماسكرا وبكذا تكونين خالصة , لكن اذا كان عندك شوي وقت وحابة تلعبين زيادة بالميك اب ;p , استخدمي الكحل او الجل لاينر وارسمي الـ " cat eye"  " انا هنا استخدمت الكحل السايل من ميك اب فورافر , و استخدم الفرشة اللي تجي معه لكن لو حست شوي او حابة امد الرسمة زيادة استخدم الفرشة اللي تجي زي المشطوفة مثل ما هو واضح في الصورة

الحين الماسكارا , أنا مهما كان اللوك طبيعي ما احب استخدم الا ماسكرا ضد الموية لأنها مو بس ما تسيح وتخلي لك زيادة هالات سوداء P:, بس تدوم فترة أطول ولا تتناثر او تتكسر , احب استخدم ماسكارا من بنفت اسمها " they're real ! ", مثل ما انتوا شايفين الفرشة نحيفة وهالنحف يسمع لها انها تطول رموشك وتفردها اكثر + تسمح لك انك توصلين للشعرات الصغار ف رموشك و تبرزينها ;) !

بكذا نكون خلصنا العين :D, الحين ننتقل للحواجب , لأن الميك اب ماهو ثقيل يمديك تثقلين حواجبك او ترسمينها زي ما انتي تحبين , أنا لأني احب اللوك يكون كله طبيعي استخدم " smokin' eyes" " من بنفت , البودرة اللي تحت احب استخدمها لأنها على رمادي و انا حواجبي سوداء , لكن اذا حواجبك افتح او على بني استخدمي درجة افتح من لون حواجبك بدرجة وما يكون فيها لمعه اكيد ^^ ! طبعا استخدم هالفرشة المشطوفة وهي وحدة ثانية غير عن اللي رسمت فيها الكحل لأني افضل استخدم شي نظيف ,بكذا بشكل خفيف عبي حواجبك ..

بعد كذا ننتقل للخدود , احب استعمل البرونز باودر من برجوا , لكن مو عشان اسوي كونتور او تحت عظمة الخد , لا احب احط شي بسيط على الخد ككل , لأن هالبودرة ماهي على بني او على ترابي فيها شوية حمره شوي مشمشي واللمعه تسمح لك انك تستخدمينه كبلش وهذا انا اسويه .. أستخدم معها فرشة سيجما من نفس المجموعه رقم "F84" أو فرشة بلشر عادية ^^

أخر مرحلة هو الروج , هالروج هو ادماني الجديد مهما حاولت القاني اروح له , اللون مرعب شوي بتقولون كيف يا لمياء تقولين لوك طبيعي وتستخدمين هالدرجة :O ؟

بقول لك ان هالروج مات اول شي ومع كذا كريمي يعني يرطب الشفايف , واللون فيه بإمكانك تخلينه خفيييف لدرجة كأنه على بنك او فوشي او تعيدين عليه لين ما يوصل للدرجة اللي ف علبة الروج نفسها , الروج من توب شوب أسمه "  the damnd " جدا انصح فيه خصوصا هالدرجة لأن تنفع للصيف و الشتاء وبإمكانك تثقلينه او تخلينه خفيف و الدرجة بتشوفونها ف الرسمه تحت ما كأنه من نفس العلبه P: !

هنا حاولت اني اوريكم المكياج على الوجه , وان شاءلله يكون واضح طبعا خليته شوي ثقيل عشان الورقة تعبتني شوي يالله يبان فيها اللون وحطوا ف بالكم انها مسطحة مو ثلاثية الابعاد مثلنا كأوادم XD ! , اللمعة اللي ف زاوية العين ما بانت لأن الشدو كان على ابيض شوي ف تبخرت =-="!!

بكذا نكون خلصنا الميك اب اليومي , ما استخدم بودرة الا نادرا ,لكن بإمكانك تستخدمين أي بودرة تناسب وجهك , مثل ستاي مات حبيبة الكل ;) !

في النهايه اقول ان شاءلله استفدتم لو شي بسيط , وان شاءلله ما اكون كثرت عليكم حكي

اول مرة اجرب هالشي اني اقول لأحد كيف احط مكياجي خطوة بخطوة خخخخخخخخ , جد شي غريب ولا فجأة اناظر وجهي ف المراية واتخيلني احطه ف نفس اللحظة عشان ما انسى شي خخخخخخخخخخخخخخ ! ولو حابين أني انزل تدوينة عن كيف طريقة الرسمه خبروني في التعليقات تحت وان شاءلله راح اخصص تدوينة ف السلسلة لها الشي ...

* بالنسبة للرسمه مستقبلا ف التدوينات الجاية حابين انزل كيف حطيت المكياج عليها خطوة بخطوة ولا مثل اليوم ؟ قلت هالمرة اسوي كذا و بعدين اشوف وش تفضلون ^^ <33

لا تنسوني من دعمكم وتعليقاتكم من نشر للتدوينات او الفولو على بلوق لوفين في اليمين ;) !

اذا فيه أي سؤال او اسفسار بإمكانكم التواصل معي هنا او على الروابط تحت

فمان الله <3

WHEN YOU KNOW ME YOU WILL LOVE ME