1- سلسلة العودة للمدارس مع #بربليتا / Back 2 School With #Purpleita

السلام عليكم ورحمة الله وبركاته 

كل عام وانتوا بخير ولو انها متأخرة 

والله يعيده علينا جميع بالصحة والعافيه يارب <3

من متى وانا بشتغل على أكثر شي متحمسة له هو هالسلسلة 

بس انشغلت مع العيد وما بعد العيد "^^ !

المهم اخيرا جاء اليوم اللي انزل فيه سلسلة العودة للجامعة/المدرسة مع #بربليتا <333 !

البوست اليوم راح يكون عن الميك اب اليومي او الخفيف 

جدددا وسهل جدددا للجامعه و اذا ماكان عندك اي وقت <3

وبعد بعض النصايح للمبتدئات , ف طولوا بالكم شوي معي :$

لأن البوست بيكون طويل شوي <3

اول شي قبل تحطين اي ميك اب ومهما كنتي مستعجلة , لازم ومهم جدا تحطين واقي شمس , انا هذا من نيتروجينا <3 ! 

استخدمته طول ما كنت في الجامعه <3 , وبصراحة ما اقدر استغني عنه , من افضل الكريمات الواقية , مو بس انه خفيف و يعطي مات فنش , يعني ما يعطيك اللمعه القبيحة حقت واقيات الشمس ومافيه ريحتها الغبيه =-= " !! 

اخذته من الصيدلية اللي عند بيتنا :$ , بـ 55 ريال .. 

جربت كذا واحد غيره وماركات كويسة بس لأن بشرتي حساسة بعد ما استخدمها تطلع لي حبوب .. 

أنصح انك تحطين قبله كريم الوجه العادي وبعدين شوي منه لأن يكفي قليل <3 .. 

بعد كذا أستخدمي البي بي كريم وهنا بتكلم بشكل اطول عن البي بي كريمز .. 

1- قارنيه بي بي كريم , مخصص للبشرات الجاااافه , ما ينفع للمختلطة او العادية 

2- فيه كمية ترطيب , واقي شمس 15SPF , فيه منه 3 درجات 

انا اخذت اللايت . . 

3- اخذته من الدانوب اول ما نزل بـ 29 ريال .. 

4- فيه رائحة عطرية , ورغم الكلام الكثير السلبي عنه , اعجبني :| !! واعجب صديقاتي بعد !! , جد كلنا بشراتنا جااافة واستخدمته كثير ف الجامعه , ومع كذا الحمدلله ما تحسست بشرتي منه وما طلع لي حبوب " مثل ماكان يُقال عنه " , احبه لأنه يعطيني ديوي فنش و يعطي تغطية جميلة وما احسه ثقيل على بشرتي <3 

الحين بتكلم عن كيف تختارين اللي يناسبك : 

1-  اعرفي نوع بشرتك : ( دهنيه - جافه - عاديه - مختلطة ) 

2- أعرفي الاندر تون حق بشرتك : ( سمراء - صفراء - وردية )

3- أعرفي اساس الفاونديشن ايش : ( زيت - موية ) 

4- اهم نقطة اختاري أفتح من يدك بدرجتين او درجة اذا كانت يدك ماهي سمراء مرة من الشمس .. 

5- لا تترددين ابدا ف انك تجربين كذا درجة وتاخذين وقتك وانتي تختارين , لأن كثير اشوف بنات يختارون افتح من وجيههم بكثير 

لدرجة يطلع وجهها لون ورقبتها لون ثاني , وهذا الشي غلط :( !

عادي اعتزي بلونك وببشرتك , سواء سمراء او بيضاء ! 

لأن تأكدي مهما حاولتي تفتحين بيبان .. وبعد اذا حطيتي لون افتح من بشرتك راح مع الوقت يقلب على رمادي .

اختاري اللون اللي بيناسب لون بشرتك , لأنك بتكونين احلى اذا كان لون وجهك ورقبتك نفس اللون وبيكون شكلك طبيعي اكثر <3 

6- اعرفي بالضبط انتي وش حابة تشترين او ووش اللي انتي حابة تاخذينه لبشرتك ( تغطية كاملة - وسط - خفيفة ) 

7-  هل تبين ( فاونديشن - تنتد موسترايزر - بي بي كريم ) 

لأن لكل واحد منهم وظيفة معينه و خصائص غير عن الثاني ..

8- وهذا شي انا انصحك فيه وبقوة لأني انا اسوية .. أبحثي واقري كثيير قبل لا تشترين اي شي , خصوصا اذا كان هاي اند يعني من الاشياء الغالية لأن ما عندنا سياسة الترجيع :) ! 

انواع البشرات :

البشرة الدهنيه :

 نقول بشرتك دهنيه وفيها حبوب ف يعني تحتاج تغطية اكثر . .

قبل كل شي تقشرينها - ترطبينها - تقومين بوضع البرايمر " طبقه عازلة بين البشرة و الفاونديشن , عملها انها تحمي بشرتك و تمنع الدهون من تفكيك الفاونيدشن" .

بعد كذا ابحثي عن كريم اساس اساسة او مافيه زيوت , خالي من الزيوت واساسه موية , لأن الزيوت راح تزيد كمية اللمعان في وجهك فوق الدهون اللي اساسا موجودة فيه , يفضل يكون مات فنش , او مخملي لأنه مع الوقت اكيد بيبدا يدهن وجهك لكن مع الفنش حقت الفاونديشن راح يعطيك لمعه صحية <3 !

ولا تكثرين من الكريم لأن كلنا ما نبي هالطبقه الثقيلة على الوجه , مع الوقت وجخك اللي راح يتعب من هالشي :( !

يفضل تستخدمين سفنجة او فرشة مع وضع الفاونديشن , وما تستخدمين يدك او اصابعك لأن يدك اساسا بيكون فيها دهون ومع وضع الفاونديشن راح يروح بعضه في اصابعك .. 

البشرة الجافة : 

وهذا نوع بشرتي , وما اكذب عليكم اول ما دخلت في الميك اب تعبت كثير كثير فيها , لأن كانت بشرتي تشرب كل كريم الاساس من الجفاف رغم اني ارطبها وكان فيه عدة اسباب لها الشي ,, 

البشرة الجافة تحتاج ترطيب , ف مع كريم الوجه لازم تختارين كريم اساس خفيف و كريمي او سائل لأنه بيكون فيه عوامل ترطب و تعطي ديوي فنش او نضرة صحية لبشرتك <3 ! 

بدال الجفاف , ومع انها جافة لكن بعد تحتاج لبرايمر , لأن كل ماكانت البشرة جافة كل ما كانت حساسة , ف بدال ما تشرب كريم اساسك اللي بعد فترة بيضرها , احسن انك تحطين العازل اللي بينك وبين الفاونديشن , افضل انا البرايمر الخفيف واحطه فقط في التي زون <3 

افضل طريقة لوضع كريم الاساس للبشرات الجافة هي بالفرشة , جربت السفنجة وما نفعت معي ابدا لأنه طلعت الجفاف فيني اكثر 

ف الفرشة تاخذ اقل كمية من الكريم الاساس و الباقي يكون على بشرتك <3 .. 

 بعد وضع البي بي كريم , احط خافي العيوب تحت العين , و هالخافي خفيف جدا وكريمي , يعطيك تغطية متوسطة , قليل منه يكفي , طريقتي في وضع اني امشي الكورة الباردة<3 واطبطب بأصبعي على المنطقة , ثباته جميل ما يتحرك من مكانه الا بعد فترة , ولأن الميك اب صباحي وسريع ف الافضل انك تحطين شي خفيف عشان ما تتعب العين <3 

هذا بعد من قارنيه ..

 بعد وضع كريم الاساس و الكونسيلر , اخذ فرشة كبيرة و امررها على البرونزر و امررها على تقريبا اغلب مناطق الوجه عشان يعطي لون للبشره وما تكون باهته .. لأن اكيد كلنا تجيك ذيك الايام اللي نسهر فيها ونقوم من النوم الوجه باهت وتعبان P:

ف بدال ما تتعبين وجهك بكريم اساس ثقيل و كونسيلر على كل وجهك , لما تحطين برونزر بفرشة كبيرة ماراح يعطيك كونتور وبس راح يعطي لون بشرتك نضارة.. الأماكن اللي اوزع فيها البرونزر هي ( الخدود - جوانب الجبهه - الجبهه بشكل خفيف - جوانب الانف ) .. 

الفرشة اللي استخدمها هي فرشة البلشر , مثل ماهو واضح ف الصورة كبيرة وراح توزع البرونزر بشكل جميل <3

بعد كذا تحطين الماسكارا , هالماسكرا من مايبلين , المشهوره ذا فولسيز , انا غلطت غلط كبير اني كنت مستعجلة واخذت وحدة عادية مب ضد الموية , وبهذلتني :( ! بس اني كالعادة استخدمها وما علي خخخخخخخخخخ , اخذتها من سنتر بوينت 

جميلة صراحة و المرونة في المسكة حقتها تسمح لها انها ترفع الرموش اكثر و تعطي الرموش كثافة و طول <3 ! 

رطبة يعني ماهي جافة وما تنشف بسرعه هالشي عرفته من الرطوبة اللي فيها وهذا شي مررة بطل , بس لازم تعرفين كيف تحطينها لأن اذا ما عرفتي راح يتكتل في رموشك :( ! 

أخر مرحلة هي الروج , يفضل تختارين روج على وردي او لون قريب من لون شفايفك , أنا هالروج عاش معي طول فترة الجامعه وهذي ثاني علبه اشتريها منه خخخخخخخخخخخخخ <33 ! 

مب ماركة معروفة ولا عمري فكرت اوقف لحظة واقرا ماركته الا اليوم وانا اصورها خخخخخخخخخخخخ :$$ ! 

من محلات المكياج في الاسواق العادية , سعره ما اذكر بس اتوقع في الثلاثينات <33 
المهم انه جميل ويعطي لون وثبات ولا اروع , مات لكن يرطب الشفايف , يجلس معك حول الخمس الى 6 ساعات <3 ! 
أنصح فيه وانصح بهاللون تحديدا لأن ما قد شريت الا هاللون من عندهم <3 ! 

وبكذا تقدرين توقفين ويكون شكلك ولا اجمل , طبعا اذا كانت بشرتك دهنيه ف افضل انك تحطين بودرة بشكل خفيف و تودينها معك <3 ! لكن اذا حابة تشخصين وتتميلحين ذاك اليوم خخخخ ف كملي معي لوضع الايشدو <3 ..

دورت في الشدوهات اللي عندي و فكرت لو بحط شدو ف الجامعه مع اني ما عمري حطيت :$ ! انا أكثر عجز من اني احط خخخخخخخ :$ ! قلت استخدم هالكيت من بنفت , عندي من زمااان ونصحت ناس كثير فيها <333! لأن الشمر اللي فيها جدا جميل و غير انه مثل عادة بنفت حاطين لك بالرسم كيفية وضع الشدوهات <3 , تلقين بنفت في سيفورا  بحدود الـ 130ريال بس ماني متأكدة :$ .. 

تتكون الكيت من( 3 درجات شدو , 2 بلمعه , وواحد مات , كونسيلر - فرشتين ) 

أحب استخدم اللون اللي ف الوسط لأن الشمر او اللمعه اللي فيه جميلة و قريبة من لون جفني .. وهذا هو افضل لون تستخدمينه لميك اب الجامعه او شي انتي مستعجلة لأنه شي ما يبي له تفكير تحطينه على جفنك بالفرشة اللي صورتها فوق , وبعدين تحطين الدرجة الفاتحة مرة ف زاوية العين او فتحة العين <3 ! يفتح عينك و يخليها اكبر و اكثر صحيه مو تعبانه من السهر *_^ ! 

اللون على بنك وهو افضل شي لزاوية العين وماهو قوي جدا على العين <3 .. 

وبكذا نكون خلصنا <3

في طرق كثير تقدرين تبدلين الشدو بكحل او توقفين مثل ما قلت لك , بس جبت لكم ميك اب سريع جدا لدرجة انك بتخلصينه في 5 دقايق ومافيه تفكير <33 !

أن شاءلله يكون بوست اليوم اعجبكم , وتعويض عن الوقت اللي انقطعت فيه عن المدونة والتويتر خخخخخخخ !

اذا حابين اتكلم عن شي معين في هالسلسلة اكتبوا في الهاشتاق :

#back2schoolwithPurpleita

وان شاءلله راح اقرا كل اقتراحتكم واحاول اسويها قد ما اقدر وقبل لا تبدا الدراسة <3 

ولا تنسون تدعموني و لا تحرموني من تعليقاتكم 

ولا تنسون الفولو في البلوق لوفن <3 

اي سؤال او اسفسار عندكم كل وسائل التواصل تحت او تقدرون تكتبونها ف الهاشتاق ;)

فمان الله <3

WHEN YOU KNOW ME YOU WILL LOVE ME