2-سلسلة العودة للمدارس / اعمال يدوية لتجميل مكتبك مع #بربليتا / DIYs to organize your desk with #purpleita

السلام عليكم ورحمة الله وبركاته 

كيفكم ؟

اليوم هو بيكون ثاني تدوينة تابعه لـ سلسلة العودة للمدرسة 

ف بالي من رمضان بس انا و العجز :( !

وفجأة جهزت بوستين هذا وواحد ثاني لنفس السلسلة <3

اليوم راح يكون "DIY" أو عمل يدوي 

شي انتي تقدرين تسوينه ف البيت , وشي بعد 

يضيف شي جميل لمكتبك واللي ف الفترة هذي راح

يكون اكثر مكان تقضين وقتك فيه عشان ناخذ الـ A+ 

هو عباره عن اثنين من الأعمال اليدوية وان شاءلله تكون سهله

عليكم لأنها بالنسبة لي اشياء مرة سهله وغير مكلفة <3

بسم الله <3 

.......

أكيد كلنا عندنا شموع مخلصه وما ندري وش نسوي فيها , وما ودنا نرميها ;) , خصوصا ان اغلبنا يحب شموع باث&بودي وركز <3 ! 

انا هالطريقة شفتها في موقع اجنبي , وحبيت انقلها لكم , و بعد فيه طرق كثير تستفيدن من علب الشموع بس هذي وحدة منها .. 

أول شي راح تحتاجين :

1- علبه او قزازة شمعة -

2- مود بودج اخذته من جرير 

3- فرشة كبيرة نوعا ما - مكتبه طيبه - 12 ريال مجموعه كاملة

4- سكين 

5- قلتر اللون من اختيارك - مكتبة طيبة - 3 ريال

اول شي مثل ما انتوا شايفين ف الصورة اكيد بيكون باقي شمع ف العلبه , وفيه طرق كثير كيف تتخلصين منه , تقدرين تميعينه بالبخار , بس انا ما احب النار وكذا :$$ , ف الطريقة الثانية هي انك تاخذين العلبة وتحطينها ف الفريز لفترة :

انا اخليها لفترة يعني انساها بس نقول 4 ساعات تكون كافية , لين يتجمد الشمع بشكل كااامل : 

الخطوات :

1- تطلعينها وتاخذين سكين وتبدين عملية تكسير الشمع نفسه 

2- بعد ما تنظف من الشمع , تقومين بوضع العلبه في موية دافية لحد ما يبدا الشمع يتفكك عشان تزيلين اللزقات اللي عليها 

3- تنظفينها زين بالموية و الصابون وتتركينها لحد ما تنشف 

4- بعد ما تنشف ناخذ الفرشة ونعبيها من المود بودج , بعدها نوزعه بشكل متساوي داخل العلبه 

5- هنا وقت اللعب , ابدي بنثر القلتر داخل العلبه وبشكل متساوي 

6- اتركيها 24 ساعه او نومي وخليها لين ما تنشف بشكل كامل

الشكل النهائي بيكون كذا , طبعا بيكون فيه شوي حبات متناثرة ف قبل ما تستعملينها اقلبها عشان يطيح كل القلتر اللي ما لزق <3

راح تعطي شكل جميل لمكتبك خصوصا اذا سويتي مجموعة من العلب الصغار , وتصيرين تستخدمينها لأقلامك او ادواتك المكتبيه <3 

وبعد اذا منتي حابة انك تسوين هذا كله يكفي انك تنظفينها و تستخدمينها للتخزين , انا هنا تعيجزت ازينها ف خليتها كذا وشكلها كان جميل ومرتب <3 .. 

ثاني DIY , هو اكثر شي متحمسة له وحتى نزلت له صورة في حسابي في انستقرام <33 , بما ان رمضان خلص , علب فيمتو كثيرة خلصت معه خخخخخخخخخخخ P: ! 

حبيت استفيد من هالشي وان شاءلله النتيجة النهائية تعجبكم <3 

راح تحتاجون :

1- قزازة فيمتو 

2- بخاخ ذهبي - جرير - 25 ريال 

3- بخاخ وردي - طيبة - 5 ريال *ما استخدمته*

4- ورود مجففة - هوم سنتر - 15 ريال 

أول شي نغسل وننظف القزازة , بنفس الطريقة حقت علب الشموع عشان نزيل اللزقات اللي عليها حطيها في موية دافية لفترة وبعد كذا ازالة اللزقه مع الصمغ بيكون سهل <3 و بعد

لازم نقص الحلقة الذهبيه في القزازة عشان يطلع الشكل مرتب

الخطوات :

1- بعد التنظيف و ازالة الحلقة الذهبيه , نطلع برى في الحوش

2- حطي في مكان العمل الكثير من الجرايد 

3- ابدي بخ , اول شي خلي بس طبقة خفيفة بعدين احتريها لين تنشف بعد ما تنشف سوي طبقه ثانية وهكذا..

4- السبب انه لما تبخين كمية كبيرة مرة وحدة راح يسيح البخاخ ويطلع شكله مو مرتب على القزازة.

5- احتريه لما ينشف 

الشكل النهائي :

بصراحة حبيت الشكل النهائي جدددا , ومع الورد البنفسجي و الذهبي طالع شكله جدا جميل <3

وبكذا قدرتي تنوعين و ترتبين مكتبك بطريقة جميلة وغير مكلفة 

في النهايه , 

ان شاءلله انكم استفدتوا ,لأني جدا استمتعت وانا اشتغل 

وياليت اذا سويتي وحدة من DIYs ترسلون لي الصور او تسون لي منشن ف تويتر او انستقرام <33 !

وشاركوني ابداعاتكم وافكاركم على هاشتاق السلسلة :

#back2schoolwithPurpleita

جدا راح انبسط واكيد فيه امكانيات كثير وافكار كثير

اطلقوا العنان لأبداعكم <3 

ولا تحرموني من دعمكم بالفولو والرتويت 

WHEN YOU KNOW ME YOU WILL LOVE ME