السلام عليكم ورحمة الله وبركاته
احم :$ , ادري ساحبة على البلوق مع انه مو من قل
الاشياء اللي حابة انزلها بس من قل الوقت و الزحمة
اللي اعاني منها هالفترة لدرجة اني اليوم قلت بجلس ف البيت واشتغل على البوست <3
خصوصا هالبوست اللي انطلب مني كثير في الاسك وكنت
مترددة انزله لأن مابغيت اتفلسف عليكم :$ !
بس قررت انزله لأن قدرت اجيبه لكم من ناحية تريحني و اشياء
انا صدق سويتها او اسويها للحين عشان اكون ايجابيه و موتفايتد
...
مثل ما ذكرت بوست اليوم راح يكون عن كيف تكونين
شخص ايجابي من جميع النواحي في حياتك يعني ما يخص بس
الدراسة بل كشخص <3 !
ماراح يكون فيه ترتيب معين ف تحملوا الحوسة :$
...
1/ الشغف :
أول شي وهذا بالنسبة لي من اهم الاسباب لأن يكون عندك دافع
و انك تستمرين بكونك شخص ايجابي و ما يستسلم ..
كل شخص فينا عنده شي هو شغوف فيه , أكيد فيه شي اول ما قريتي هالكلمة فكرتي فيه . .
وش الشي اللي انتي شغوفة فيه ؟ الشي اللي لما تتكلمين عنه تتحمسين تكون فيه هذيك اللمعه في عيونك ؟
فكري ف الموضوع شوي , ممكن يكون اي شي لحد يحدك بشي معين شي مكرر شي نادر هالاشياء انسيها و فكري بس ان هالشي انا عندي شغف تجاهه ..
لأن اذا لقيتي الشي اللي يحمسك هنا راح تقدرين تمسكين اول الخيط اذا مو كله و يكون الباقي مجرد حوافز ومكملات تساعدك
لأن هالشي هو راح يكون مثل الاكسجين اللي تتنفسينه , فعليا ما ابالغ بكلامي لما اقول لك لين ضاقت فيك الدنيا تلقينك تروحين لها الشي , مهما كان ...
من قرائه - دراسه - هدف معين حاطته ف بالك * راح اتكلم عن هالشي بعد شوي* - طبخ - خياطة - تصميم - محامة ...الخ اي شي ممكن تحبينه لها الدرجة.
ويمكن ما تستوعبين هالشي هو اللي انتي ممتازة فيه الا لما تجربينه وهالشي راجع لك لأنك تحاولين تجربين اشياء كثير
تطلعين من الكومفرت زون حقتك , وتسوين اشياء انتي ممكن ما تكونين مرتاحة تسوينها , لأنك اذا سويتي هالشي راح تلقينك تتفاجئين من نفسك انها حبت هالشي وابدعت فيه <3 !
اهم شي واهم دافع بالنسبة لي هو انه لازم ينبع منك انتي قبل اي احد اذا انتي كنتي تبين الشي هذا بكل مافيك الباقي كله راح يكون سهل بإذن الله .. لا تعتمدين على احد انه يحفزك خليك انتي المحفز لنفسك , صحيح راح يكون فيه اوقات تحتاجين انه يدعمك وهذا بعد راح اتكلم عنه ..
لكن اهم شي انك انتي تكونين المحفز لنفسك , لأن نفسك هي اللي بتكون معك في جميع اوقاتك <33 , عشان كذا حبي نفسك و اسمعيها وخليها تكون شخص ايجابي الدافع ينبع منك اولا واخيرا.
مثلا /
انا لما دخلت ف الميك اب كنت مغصوبة , ما كنت حابة هالشي اعتبره شي صعب ومعقد هالكلام اكثر من 4 سنين , بس يوم تعلمته حبيته ! صرت انا من نفسي ادور الجديد و اتعلمه بنفسي لقيتني احب احط ميك اب لقرايبي واهلي , واشوفه شي جميل <3
يعني انا نفسي ما توقعت اني "ببدع" فيه او "بحبه" لكن هذا اللي صار !
ليه هالشي صار ؟
لأني طلعت من الكومفرت زون , او منطقة الراحة اللي انا حاطة نفسي فيها وسويت شي انا ماني متعودة عليه , اكتشفت شي جديد ف نفسي ما كنت اعرفه , وهالشي فتح عيني على عالم كبير اللي هو الميك اب <3 ! لأنه شي جميل وللحين الحب له يكبر واتحمس واحب سواليف الميك اب <3 !
2/ الاهداف :
الحين عرفتي وش الشي اللي انتي تحبينه و تبدعين فيه ؟
طيب كيف اوصل له ؟ كيف احققه ؟
الجواب هو انك تحطين لك اهداف اشياء ممكن تساعدك انك توصلين لها الشي . مو شرط شي يكون كبير يعني هدف كبير جدا
اشياء صغيره تساعدك , اهداف اسبوعيه و شهريه و سنوية !!
ابدي بالاشياء الصغيره عشان ما تحسين الموضوع صعب و يتعبك !
انا انسانه مؤمنه ان التفاصيل الصغيره هي اساس كل شي كبير
و هي اللي فعلا تهم , عشان كذا اقول لك ابدي بأهداف صغيره
أكتبيها في ورقة وقولي هالاسبوع راح اسوي :
1- _____________________
2- _____________________
3-______________________
وكل ما سويتي حاجة منها اشطبي لأن هنا راح يجيك احساس الانجاز مضاعف , انا اسوي كذا في كل شي في حياتي ..
لأن هالورقة اذا حطيتها على مكتبك بتكون تذكير بالنسبة لك انك
هالاسبوع بتسوين بإذن الله هالاشياء ووش الاحلى من شعور انك لما تخلصين هالشي تشطبين عليه ؟
وقلت لك اشياء صغيره ليه ؟ عشان ما يجيك اي احباط اذا ما قدرتي تسوينها ..
واكتبيها الحين وشاركيني فيها اقصد هالاهداف الثلاث مهما كانت او كنتي تشوفينها سخيفة , ارجع اقول لك التفاصيل الصغيره و الاهداف الصغيره هي اللي تهم و بتساعدك <3
مثلا :
انا يوم بديت هالسلسلة , قبل لا افكر انزلها كتبت لسة بالمواضيع اللي راح اتكلم عنها , وكنت كل ما نزلت بوست شطبت على الموضوع , وكيف انها قلت لين ما وصلت لها البوست اليوم <3 !
وحتى في المذاكرة , حطي لك جزئية قولي هالجزئية انا بخلصها اليوم وبعدها راح اكافئ نفسي , وكافئي نفسك <3 !
دائما انا اعامل نفسي كشخص ثاني *مجنونه ادري* بس فعليا
اقول نفسي تستاهل اني ادلعها , اني اكافئها اني احبها ...
عشان كذا كثر ما تتعبين ف النهايه المكافئات الصغيره راح تكون حوافز لك انك تكملين ومنها توصلين للنتيجة النهائية اللي انتي حابة توصلين لها , اللي هي النجاح ان شاءالله <3
3/ المحيط الايجابي :
بسالك الحين , وش اكثر مكان تجلسين فيه او تقضين وقتك فيه ؟
وقت المذاكرة او الشغل ؟
مثلا نقول المكتب , مكتبك لازم يكون محيط بالاشياء الايجابيه
المحفزة لك انك تكونين في الاوقات التعبانه فيها او اللي بديتي تقربين شوي انك تكونين سلبيه تشوفينها تذكرين على طول ان هالتعب كله راح يكون بنتيجة ان شاءلله <3 !
مثلا /
- ملاحظات " بوست ات " مثل اللي ف الصورة فوق هذي اشياء
كنت مغطية مكتبي فيها ف اخر ترم لي , ولازال بعضها موجود
وبعد مو شرط تكون نفسها حاولي تكتبين شي انتي تبينه !
لو فكره او هدف بينك وبين نفسك تبين توصلين له كلمة تذكرك فيه <3 لا تكونين رسميه مع نفسك ولا تقيدينها بشي معين اكتبي اي شي ممكن يخليك تبتسمين <3
- صور و كتابات من صديقاتك خواتك اهلك :
ادري هالاشياء بتقولين مالها علاقة بالدراسة او الشغل بس بقول لك انه هالاشياء من تشوفينها بتذكرين اشياء حلوة , هالاشياء راح تخليك تبتسمين لو من جوا وهنا راح تقدرين انك تكملين <3 !
-مو شرط تكون هالاشياء لو تاخذين جوالك وتكتبينها وتخلينها في التدو لست .. ااكد لك انه مو شرط هالاشياء تمشي او تساعدك ف انتي جربيها و في النهايه راح تلقين الشي اللي يساعدك يذكرك و يحفزك <3
- الصداقات :
الصديقات بالنسبة لي هم اكثر شي ممكن يعطي الشخص طاقة ايجابية , لأن صديقاتك هم اللي يسمعونك ويضحكون معك و يساعدونك اذا احتجتي <3 !
هالشي مهم لان لازم ومهم جدا تحيطين نفسك بناس مؤمنه فيك وفي موهبتك او الشي اللي انتي شغوفه فيه , يكونون الدائرة اللي تساعدك اذا احتجتي معنويا. .
يعني في الدراسة حلو تلقين ناس تضحكين معهم و الجلسة ولا احلى بس بعد في نفس الوقت ناس تحفزك انك تجيبين الدرجة الكاملة تساعدك في هالشي وتخاف عليك وتبي لك الخير <3 !
يعني تكون قلوبكم على بعض <3 , مرة قد قريت اقتباس وللحين ما انساه بما معناه " ما يهم يكون عندي اصدقاء كثير بس المهم يكون عندي صديق واحد حقيقي "
وهذا هو المطلوب او المفروض انك تبحثين عنه <3 , صديقة تشجعك لما تحتاجين لما تكونين مترددة وهالاشياء كلها
مثلا /
وانتوا تذاكرون في الاختبارات تحددون جزئية معينه وتخلصونها سوا تراجعون سوا تذاكرون سوا هالاشياء ممكن ما تفكرين انها تساعدك لكن انا اقول لك سواء استوعبتي او لا التفاصيل الصغيره هذي راح تساعدك <3
- ابعدي عن الناس السلبيه او اللي تقول لك ما تقدرين !
اذا انتي متوكلة على الله مافيه شي مستحيل , او شي انتي ما تقدرين عليه !
ونقول فرضا انك ما تقدرين تبعدين هالناس عنك , وناشبين لك خخخخخخخخخخخ ! اعتبريه تحدي بالنسبة لك , انه هم قالوا كذا راح اثبت لهم العكس واني اقدر واني راح اسوي اللي انا اطمح له ..
مو كلنا نقدر نسوي هالشي بس عودي نفسك وقويها على هالشي
انه تعتبر هالتعليقات السلبيه تحدي .
- استفيدي من الايجابيات اللي في شخصيتك وحولي السلبي لشي
ايجابي ..
هالشي انا تعلمته في هالكم سنة , أني اخذ الايجابيات فيني وفي الاشخاص اللي حولي و السلبي اتقبله في الناس لان مافيه احد كامل وبعد احول الاشياء اللي يقال عنها "سلبيه" في شخصيتي واحولها لشي ايجابي <3 ! طبعا هالشي ما جاء في يوم او يومين متى استوعبت هالشي بس اهم شي اني يوم استوعبته عملت به
مثلا /
انا دائما الناس يقولون اني عنيده ومزاجية , وكثير اقرا انه هالصفتين شي سلبي جدا , وكنت حاطة انها شي سلبي "^^ !
لكن قدرت وبحمدالله وبعد شغل على نفسي اني احولها لشي ايجابي وساعدتني في الوصول اللي انا اطمح له وهدفي <3 !
كيف ؟
- العناد : هو انك تسوين اللي ف راسك خخخخخخ ! طيب انا ف راسي اني اوصل لهدفي , استغل هالشي اعاند الطاقات السلبيه و الناس السلبيه و اثبت لنفسي ولهم اني لو بغيت شي راح اوصل له وراح احقق شي من نفسي بإذن الله <3 !
- المزاجيه : ساعدتني في الانتاج او الابداع في شغلي , اني مالي وقت او مكان محدد , الفكرة ممكن تجيني وانا في سريري بنوم او في طريقي لمكان ما , احيانا يساعدك هالشي انه ما تحددين نفسك ف مكان معين عشان تنتجين !
وهالشي ممكن ينفع معك ويمكن لا , لكن بالنسبة لي ساعدتني مزاجيتي في هالموضوع , ممكن اكون محبطة في موضوع معين لكن ف نفس اللحظة او بعدها بخمس دقايق القاني انتج او احاول <3 وهذا بعد يرجع لكوني وصلت لمرحة اني محفزة نفسي - محاطة بناس ايجابين - والهدف اللي ابي اوصل له هو اهم شي <3
- التوكل على الله في كل شي , كل شي تسوينه استخيري ربك
لان مهما استشرتي ومهما تعقدت الامور اعرفي ان الله رايد لك الخير في كل امورك , ولما تعملين تصالح مع هالشي راح تلقين نفسك مرتاحة نوعا ما . لأن في النهايه احنا بشر وبنشكك كل شي ولو حصل لنا شي احنا ما نبيه او تعقد وصولنا للهدف اكيد راح نزعل , بس لما تجلسين وتاخذين نفس وتستوعبين انك قبل ما تبدين هذا كله كنتي مستخيره , ف انتي اللي عليك تسوينه و توكلي على الله , وبتفتح لك ابواب انتي ما توقعتي انها تنفتح !!
...
وبس هذا تدوينة اليوم كتبت لكم وانا كاني جالسة انصح
صديقتي والله حتى وانا اكتب لكم جالسة اتذكر تفاصيل او اشياء
كنت اسويها ولازلت اسويها عشان استمر وانجز <3
حاولت قد ما اقدر ما اتفلسف واجيب شي عملي و شي انا نفسي مجربته , والاشياء مو شرط تسوينها حرفيا هو عبارة عن تدوينة تساعدكم و تعطيكم شوية طاقة ايجابيه <3
اعذروني على حوسة كلامي و طولة :$
وكل وسائل التواصل تحت تقدرين تكتبين لي طموحك و اهدافك
احب لما احد يشاركني او يقول لي ش كثر انا اثرت في يومه
لو بشي بسيط لأن انتوا احد الداوفع اللي تخليني استمر في الكتابة
والتدوين <3
موفقين جميعا والله يسهل لكم كل ما سعيتوا له
GOOD LUCK
love what you do , do what you love
because that is the biggest motivation you'll have
فمان الله ..
WHEN YOU KNOW ME YOU WILL LOVE ME
أوه حبيبتي بربليتا كلاامك جدا جمييل ويشجع أعطااني دفعة معنووية قدااام
ReplyDeleteيختي علييك أنا أحب حركات مكافاأة النفس
أذكر أستاذة مادة تربوية قالت لنا عن هالشيء
إذا أنجزتي سوي لنفسك هدية وحطيها فوق سريرك
واطلعي برا البيت وطولي كذا عن غرفتك
بعدين ارجعي لها واستانسي بالهدية
البناات كلهم مسكوها تطنز بس صراحة جميل إنك تعطين نفسك شيء حتى لو قليل
"ولنفسك عليك حق "
يلله عاد بقول لك أهدافي:
إني أخلص البوست الي أنا قاعده أشتغل عليه حاليا
إني أروح أشتغل على أسناني وأضبطها
أخلص جزئية من اختبار مادة السيمانتكس
فايتييينغ عساك ع القوة يا جميلة ^_^