مشتريات #بربليتا المجمعه " ميك اب - عناية بالبشره" / #purpleita makeup and skincare haul

السلام عليكم ورحمة الله وبركاته ,

كيفكم ؟ 

البوست اللي طال انتظاره خخخخخخ , من زماان وانا 

ودي انزله بس قتل الله العجز :( ! 

وكنت حاطتها ف علبه وكل ما شريت شي اضفته للعلبه

لين ما تجمعت الاغراض هذي كلها 

البوست اساسا كان بيكون عن تجربتي في التسوق من موقع 

drugstore 

بس سبحان الله تجمعت الاشياء وقلت يا بنتي نزليها مرة وحدة

وراح اذكر الاسعار وتجربتي عن الموقع وكل التفاصيل ..

....

أول شي مشترياتي من موقع درق ستور , هالموقع صديقتي

نصحتني فيه وقلت تجربه ومنها انزل مشترياتي ورايي

فيها في المدونه ,  واشوف فرق السعر يعني هل بيكلفني كثير

مع الشحن و المشتريات نفسها اول لا , قبل لا اتكلم عن الاسعار و التجربة بشكل عام راح اتكلم عن المنتجات اللي اخترتها منهم 

...

أول شي هي الارواج , من ويت اند وايلد .. 

الواني مثل ما انتوا شايفين صارخة نوعا ما صيفيه يعني 

ليه اخترتها واحنا قريبين من الشتاء , لأن بكل صراحة ما عندي

مثل هالالوان انا اميل للالوان الداكنه الاحمر و العنابي ودراجتهم

لكن مثل هالالوان ما عندي كثير ,وبعد رخيصة كانت وبحثت

واخترت اكثر ثلاث الوان مبيعا من هالماركة .

قوام الروج :

مات - مطفي - ثباته قوي - الالوان اقوى من ماهي طالعة في صورة الموقع وهذا الشي فاجائني بشكل ايجابي . . 

لأنها مات فهي تجفف الشفايف شوي انصح انك ترطبين شفايفك قبل استعمالها , حطيتها اكثر من 4 ساعات ولازالت موجودة 

حتى بعد الاكل , بالنسبة انها درق ستور وسعرها مره رخيصة ما توقعت اني راح احبها <3 , اكثر درجة حبيتها هي اللي على اليمين اخر وحدة , اللون لاهو الاورج ولا هو الوردي محمر شوي وفيه شوية اورنج <3 , حبيته واستخدمته اكثر واحد .. 

العلبه :

ماهي ذاك الزود ما حبيتها مرة خصوصا انه ما يمديني انزل الورج مرة ف اذا سحبت الغطاء يتوصخ من الروج نفسه , ليتهم ما سوا هالحركة , الحلو انها شفافه ف يمديك تشوفين اللون وتعرفين هو ايش بين ارواجك ^^ .. 

الاسامي و الاسعار :

1- Wet n wild , Dollhouse pink 967

2- Wet n wild , Pinkerbell 968 *المفضل عندي*

3- Wet n wild , Carrot Gold 969

السعر : كل حبة ب : 1.99$ 

تقيمي : 

حبيتها جدا خصوصا ان سعرها رخيص , افكر اطلب الالوان اللي مناسبه اكثر للشتاء و اشوف قوامها و هل هي بتكون مثل ثبات اللي قبل , وبعد للي حابة تشتري انتبهي للالوان لانها ماهي بالضبط مثل ماهي في صورة الموقع , يعني ممكن تكون اقوى شوي .. انصح فيها كتجربه والاسعار مناسبة .. 

ثاني شي شريته هو بلش , كنت راح اخذ مجموعة من ماركات

ثانية لكن مدري ترددت وقلت اخذ حبة افضل , 

لأنه درق ستور ولاني ما ابي اطلب شي متوفر عندنا قررت 

اخذ من الف , ومعروف عن هالماركة انها رخيصة جددددا

عندهم اشياء كثير بدولار ! 

بحثت عن افضل بلش عندهم وقريت التقييمات ولقيت كثير يمدحون هالدرجة ف طلبتها 

....

قوام البلش و العلبه : 

البلش مرررة خفيف ينفع للطلعات الخفيفة الجامعة او الدوام , فيه شمر او لمعه خفييفة جدا يعني لازم تقربين من وجه الشخص عشان تبان اللمعه , حبيته وحبيت اللون يعني على مشمشي , وينفع تستخدمينه ككونتور لوجهك بس مو بشكل قوي لا حولين اطار وجهك يعطيك لون حلو و نضارة , بالنسبة قوة البلش ف مثل ما قلت خفيييييف , يعني احس اني لازم احط كذا مرة عشان يبان شوي , ف صرت استخدمه حول وجهي على اطاره عشان يعطي لون شوي للوجه <3 .. 

الاسم و السعر :

1- e.l.f blush , Tickled Pink

السعر : 3.00$ 

ثالث شي اخذته ولأني صدق كنت ابي اشتريه 

ومفكرة اشتريه من فترة , خصوصا اني احب ميك اب فورفر جل شدوز <3333 ! 

قلت لازم اجرب الدرق ستور من مايبلين خصوصا ان كل العالم

تمدحها لا من اجانب او عرب , واكثر درجة تجيها عليها مدح

هي هالدرجة ف اخذتها وحرصت انها تكون من الاشياء اللي اشتريها من الموقع .. 

......

قوام الشدو :

جميل جدددا جدددا , يعني كريمي وماهو ناشف وهذي دلالة على 

انه راح يجلس فترة طويلة قبل لا ينشف , وبعد اللون فاتن نحاسي على ذهبي ما ادري يعني ف الصورة ما احسها معطية الدرجة حقها او اللون حقه , امس استخدمته وانبهرت , فيه درجة رمادي او فضي ناااقع بس مع شوية شمر ذهبي , مثل ما انتوا شايفين ف العلبه حقته يعني فيه كذا لون , و ما الوم الاجانب يومهم ينهبلون عليه خخخخخخخخخ <3 , لأنه بالتاكيد راح يكون من المفضلات عندي .. 

ينفع تستخدمينه لحاله وممكن يكون الاساس للشدو حقك عشان يبرزه اكثر , ينفع تخلينه سموكي وينفع تخلينه خفيف وللطلعات الخفيفة .. ولأنه جل فهو ضد الموية و ثباته راح يدوم معك ساعات اذا مو اليوم كله , جلس معي فوق ال 9 ساعات وما تحرك من مكانه <3 .. 

الاسم و السعر :

1- Maybelline EyeStudio Color Tattoo 24Hr Eyeshadow, Bad to The Bronze

السعر : 6.99$ 

من الاشياء اللي اخذتها هو هالبرايتر +الكونسيلر من مايبلين

حبيت اخذ شي للتفتيح و الهايلايت ف اخذت ثاني افتح درجة

عندهم .. 

القوام :

هو يجيك على شكل قلم واذا لفيتيه يطلع الكونسيلر , اخذت درجة 

على بنك اندر تون , لأني بصراحة يوم وصل صار فاتح مرة من اني احطه تحت عيني , ف صرت استخدمه كهايلايت على المناطق اللي حابة ابرزها في وجهي , قوامه ثقيل و ثباته . . ولو حابين اتكلم اكثر عنه عطوني خبر :$ او كيف استعمله .. 

فيه درجات على بنك هو اللي اخترته , حبيته صراحة وراح استعمله للمناسبات لأن ما احب اتعب وجهي بالميك اب الكثير وقت الطلعات اليومية , بس عموما حبيته جددا <3 ! ما استخدمته تحت العين لسى ف ما ادري عن ثباته في هالمنطقة , لكن كهايلايت جميل جدددا .. 

الاسم و السعر :

1- Maybelline DreamLumi Touch Highlighting Concealer, Radiant

السعر : 7.99$ 

.... 

وبكذا اكون خلصت مشترياتي من موقع درق ستور

ما اشتريت اشياء كثير لأنها اول تجربه ولا ادري عن الشحن 

وتكلفته وكل همي انه ما يكون غالي ولا اكون استفدت شي 

مو اول مرة اطلب ميك اب من النت , لكن اول مرة اتعامل مع هالموقع , فما حبيت اجازف باشياء كثير .. 

اول شي راح اقول لكم الايجابيات والسلبيات في الموقع 

الايجابيات : 

1- الاسعار رخيصة جدا وكل ماركات الدرق ستور متوفرة عندهم 

2- دايما يسوون عروض وتخفيضات على الميك اب المتوفر عندهم , يعني  مع الاشياء اللي شريتها وفرت 3$ في المنتجات  , لان بعضها كان عليها تخفيض .. 

3- يبيعون كل شي ممكن له علاقة في الجسم من عناية لميك اب يعني مثل الصيدليات اللي عندنا لكن احس انه اكبر و التنوع في 

الماركات و الاختيار اكبر. 

4- فيه شحن مجاني لكن لازم تسجلين وتشتركين معهم.

السلبيات :

1- ما يشحنون للسعودية , وهذا يخليك تدفعين الشحن من امريكا للسعودية , يعني اذا انا مثلا مستعجلة لازم ادفع حق الشحن السريع في الموقع نفسه وبعدها ادفع مرة ثانية لشحن من صندوقي في امريكا عشان توصل هنا .. 

2- تأخير في الشحن , لأني اخترت الشحن الاقتصادي تأخر الشحن علي يعني جلسوا اسبوعين , انا من الناس اللي عادي عندي ان الشحن يتأخر لكن حبيت اذكر هالشي عشان فيه ناس يهمهم <3 

بشكل عام حبيت التجربه , وراح اتسوق من عندهم مرة

ثانية لأن فيه اشياء كنت ابيها لكن مخلصة :( وهالشي خلاني اقول خيره ان شاءلله لأن كانت اول مرة اطلب من عندهم .. 

وبعد الهدف اللي ابي اوصل له من الطلب هو الاسعار كل اللي طلبته مع الشحن كان 200 الا شوي , يعني ما وصل حتى للميتين وهالشي خلاني انبسط من نفسي خخخخخخخ :$ !

لأن عندنا الاسعار غالية جدا وانا من الناس اللي ارفض ان احد يلعب علي او يغشني :) ! هو احنا دافعين دافعين لمحلات الميك 

اللي عندنا , لان مو كل شي ينشحن لنا , لكن شي اهون من لا شي

ولو حابين اتكلم عن موضوع الشحن و كيف انا اتسوق بشكل ذكي قد ما اقدر عطوني خبر <3 

وللطلب من الموقع تم وضع الرابط فوق .. 

.............

لا تروحون توني ما بعد خلصت كل الاشياء اللي شريتها خخخخخخخ , فيه الحين كم غرض شريتها من هنا :$ 

المحل : وايتس - رياض قاليري 

المناكير : ايسي - واقي او لمعه 

السعر : 40 ريال لكل حبة 

مع ان عندي ادمان للمناكير , لكن ما عمري فكرت اشتري من مناكير ايسي , مع ان عليها مدح كثير من اجانب وعرب وكثير ناس تحبها , لكن كل مرة اوقف عند ستاندهم في الصيدلية ما القى شي يلفتني و السعر ينفرني شوي , ادري 40ريال ماهي كثيرة مرة بس مدري ليه ما قد فكرت اشتري منهم .. 

الا هالمرة شفت هاللون وفهيت :$$$ ! حبيته جدددددا , وهو اول لون اشتريه من ايسي , حطيته اول ما رجعت البيت كريمي جدا يعني مب ناشف وصعب انك تحطينه وفيه لمعه <33 ! 

بالنسبة للكوتينق او اللمعه , ما حبيتها للأسف استخدمتها مع مناكير عندي وهالمناكير من سنين وانا استعمله واحبه لأنه ما يتقشر بسرعه , لكن يوم استخدمت هالشي من ايسي تقشر من ثاني يوم :( ! صحيح عطت المناكير لمعه تجنن بس وش فايدة اللمعة اذا كان راح يتقشر بشكل سريع :( ! بعطيه فرصة ثانية لاني حبيت اللمعه اللي اضافها للمناكير .. 

المكان : بوتس - رياض قاليري 

السعر : 80 ريال 

الماركة : مقشر من سوب اند قلوري

ثاني شي اخذته من الصيدلية هو المقشر من سوب اند قلوري 

حبيبي :$ , أول بوست نزلته في البلوق كان عن سوب اند قلوري , ولو حابين تقرون البوست تفضلوا هنا .. 

كنت متكلمة ان اكثر شي اعجبني في المجموعة هو المقشر ويوم خلص لأن العلبة كانت صغيره مرة رحت شريته على طوول <333 ! وكل ما شفت احد ارجع انصحهم فيه .. وانا اقول لكم لو شريتوه ماراح تندمون مايحتاج اتكلم عنه اكثر لأني قد تكلمت عنه ف شيكي الرابط :$ 

ملاحظة : 

لاحظت في الانستقرام انه فيه كثير ناس تبيع منتجات سوب اند قلوري , وباسعار خرافية , وهالشي انا ما حبيته بالرغم اني اقول ان الصيدليات اللي عندنا تبالغ باسعارها لكن ما وصلت للي وصلوا له البائعات وما ابي اقطع رزق احد , لكن نصيحة قبل لا تشتري اي شي من اي شخص او اي محل ابحثي عنه ف النت و قارني بين الاسعار في كل مكان وشوفي وش اللي يناسبك اكثر , لأن ما توصل اننا نبيع شي ب 80ريال ب 120 ريال ! 

وياليت محد ياخذ الموضوع بحساسية انا بس اقول هالشي لمصلحتكم :$ 

....

واخر شي شريته هو كان من محل يعتبر الموزع الرسمي

لماركة كاراجا <33 ! 

ماركتي المفضلة للبشرز .. ولأن لها تقليد كثير ما اشتري 

الا من الموزع الرسمي لها <3 ! 

أول شي شريته هو هالمقشر , بشرتي هالفترة صايرة فيها دهون

ولا تعودت منها هالشي :( ! يعني انتوا عارفين انها جااافة ف 

صايرة فيه دهون عند الانف وحوله , وسمعت كثير عن هالمقشر

وما كنت ادري انه ينباع عندنا حتى فكرت اطلبه , لأن جديا فيه مدح في كل مكان من الاجانب المشاهير ومن الناس اللي يكتبون 

رفيوز في امازون وغيره <3 !

بصراحة للحين ما جربته ف لو حابين اتكلم عنه بعد ما اجربه ياليت تخبروني .. وان شاءلله يكون يسوى المدح 

من المفترض انه يكون طبيعي100% وفيه مواد تساعد على ازالة الزيوت - الرؤوس السوداء - والبثور او اثار الحبوب

نجربه ونشوف ;) ! 

السعر : 15 ريال

....

ثاني شي هو 2 بلشرز من كاراجا , هالماركة ما احس كثير يعرفونها وحبيت اتكلم عنها لأن بالنسبة لي هي جودتها مثل بلشرات ماك , وما اكذب عليكم لما اقول لكم انها مثلها ومدري يمكن احسن بس ما احسها معروفه ولأني احبها تحمست اني شريت لي كم شي منهم واني اجي اعلمكم عنها <3 

في كل مرة كنت استخدمها في الجامعة كانوا البنات يسالوني عنها

او يمدحونها . . احيانا بنات ما اعرفهم <33 ! 

وبعد اقاربي اذا استخدمتها يحسبوني مستخدمه شي من ماك..

الماركة هذي ايطالية , يعني جاية من ايطاليا 

أسعارها الحبة ب 55 ريال لأني ماخذتها من الموزع 

لكن يبيعونها 82 في المصباح . 

.......

الدرجة : N 107

أول لون هو بيبي بنك , مطفي مافيه الا معه خفييفة جدددا 

على ذهبي بس جدا خفيفة ينفع للاستخدام اليومي للدوام يعني

وثباتها قوي تجلس معك اكثر من 6ساعات ما تختفي او يحتاج

انك تعيدين عليها , عندي من نفس الدرجة بلمعه للمناسبات 

وتجلس معك لسنين خخخخخخخخخ ! 

يعني ما تخلص بسرعه لأن البروز حقها قوي ما يحتاج الا شوي مررررة يعني بس انها تلمس الفرشة البلش وراح يكفيك <3 !

من المفضلات عندي هالماركة للبلش .. 

الدرجة :N 108

ثاني درجة هي على مشمشي وشوي برونز 

فيها ملعة ذهبيه مثل ما انتوا شايفين , اقوى شوي من اللي قبلها

ما تنفع للكونتور القوي لأن فيها هاللمعة ينفع تستخدمينها حولين وجهك او كبلش مشمشي <3 للوك صيفي جميل <3 

مثل باقي بلشرات كاراجا الباي اوف قوي وثبات اقوى 

دائما يكفي كمية بسيطة وراح تجلس معك لساعات

الوانها حلوة وهاللون امي اخترته وحبيته جديا حبيته !

في الافنت استخدمت هالدرجة كبلش <3 . . 

...

وبس هذا لليوم بوست طويل خخخخخخخخ !

احس اني طولت وانا اتكلم خخخخ , كل شي كتبته و عطيتكم رايي بكل مصداقية وحبيت اتكلم مو بس عن ميك اب واشياء احنا نعرفها حبيت اتكلم عن ماركات ممكن ما تكون معروفة مرة :$ 

وماركات انا احبها مثل كاراجا <333 ! اللي بالنسبة لي 

اغنتني عن بلشرات ماك الغالية .. اتوقع انا الوحيدة اللي تحب الميك اب وما تحب بلشرات ماك :$ ! 

حاولت اتكلم لكم عن الاشياء بشكل سريع لأن مو كلها استخدمتها بشكل الوافي اللي يخليني اقيمها بشكل اكون انا راضية عنه 

في النهايه اتمنى يكون اعجبكم البوست , و لاتنوسن انه مو كل

شي يعجبني ويناسب بشرتي راح يناسبك او يعجبك <3 

ولا تنسوني من الدعم من فولو و رتويت وحتى اللايك في

انستقرام <3 .. 

احبكم وخلوكم قريبين لأن جديا بدعمكم استمر <33 

فمان الله 

WHEN YOU KNOW ME YOU WILL LOVE ME