رأيي في ماسكارا ذا فيس شوب #بربليتا || #purpleita review on thefaceshop mascara

السلام عليكم ورحمة الله وبركاته. 

كيفكم ؟ 

تدوينة اليوم عن ماسكارا من ماركة الكورية the face shop. 

من فترة شريت منهم ماسكات وحبيتها رخيصة وحلوة. ف قررت اجرب الماسكارا حقتهم..

قصه قصيره : 

مره كنت في سيفورا ومسوين عرض لافضل ١٠ ماسكارات مبيعا عندهم. و اللي تبيع كانت تبيني اشتري ماسكارا وكل ما قالت هذي قلت عندي. في الاخير اشرت عليهم من افضل ١٠ نصها عندي خخخخخخخخخخ. احسها استسلمت مني XD 

لان اعترف في كل ماركة ميك اب اول شي اجربه عندهم هو الماسكارا لان هي الاساس عندي. ف اذا حابين اتكلم عن افضل ماسكارات عندي عطوني خبر :)

نرجع لموضوعنا ماسكارا ذا فيس شوب حبيت الفرشه و الباكجنق. و اللي تبيع كانت حاطتها وحبيت شكل رموشها 

معلومات :

الاسم: Face It Maxx' Eye Mascara 03 Longlash

السعر: حدود الـ ١٦٠ ريال

الماركة: thefaceshop

مكان الشراء: القصر مول - الرياض

تجربتي :

بذكر الاشياء الايجابيه فيها قبل كل شي، اول شي فعلا تعطيك تكثيف جميل جدا وتط،ل الرموش. كانك مركبه رموش مقاس صغير جدا جميله على العين وتعطي منظر حلو و التقوس حقها جدا جميل تعكف لك الرموش وتعطيها كثافه. 

لكن الشيء السلبي واللي خلاني استخدمها قليييل، هي انه الشعيرات اللي فيها او الجل نفسه كل شوي يدخل ف عيني وتخيلي في مناسبه اجلس ارمش كثير واحيانا عيني تحمر. مع الاستخدام سببت لي زي الحساسيه. زيادة على كذا ما احسها ضد المويه لان تحت جفن العين نهاية اليوم امتلى سواد منها وهالشي ما عمره صار معي. يعني اتعبتني جدا من ناحية التساقط ودخولها للعين. غير كذا ازالتها متعب جدا ولاحظت ان رموشي نصها يطيح وانا ازيلها. ما احب الماسكارا اللي تسبب تساقط لرموشي لان مو كل ماسكارا ضد الموية تسبب هالشي وانا انسانه ما استخدم الا ماسكارا ضد الموية لانها تدوم فتره اطول. لكن هذي زيادة على انها ما جلست فتره طويله ، رموشي طاحت معها :(. تمنيت اني احبها لان فكرت الماركات الاسيوية في الماسكارا المفروض تكون افضل ! 

بالنسبه لي ماراح اشتريها مره ثانيه. 

اتمنى التدوينة افادتكم لو بشكل بسيط. اذا فيه اي سؤال تقدرون تتواصلون معي تحت 

فمان الله

WHEN YOU KNOW ME YOU WILL LOVE ME