♥ ♥ تقرير عن مجموعة البرونزر عند #بربليتا

السلام عليكم ، كيف الحال ؟

حبيت اليوم اتكلم عن البرونزر اللي عندي♥ .. انا تجيني فتره اطيح في شي وابدا اجرب من كذا براند لين اطيح في شي ثاني خخخخخخخخ… الفتره اللي راحت كانت البرونزرات. عادة استخدم برونزر اكثر من البلش. وهذا يرجع لي. لان بالنسبه للاستخدام يعتمد على تفضيلك ، وراح انزل الميك اب اليومي حقي هالفترة لانه تغير كثير عن اول ^^ . 

راح اتكلم عنهم بشكل عام وراح اذكر الايجابيات و السلبيات لكل واحد منهم ♥♥^^. 

الماركة : برجوا 

مكان الشراء: سنتر بوينت 

السعر: ٥٥ريال 

الدرجات :

على ذهبي : Burn Illusion

على موف: Sienne

اخذت منهم درجتين و هذي ذكرتني باشياء قديمة جدا كنت اشوفها اول في كولكشن الميك اب حق امي ، لكن قررت اخذها ♥

في البدايه حبيتها او بالاصح حاولت احبها. اول شي الالوان حلوة و كثيره وفيه خيارات كثير. اخذت وحدة برونزية وفيها قلتر ذهبي. اللون في العلبه يجنن♥♥ . لكن تتعبك مره على ما يطلع او تمسكه الفرشه. يعني البقمنت حقها ما يبان ابد في الوجه. تتعبين وانتي تحاولين تطلعينه. هذا الشي انا ما حبيته ابد. حتى في البداية قلت يمكن من الفرشة واغيرها بس لازالت تتعبني على ما تبان معي. لكن لما تحطينها او لما تبان تكون خفيفه يعني تنفع للاستعمال اليومي و المراية فيها شي ايجابي. صرت ما استعملها الا اذا كبيس (اساس) للشدو او لو مستعجله وابي شي خفيف على العين. غير كذا ما استخدمها لاني لقيت عندي اشياء افضل. 

لكن فيه لون احب استخدمه من الاثنين اكثر من الثاني ، اللون اللي على موف فاتح وفيه لمعه خفيفه هذا احبه لما يكون الروج حقي غامق احسه ينفع معهم اكثر♥♥. 

الماركه : الف 

الموقع: هنا 

الاسم : Baked bronzer - Bora bora 

بصراحة تفاجأت ببرونزر الف خصوصا ان الف مره رخيصه اغلب اشيائهم على دولار - ٤ دولار ♥♥. واخذت هذا من زمان مع تخفيضاتهم الكبيره. لكن حبيته كثيييير ♥♥. البيقمنت جمييل جدا خصوصا لما تستخدمين معه فكس بلس من ماك او اي ستتنق سبراي. يبرزه اكثر. لمعته طبيعيه ماهي قطع. ولان اللون اللي اخذته ماهو غامق مره او برونزي مره. احب استخدمه على عظمة الخد لما اكون مسوية تان. انا ما احب التزم بشي معين في مكياجي ، عشان كذا احب استخدم هذا تحديدا او اكثر شي في العين ^^، يعطي منظر حلو للعين و اللمعه جدا جميله وخفيفه للاستعمال اليومي مع كحله خلصتي عينك ♥♥♥ 

الاسم : Contouring Blush &Bronzing Powder 

اللون : Antigua 

الموقع: هنا

اللمعه اللمعه في هالباليت من تفتحونها تشوفون شي يدهر خخخخخخخخخخخ .. لا صدق اللمعه تخوف في هالباليت.. وكل ما استخدمه احس اني بشويش احط الفرشه عشان ما اكثر. البقمنت فيه لا يعلى عليه تحتاجين بس نقطه منه ♥♥. يعني الفرشه تلمسه لمس ويكفي. وهالشي ينطبق على البرونزر و البلش. لكن على السعر هو افضل من غيره بكثير. اول شي اللون او درجة البرونزر نفسه حلوه ماهي تراب ولا لونها مب حلو على الوجه. بالعكس جدا جميله ♥♥ وكذا تحسينه كريمي مب قطع. لكن مشكلته وحدة انه ما يجلس معك ساعات طويلة. انا جربته على كريم اساس ممتاز ويجلس معي ساعات طويلة و واحد ثاني استخدمه بشكل يومي. كلهم ما جلس معي طول اليوم او طول السهره. وحتى لما يبقى في الوجه يكون مبقع كانك ما دمجتيه صح! 

غير كذا هو جدا ممتاز من ناحيه اللون - البقمنت - الكميه اللي تحصلين عليها مقابل سعر جدا رخيص + لا ننسى المراية اللي معه ♥♥. يذكرني كشكل وكذا بنارس *ـــ^. 

الماركه: ذا بالم 

الاسم: Bhama Mama

خلوا اني ما حبيت تغليف او العلبه حقت البرونزر. لكن هذا افضلهم من ناحية كل شي.. السعر اغلاهم طبعا لكن يسوى كل هلله.. استخدمه اكثر شي. واحبه كثيير خصوصا للكونتور. مو كبرونزر وعلى فكره لازم تعرفون الفرق بين المصطلحين ^^. المهم بهاما ماما استخدمه ككونتور اكثر لانه غامق ومات مافيه لمعه. احب اكثر شي استخدمه ككونتور للانف ♥♥

 تقدرين تخلينه خفيف لان شوي منه يكفي اذا كنتي تبين تعطي وجهك شوي لون وحياة. اما ككورنتور افضلهم هو. وعندي من سنة وزود وللحين دايم ارجع له، تعرفون اللي اثق انه بيعطيني الكونتور اللي انا ابيه ^^. ومع اني دايم استخدمه لازال صامد وباقي منه كثير للحين ما وصلت لاخره يعني حتى لو كان شوي اغلى من الباقين فهو بيجلس معك فتره طويلة وماراح تملين منه لانه مات. اعتبره ما ينفع للي بشراتهم فاتحه مره. لان بيطلع كانك حاطة طين على وجهك .. احيانا اذا تحمست وكثرت (تصير) اجلس اخففه بفرشة كريم الاساس. غير كذا ثباته لا يعلى عليه، يجلس معك طول اليوم وما يتحرك. 

فمان الله

WHEN YOU KNOW ME YOU WILL LOVE ME