لمحبي روايات الغموض و الجريمة رواية Dark Places مع #بربليتا

السلام عليكم ، كيفكم اليوم ؟

حبيت اتكلم اليوم عن كتاب قريته وحبيته كثير ، ولاني من زمان ما تكلمت عن الروايات اللي اقراها ف قررت اخلي هالاسبوع منوع شوي.. 

تدوينة اليوم عن رواية Dark Places ♥♥

تفاصيل :

الاسم: Dark Places

الكاتبة: Gillian Flynn 

تصنيف: غموض، جريمه

عدد الصفحات: 349

مختصر القصه :

ليبي داي كان عمرها فقط ٧ سنوات عندما تم قتل امها و اختيها الاثنتان تحت مسمى ( تضحية للشيطان ) في ولاية كنساس. الناجية الوحيدة ليبي، شهدت ضد اخيها بين الذي كان عمره ١٥ سنه. بعد ٢٥ سنه من الجريمة ، نادي سري يسمى (نادي القتل). هذا النادي لديه هوس في الجرائم المشهوره يقومون بايجاد ليبي ، ويساعدونها في حل جريمة قتل عائلتها. 

الرواية شريتها على IBooks في الايفون، كانت متوفرة عندنا في جرير لكن مالقيتها مدري هي خلصت ولا عاد رجعوها. المهم اني قد قريت للكاتبه Gone Girl، قريت قون قريل اول ما نزلت قبل كم سنة وحبيتها كثير صحيح انها كانت اطول من دارك بليسس، لكن كانت روايه اكثر من رائعه وطلعوا لها فلم و الفلم حقق نجاح كبير. لكن بالنسبة لوحدة قرت الرواية قبل لا تشوف الفلم الرواية احلى بكثير. لكن تدوينة اليوم مو عن Dark Places ، تدوينة اليوم عن رواية Dark Places، الرواية قصتها محبوكة و النهايه ابدا ما توقعتها وهذا شي نادر ما يصير ، اذا تحبين الاثارة و الغموض و الجريمة راح تخلصين هالرواية القصيرة في فتره ةدا قصيرة ، لما كنت اقراها كانت هي هاجسي طول اليوم، يعني اذا انا ما اقراها ف انا افكر فيها. 

القصه:

القصة محبوكة وماهي مملة ، الحلو و المميز في الرواية هو ان :

١- البطلة (ليبي داي) ماهي عادية ، بمعنى ماهي مثل باقي البطلات في الرواية : البنت الساذجة البريئة …الخ ! 

بالعكس من اول صفحة تعرفون شخصيتها خصوصا انها تقص وتسمعين افكارها وتحكي عن نفسها بطريقة سلبيه وكانها تبي من القارئ يكرهها ولا يرحمها او يشعر بالشفقه على اللي صار لها مع اهلها. 

هذا الاقتباس وهي تتكلم عن نفسها وهذي احد الاسباب اللي تخليني احبها ♥

٢- ثاني شي مميز في الرواية هي انها تنتقل بين الحاضر و الماضي (وقت حدوث الجريمة) ، ومن عدة وجه نظر مختلفة ! يعني تقرين افكار و تعيشين الاحداث من وجهة نظر ليبي - اخوها بين - امها ! ، طبعا الام و الاخ في الماضي قبل حدوث الجريمة. ف كل فصل ينقلك وطول ما انتي تقرين وطول ما ليبي تحاول تكتشف اللي صار في ماضي عائلتها ، انتي كقآرئة تكتشفين معها !

٣ـ محد في الرواية تحسين انه مذنب ١٠٠٪ ! يعني مافيه مجرم واحد او شخص سيء واحد بالعكس تحسين هذي كلها احداث سيئة صارت ! 

التشويق في الرواية و الحبكة حقت الجريمة خلتني احبها اكثر من قون قيرل بالرغم اني كنت من عشاق قون قيرل وكنت اقراها واخذها معي ف كل مكان اروح له ، لكن هذي لانها اقصر ف التشويق حقها اكثر و زيادة على كذا احسها كئيبة و مظلمه اكثر من قون قيرل. 

تقييمي لها في القود ريد ٥\٥♥♥♥♥ !

لاني حبيت حبيت البطلة ليبي داي على كثر ما كانت تحاول تخليني اكرهها وعلى كثر ماهي شخصيتها معقدة ومتعبه لكن كونها معقدة حسيت انها اقرب ما تكون للانسان اللي على ارض الواقع !

الرواية لها فلم وشفت الفلم لكن اقل ما يقل عليه هو انه سيء جدا ! ما انصحكم تشوفونه لانه ما يقارن بالرواية ولا بسرعه الاحداث و التشويق وعمق الشخصيات :( .. وبالنسبة لي ما اشوفها طويلة مره ، بالنسبه لقارئة بطيئة مثلي خلصتها في اسبوع وكم يوم ^^.♥♥. 

وبس اتمنى هالتدوينة حمستكم تمسكون اي كتاب تقرونه ♥

واذا عندكم اقتراحات لتدوينات لباقي ايام الاسبوع لا تتردون انكم تشاركوني اياها على الهاشتاق 

 #weekWpurpleita

فمان الله 

WHEN YOU KNOW ME YOU WILL LOVE ME